GAGURITAN "Bhujangga Waisnawa"

Ringkesan

PUPUH SINOM

Pangkah  Tityang Nganggit Gita,

Pupuh Lagu Tuna Luwih,

Mapan Langgah Manah Tityang,

Ngucap Daging Babad Niki,

Lampah Ida Maha yati,

Reçi Markandēya Mungguh,

Nurunang Bhujangga Waiçnawa

Pecak Saking Jagat Jawi,

Sida Rawuh,

Napak Jagat Bali Dwipa.

 

Raris Reçi Mangandika,

Bhujangga Waiçnawa Cening,

Mangda Cening Pedas Nawang,

Maring Indik Kawitan Cening,

Pang Tan Cening Kadukain,

Twara Rungu ring Leluhur,

Guru Pacang Manuturang,

Melahang Ja Madingehin,

Mangda Tuhu,

Cening Inget ring Kawitan.

 

3.            Uli Malu Katuturang,

Sadurungē Wēnten Gumi,

Miwah Surya Bulan Bintang,

Wēnten Embang Minekadi,

Twara Bisa Mangadanin,

Gede Cenik katon Patuh,

Tondēn Ada I Manusa,

Twara Ada Kasengsayin,

Duk Punika,

Wantah Wēnten Ida Hyang Rucya.

4.       Ida Wantah Mawisēsa,

Agung Mangebekin Gumi,

Tan Maduwē Manah Jejeh,

Ida Agung Paling Alit,

Ida Mraga Suwung Misi,

Sanē Suwung Nusa Tuwuk,

Ida Katon Nora Katonang,

Di Cenikē Coloh Sai,

Sanē Suwung,

Stata Wēnten Maring Jagat.

5.       Ida Wantah Tanpa Rupa,

Dēwa Tattwa Kaharanin,

Çastra Windunē Utama,

Windu Ida Sang Hyang Kawi,

Ida Pradnyan Kalintang Suci,

Sang Hyang Widhi Aran Iku,

Raris Ida Nangun Yoga,

Puruça Predana Mijil,

Wantah Iku,

Hyang Pretiwi Hyang Akasa.

6.       Ida Mraga Rwa Binēda,

ANG  AH Dwi Aksara Yukti,

Hyang Puruça lan Predana,

Raris Ida Nangun Kērthi,

Mijil Tri  Puruça jati,

Hyang Çiwa Pertami Mungguh,

Sada Çiwa Prama Çiwa,

Tri Aksara Kaharanin,

Sanē Mungguh,

ANG, UNG, MANG Çastra Uttama.

7.       ANG Meraga Hyang Brahma,

UNG Meraga Wiçnu Jati,

MANG Meraga Hyang Içwara,

Mewasta Sang Hyang Tri Murti,

Nunggil Tri Puruça Jati,

Daging Çastra keto Mungguh,

Tri Puruça Nangun Yoga,

Catur Windu Mijil Malih,

Kaping Sulung,

Murwa Aksara Wastanya.

PUPUH  DURMA

8.       Hyang Murwa Aksara Nurun Warmadēwa,

Hyang Çakti Arya Kinardi,

Hyang Rçi Wusurya,

Nurunang Rci Markandēya,

Sang Hyang Guru Paçupati,

Manurunan,

Panca Pandita Keharanin.

9.       Hyang Murwa Aksara raris Nangun Yoga,

Hyang Semēru Raris Mijil,

Hyang Semēru aputra,

Kalih diri Lanang-lanang,

Sang Saniata Sang Ayati,

Sang Niata,

Maputra Sang Mrakanda Nami.

10.     Sang Ayati Maduwē Putra Sang Prana,

Sang Mrakanda Ngambil Rabi,

Manaswini Ingaran,

Maputra Rçi Markandēya

Markandēya Ngambil Rabi,

Dēwi Dumara,

Saking India Magingsir.

11.     Margin Ida Pacang Nyujur Jagat Jawa,

Madwē Putra Kalih Diri,

Putran Ida Lanang,

Madwijati Maka Rwa,

Rçi Dewa Sirah Pertami,

Bhujangga Waiçnawa,

Putran Ida Kaping Kalih.

PUPUH GINADA

12.     Carita Rçi Markandēya,

Maring Jawi Ida Mlingih,

Sedek Ida Nangun Yoga,

Maring Puncak Gunung Demalung,

Magingsir Maring Gunung Hyang,

Ditu Malih,

Rçi Markandēya Nangun Yoga.

13.     Genah Gunung Hyang Punika,

Ring Wewengkon Diyēng Nami,

Yogan Ida Ring Gunung Hyang,

Gagodanē Akēh Rawuh,

Mengawinang Ida Kēsah,

Beneng Kangin,

Maring Gunung Raung Prapta.

14.     Gunung Raung Jawa Purwa,

Drika Ida Masemadi,

Klintang Pageh Yogan Ida,

Ditu Ida Polih Wahyu,

Sabdan Hyang Jagat Natha,

Dēwa Sang Rçi,

Ujar Mami dong Pirengan.

15.     Kema Dēwa Ngabas Alas,

Pangiring Dēwa Ajak Sami,

Disubanē Kedas Galang,

Dēwa Ngedumang Apang Patuh,

Anggon Carik Pekarangan,

Kēto Cening,

Bawos Ida Sang Jagat Natha.

PUPUH SINOM

16.     Rçi Markandēya Nyingak,

Teja Galang Manyinarin,

Katon Gunung Mabarisan,

Uli Kauh Nganteg Kangin,

Wikan Ida Maring Indik,

Genah Galang Pacang Tuju,

Ida Ngelesuang Yoga,

Pacang Nitah Sisya sami,

Selag Gunng,

Cingak Ida Wēnten Dēsa.

17.     Desa Aga Nē Wastanya,

Ring selag Gunung Raung Ngempi,

Sang Reçi Raris Memarga,

Ring Dēsa Aga Ida Prapti,

Kesanggra ban Sisya Sami,

Sang Rçi Kahaturin Lungguh,

Sisya Sami Matur Sembah,

Tumbēn Reçi Ngerawuhin,

Lēdang ratu,

Ndikain Titiang Mangda Tatas.

18.     Reçi Markandēya Sabda,

Uduh Cening Sisan Mami,

Sedek Bapa Nangun Yoga,

Sang Jagat Natha Ngerawuhin,

Sabdan Ida Alus Manis,

Bapa Wantah Nē Kautus,

Mangda Bapa Ngabas Alas,

Ngardi Tegal Miwah Carik,

Kēto Tuhu,

Cening Ajak Ngabas Alas.

19.     Sisyan Ida Matur Sembah,

Makesami Wantah Ngiring,

Lunga Pacang Ngrebek Alas,

Welung Atus diri Maka sami,

Sang Reçi Lēdang Miragi,

Yēning Sampun Cening Cumpu,

Nah Jalan Cening Memarga,

Ring Gunung Raung Beneng Kangin,

Nē Katuju,

Sisi Kangin Jagat Jawa.

PUPUH  DURMA

20.     Tan Kocapan Rçi Markandēya ring Jalan,

Sagēt Sampun Ida Prapti,

Ida Mangandika,

Uduh Dēwa Sisyan Bapa,

Ini Alas Abas Cening,

Pang Waspada,

Alas Gelis Kabas Mangkin.

21.     Prama Kawi Banget Munggah Pamiduka,

Ring Sang Ngabas Alas Sami,

Tanpa Wangsit Ngabas,

Kancan Gering Katiwakang,

Wastu katah Sisyanē Mati,

Anē Lēnan,

Akēh Buron Wastu Mati.

22.     Ida Sang Rçi Markandēya Mangandika,

Uduh Cening Sisya Sami,

Suwud Malu Ngabas,

Bapa Sanget Kaduhkitan,

Ngaton Sisya Katah Mati,

De Sangçaya,

Kagunung Raung Masemadi.

23.     Mwali Malih Ring Gunung Raung Mayoga,

Kasarengin Pandita Sami,

Nunas Ring Sang Embang,

Sisyanē tan Mangguh Baya,

Wēnten Sabda Maring Langit,

Rçi Markandēya,

Ujar Ingsun Dēwa Piragi.

PUPUH  GINADA

24.     Uduh Nanak Markandēya,

Margin Cening Banget Pelih,

Ngawag- ngawag ngabas alas,

Wirēh Ada anē Nunggu,

Ida Nglēbang Sasab Mrana,

Katah Mati,

Sang Nuwēnang Banget Duka.

25.     Cening Mengaturang Yadnya,

Guru Piduka Kaharanin,

Bhuta Yadnya Dēwa Yadnya,

Sinah Dēwa Mangguh Ayu,

I Subanē Cening Mayadnya,

Ditu Raris,

Ngabas Alas Kelanturang.

26.     Kalesuang Yogan Ida,

Mwah Pandita Maka Sami,

Gunung Raungē Katinggal,

Ring Sisya alih Kacunduk,

Sanē kantun Wantah Domas,

Sregep Sami,

Maka Bibit Miwah Prabot.

27.     Reçi Markandēya Prapta,

Lan Pandita aka Sami,

Sisya Sami Karawuhang,

Bapa Suba Polih Wahyu,

Sabdan Ida Hyang Puruça

Bapa Pelih,

Tusing Nunas Kēn Nē Ngelah.

28.     Bapa Cening Kapidukan,

Antuk Ida Sang Hyang Widhi,

Mangda Mangaturang Yadnya,

Bhuta Dewa Yadnya Kawuwus,

Ngaturang Guru Piduka,

Keto Cening,

Sabdan Ida Maring Bapa.

PUPUH DURMA

29.     Wēnten Sisya Sada Ngowed Matur Sembah,

Nika Patut Kamarginin,

Nganutin Agama,

Yadnyanē Kahutamayang,

Mangda Sida Manggih Trepti,

Nēnten Kirang,

Sandang Pangan Maring Gumi,

30.     Yēning Kēto Bawos Cening Tekēn Bapa,

Yadnyanē Margiang Jani,

Ring Dēwasa Melah,

Mangda Sida Labda Karya,

Jani Cening Jwa Makinkin,

Eda Obah,

Pageh Sajroning Hati,

31.     Ritatkala Ida Sang Rçi Nangun Yadnya,

Bhuta Yadnya Kang Kinardi,

Katurin Ring Kala,

Dēwa Yadnya Kamargiang,

Katur Maring Dēwa Sami,

Para pandita,

Nguncarang Wēdästuti.

32.     Ida Sang Rçi Markandēya Mangastawa,

Nunas Iwang Ring Hyang Widhi,

Mrana Mangda Sirna,

Dēning Sampun Icēn Tatedan,

Mantuk Kita da Nyengkalanin,

Yēning Kirang,

Jinah Satak Slawē Tuku Malih.

33.     DēwaYadnya Sanē Mangkin Kahaturang,

Katur Maring Dēwa Sami,

Sida Dirga Yusa,

Tan Ngēwehin Salwir Karya,

Sida Landuh Jagat Sami,

Ida Lēdang,

Aluh Teka Asing Alih.

PUPUH  SINOM

34.     Puput Mengaturang Yadnya,

Guru Piduka Minekadi,

Ida Sang Rçi Mangandika,

Maring Sisya Maka Sami,

Ngabas Alas Uling Mani,

Madak Sida Mangguh Ayu,

Anging Tetep Pang Waspada,

Wirēh Alas Madurgami,

Pada Lesu,

Mani Semeng Ngabas Alas.

35.     Sagēt Suba Pasemengan,

Sang Hyang Rawi Sampun Mijil,

Sisya Sami Nerebek Alas,

Ada Netek Ada Ngandik,

Makedas Kedas Nunjelin,

Ida Reçi Ledang Kahyun,

Ngabas Alas Uli Kelod,

Tanggun Kaja Tumus Mangkin,

Lingah Sampun,

Alasē Sanē KaAbas.

36.     Saking Panugrahan Embang,

Nēnten Wēnten Sisya Gering,

Ngabas Alas Nemu Baya,

Sisya Sami Kaedumin,

Pekarangan Tegal Carik,

Edumanē Wantah Patuh,

Mendem Kendi Misi Toya,

Emas Mirah Sanē Luwih,

Panca Datu,

Perak Tembaga Sa Upakara.

37.     Puput Mendem Pedagingan,

Sang Reçi Ngandika Malih,

Uduh Dēwa Sisyan Bapa,

Tongos Jani Kaadanin,

Dēsa Basukih Karanin,

Apa Krana Basukih Kawuwus,

Wirēh Cening Mrasa Bagya,

Tan Kirang Pangan Sandang Malih,

Keto Tuhu,

Madak Swēca Sang HYang Embang.

38.     Awig-awig Ngedum Tanah,

Puakan Jani Kaadanin,

Awig awig lan tekekang,

Apang Rahayu Sareng Sami,

Sai Ngerastiti Widhi,

Mangda Sida Mangguh Hayu,

Medasar Ban Panca Yadnya,

Anggon Dasar Jroning Hurip,

Pica Hayu,

Seger Inih Masekaya.

PUPUH MASKUMAMBANG

39.     Maha Reçi Markandēya Nangun Kērthi,

Pageh Maring Manah,

Nēnten Purun Manempalin,

Titah Sang HYang Jagatnatha.

40.     Kagentosin Parab Ida Maha Reçi,

Hyang Nerada Tapa,

Panugrahan Laksmi Dēwi,

Kangken Putra Catur Sanak.

41.     Wēnten Titah Hyang Jagatkrana Ring Sang Rçi,

Ngardi Kerahajengan,

Ngelēdangin Kancan Hurip,

Mwastu Katah Ngelah Sisya,

42.     Maha Reçi Pageh Ngamong Dharma Budhi,

Sisyan Ida Katah,

Maka Sami Lintang Bhakti,

Yogi Markandēya Puspata.

P’Goeg, Peguyangan Kangin

Malih Wēnten lanturanē……………Pungkuran

Maret 2003