GAGURITAN SIRA PANDYA

 

PANGAKSAMA :

 

SINOM

          Swasti Astu Atur Tityang, Rijeng Sang Hyang Saraswati, Asung Kreta Wara Nugraha, Mwastu Sida Weh Penguning, Ring Daging Kasurat Driki, Kadi Ring Prasasti Mungguh, Maka Sukat Sikut Pandya, Wantah Mawit Yasa Kerthi, Sane Mungguh, Ngawe Degdeg Paripurna.

 

          Awignam  Astu Namosidem, Asung Pakulun Nyunarin, Bhatara Raksakeng Jagat, Sweca Paduka Nglugrahin, Kadi Langgya Titiang Nganggit, Babad Angge Tityang Kidung, Wit Manah Tityange Sarat, Ngurukang Sikian Sujati, Kadi Purun, Ngetus Babad Sira Pandya.

         

 

          Tityang Mamitang Lugraha, Ring Sang Ngawacen Puniki, Kadi Purun Tityang Pongah, Nganggit Gita Kadi Mangkin, Pupuh Bawos Nyalit Indik, Lipya Ring Sikiane Punggung, Gung Sarat Panglungsur Tityang, Sweca Ida Dane Sami, Mogi Ratu, Prama Ledang Ngampurayang.

PAMAHBAH :

PUPUH GINADA

1.                 Ne Mangkin Kawitin Tityang, Daging Babade Puniki, Pakilitan Ring Kawitan, Sane Mungguh Mangda Kukuh, Dening Sampun Keiket Dresta, Manut Kadi, Kabawos Ring Daging Lontar.

2.                 Wenten Kabawos Ring Lontar, Indik Srana Ngagem Bhakti, Ento Stata Kabuatang, Mangda Sida Tatas Tuhu, Majeng Ring Para Kawitan , Gulis Sahi, Bhisama Babad Pandya.

3.                 Sane Mungguh Kabawosang, Pretisantana-Pang Uning, Maring Lalintihan Punika, Ngiket Pemargin Laluhur, Sane Anggen Titi Pangancan, Manut Kadi, Kula Dresta Kahuripan.

4.                 Makrana Patut Saratang,  Telebang Bulak Balikin, Punika Sujati Tamba, Panglukatan Sarwa Kewuh, Panyapuh Wara Bancana,                Ne Matitis, Nuju Huripe Subagya.

5.                 Manut Daging ne Punika, Mungguh Sajroning Prasasti, Pupulang Makudang Babad, Kadi Kabawos Ring Ungkur, Prasasti Pande Beratan, Wenten Malih, Prasasti Pande Kamasan.

6.                 Nglantur Mangkin Kabawosang, Wenten Babad Pande Besi, Malih Ring Prasasti Tusan, Prasasti Pandeya Capung, Metwang Akeh Carang – carang, Sane Mawit, Asiki Ngunggahang Samah.

7.                 Majalaran Babad Punika, Mangda Nglimbak Maka Sami, Saterehing Warga Pandya, Sida Raket Rawuh Pungkur, Eling Ring Ida Kawitan, Sida Malih, Mapica Margi Sane Antar.

8.                 Sane Patut  Kaelingang, Akeh Pisan Kanggen Margi, Sajroning Babad Mungguh, Agem Anggen  Pamikukuh, Mangda Jati, Maka Piranti Ring Bhisama.    

 

D U R M A

9.                 Kacrita Sang Brahmana Ring Jawadwipa, Dahat Kasub Duke Nguni, Uttama Sabwana, Saksat Sang Hyang Mahadewa, Jroning Wiguna Mwah Sakti, Wicaksana, Patut Ngabih Jagat Keling.

10.            Nenten Lian Parab Ida Sang Inucap, Dang Hyang Bajrasatwa Yukti, Ida Lwih Wiguna, Patut Dados Sakan Jagat, Weda Tarka Puput Wyakti, Salawasnya, Mamuktiang Suka Trepti.

11.            Ida Raris Kanikayang Nangun Yoga, Patut Ruwat Jroning Hurip,            Ida Mangiringang, Pituduh Sang Hyang Mahadewa, Ngelarang Yoga Semadhi, Nunas Ica, Pikenohnya Jroning Hurip.

12.            Saking Teleb Ida Ngelarang Payogan, Ngiring Sapituduh Yukti,           Sang Hyang Mahadewa, Wastu Wenten Kedep Cihna, Marupa Lawat Dahat Lwih, Kahredana, Dados Anak Alit Rwang Diri.

13.            Rupa Samplah Anak Alite Punika, Lwir Narayana Makalih, Lwihing Uttama,  Sampun Pradnyan Tur Wisesa, Kadi Bajrasatwa Sakti, Sapunika, Munggwing Cihna Kayogain.

14.            Mangkin Warna Anak Alite Bawosang, Alep Bagus Ida Wyakti, Ida Mapesengan, Dang Hyang Tunuhun Duwuran, Dwijendra Rajakreta Alitan, Maka Ruwa, Katuduhang Nangun Smadi.

15.            Manut Agem Putra Sesana Satwayang, Dharmaning Putra Sujati, Riguru Rupaka, Bhakti Ragane Aturang, Budhi tan Paro Kalih, SapunikaNgamargiang Tuduh Aji.

16.            Daging Tuduhe Nikayang Nangun Yoga, Sareng Kalih Raris Smadi,  Maka Unteng Wantah, Nunas Ica Kelanduhang,  Mangda Degdeg Jagat Sami, Kerahayuan, Amongan Sang Brahmana Jati.

17.            Saking Langgeng Tur Pageh Ida Mayoga, Asing-asing Nangun Smadi, Nunas Wara Nugraha, Dang Hyang Tinuhun Ngredana, Antuk Teleb Nangun Kerthi, Medal Putra, Lanang-lanang Limang Diri.

G I N A N T I

18.            Putran Ida Dang Hyang Tinuhun, Mpu Gnijaya Kaping Siki,             Mpu Semeru Arin Ida, Mpu Gana Kaping Trini, Kaping Empat Mpu Kuturan, Mpu Baradah Pinih Alit.

19.            Kawentenan Para Sunu, Sami Sampun Kawastonin, Kaicen Waranugraha, Mangda Sida Sami Bresih, Nglantur Ngelanduhang Jagat, Kalih Kulawarga Sami.

20.            Dwijendra Rajakreta Kawuwus, Puguh Stata Nglarang Smadi, Cumpu Manah Mangda Nglimbak, Ngelarang Yoga tan Sipi, Sakeng Langgeng Gagelaran, Sida Raris Mapikolih.

21.            Pikolih Mangkin Kawuwus, Pangredana Embas Raris, Santana Ida Tatiga, Kadi Kabawos Puniki, Kapertama  Mpu Bubuksah, Kaping Rwa Gagakaking.

22.            Kawentenan Kalih Iku, Maka  Sakan Tanah Keling, Ngagem Tattwa Çiwa Budha, Susila lan Tata Titi, Nglimbakang Tutur Agama, Punika Unteng Sujati.

23.            Mangda Tinglas Ring Sasuduk, Nanging Ampurayang Ugi, Antuk Banget Tunan Titiang, Pacang Sida jaga Becik, Munjuk Lungsur Atur Titiang, Purun Ngepah Babad Niki.

24.            Mangkin Warna Hyang Sinuhun, Maka Sunu Kaping Trini, Ndatan lian parab Ida, Mpu Brahma Wisesa Yukti, Uttama maring Jagat, Ngemanggehang Tutur Aji.

25.            Majalaran-ntuk Sasuluh, Micayang Galang ri Hati, Patut Dados Sakan Jagat, Uttama Wiguna Luwih, Sesana Sastra Agama, Ngawe Dedeg Gotra Sami.

26.            Ring Jagat Jawi Ida Tedun, Ketepeng Reges Malinggih, Kasungkemin  Antuk Krama, Ngelimbakang Tata Titi, Ngwikanin Ring Daging Jagat, Sida Raris Ngawe Trepti.

27.            Sedana Antuk Sasuluh, Maring Tattwa Gama Yukti, Ngupadi Kerahayuan, Maka Gagelaran Pasti, Empu Brahma Wisesa,  Manados Sima Sungkemin.

SINOM

28.            Nglantur Mangkin Pidartayang, Pretisantana Ida Lwih, Empas Saking Yogajnana, Ngawisesa Sada Sidi, Pangredana Sampun Pasti, Unteng Ngupadi Rahayu, Nenten Teos Parad Ida, Mpu Jaya Saguna Wyakti, Uttama Sadu, Malinggih Ring Tumapel Ida.

29.            Nganut Daging Peplajahan, Kapica Antuk I Aji, Salwir Tattwa Gagelaran, Prawretti Sajroning Urip, Stata Gambel Apang Sai, Mangda Mamanggih Rahayu, Nincap Tutur Kapramartan, Taler Aksara Uttama, Sami Iku, Maka Daging Kadyatmikan.

30.            Maka Unteng Gagelaran, Mangda Pageh Ngamong Budhi, Tattwa Lwih Maka Sasana, Trikaya Parisudha Malih, Prawretti Kalaning Hurip, Stata Anggen Sasuluh, Punika Limbakang Ida, Ida Kasungkemin Raris, Keto Tuhu, Gaglar Ida Maring Jagat.

31.            Selamin Ida Mayoga, Ring Tumapel Maka Linggih, Saking Teleb Pangredana, Mwstu Sida Lwir Kaapti,  Maka Unteng Ngawe Trepti, Pratisentana Kapungkur, Limbakang Sajroning Tattwa, Anggen Sarana Piranti, Kadi Iku Dagingnyane Uttama Pisan.

32.            Malarapan Pageh Ida, Nyungkemin Ana Pawisik, Sida Raris Embas Putra, Wentennyane Tigang Diri, Maka Tiga Lanang Sami, Saksat Tripurusa Iku, indik Kawikane Nyekala, Gagelaran Tattwa Aji,            Sami Iku, Kadi Brahmana Uttma.

33.            Maka Tiga Putra Inucap, Gelis Duwur Maka Sami, Katuduhang Nunas Ajah, Mangda Sida Ngamong Budhi, Daging Tutur Tattwa Aji, Gelar Sang Meraga Putus, Sampun Nyusup Ring Adnyana, Nunas Ajah Nenten Lami, Maka Guru, Ida Sri Mpu Jaya Saguna.

34.            Mangkin Warnan Putran Ida, Tan Lian Maka Pepasih, Pinih Duwur Mpu Brahmaraja Mpu Çiwaguna Kaping Kalih, Empu Ganring Pinih Alit, Angganing Meraga Putus, Kawijnana Ida Nirmala, Weruh Maring Tattwa Sami, Sampun Nyusup, Sat Keris Manjing Urangka.

35.            Punggelang Punang Carita, Caritayang Ida Mangkin, Ida Çri Mpu Brahmaraja, Matilar Ida Ne Mangkin, Jagat Madura Ka Ungsi, Rehning  Pangulenge Puput, Irika Ngwangun Pasraman, Ngelarang Brata Semadi, Jnana Kasub, Taler Sampun Sidi Mantra.

36.            Ne Mangkin Uningang Tityang, Munggwing Ida Ngentos Pepasih, Mangkin Ida Mabhiseka, Begawan Pandya Bhumi Sakti, Dening Wikan Ida Wyakti, Ring Agandring Mwah Anggaluh, Sahanan Prabot Sane Mangan, Pepayasan Minakadi, Binan Ipun, Busanan Ida Sang Nata.

37.            Mangda Sida Jati Tatas, Walinin Tityang Sane Mangkin, Sane Kabawos Punika, Agandring Napi Sawyakti, Tan lian Maka Uttami, Makarya Sarwa Srana Tuhu, Keris Tumbak Muwah Timpas, Malih Anggaluh Bawosang, Srana Antuk Mule-mule Emas Perak.

GINADA

38.            Lanturang Mangkin Bawosang, Putran Ida Kaping Kalih, Ida Mpu Çiwa Saguna, Ring Tumapel Ida Lungguh, Kasub Kasidyaning Jnana, Wyakti Luwih, Mawastu Kasub Kajana.

39.            Kadudut Kayune Sarat, Mwastu Sareng Ida Agandring, Mawasana Antuk Jnana, Sarwa Landep Ngawit Dumun, Minakadi Maka Karya, Bajra Keris, Tumbak Miwah Triçula.

40.            Malih Aturang Indik Srana, Sedanan Idane Ngardi, Sakalwir Sane Inucap, Sida Raris Mangguh Wibuh, Jangkep Boga Upaboga, Sampun Molih, Maka Apti Ring Laksana.

41.            Melarapan Antuk Jnana, Ngardi Maka Apti Jati, Kadi Sampun Kabawosang, Sarwa Prabot Sane Mungguh, Sida Mangguh Kawigunan, Salwir Apti, Kautaman Ring Sarira.

42.            Kasidyaning Maka Jnana,  Sida Metu lwir Kaapti, Maka Srana ring Pekaryan, Kadi Kabawos Ring Ungkur, Geni Medal Saking Jnana, Malih Sepit, Saking Jriji Tangan Ida.

43.            Malih Kadi Sane Lian, Palu Antuk Tangan Yukti, Gupinda Antuk Nara, Yan Handaesan antuk Pupu, Asapunika wenten Ida, Lwiring Sakti, Sri Empu Çiwa Saguna.

44.            Mangkin Lanturang Bawasang, Semeton Ida Pinih Alit,Malinggih Ring Lalumbang, Angganing Pandita Pupus, Sidi Mantra Weda Jnana, Mande Besi, Kancan Prabot Mangan – Mangan.

45.            Punika Gaglaran Ida, Mpu Gandring Maka Pepasih, Pateh Mungwing Swakarya, Ngrajegang Pande Besi, Dening Sakti Mandra Guna, Mapikolih, Asing Apti Sida Janten.

Jaya Prana

46.            Rikalan Ida Makarya, Kadi Nungkul Sanghyang Kali, Sane Ngaput Unteng Manah, Manahe Raris Kaliput, Metu Manah Parikosa, Tur Mamurti, Ngawe Raris Nemu Baya.

47.            Melarapan Swakaryan Ida, Kadi Ida Empu Gandring, Mwastu Lampus Antuk Srana, Maka Keris Ida Tuhu, Katuwek Antuk Ken Arok, Nika Raris, Pemastune Kamargiang.

48.            Maka Daging Pastun Ipun, Katiwakang Maring Keris, Mangda Sida Polih Genah, Nyedayang Pitung Preratu, Rauh Malih Ring Sentana, Sida Molih, Genah Maring Swarga Loka.

Mpu Çiwa Saguna Ke Bali

 

PANGKUR

49.            Punggelang Punang Carita, Kacritayang, Ring Tumapel Ne Mangkin, Munggwing Ida  Çri Empu, Kayun Ida Pacang Lunga, Ngredana, Bhatara Ring Gunung Agung, Mawinan Pacang Matinggal, Pangungsine Jagat Bali.

50.            Tutuwek Ninggal Pasraman, Ida Pacang , Nangun Yoga Semadi, Raris Tangkil Ring Sinuhun, Çri Empu Jaya Saguna, Mangda Ledang, Micayang Pengarep Lan Nunas Waranugraha, Raris Ngelungsur Mapamit.

51.            Penyawis Ida Uningang, Ida Çri Empu, Jaya Saguna Luwih, Ring Çiwa Saguna Sunu, Micayang Pawarah Warah, Mangda Tinglas, Tur Tumus Sajroning Kayun, Punika Maka Sedana, Dagingnya Sapuniki, 

MASKUMAMBANG

52.            Uduh Nanak, Çiwa Saguna Putran Aji, Aji Prama Ledang, Wireh Ada Idep Cening, Nincap Daging Kapanditan.

53.            Melah Pireng, Piteket Bapane Jani, Eda Sumangsaya, Mangda Cening Stata Eling, Bacakan Rwa Bineda.

54.            Ene Ada, Dharmaning Kapanditan Buin, Patut Gega Nanak, Yan Sida Laut Kukuhin, Eda Mrihang Artha Brana.

55.            Eda Pesan, Melaksana Ane Culig, Ngawe Gedeg Anak, Kaparamartan Ulati, Patut Pisan Utamayang.

56.            Keto Nanak, Pinehang Piteket Aji, Apang Stata Pageh, Ring Swagina Mande Besi, Mwah Akarya Mande Emas.

57.            Patut Tatas, Kecap Dharma Kepanditan, Lan Batur Kamulan. Patut Masih Kauningin, Pang Tan Lempas ring Sasana.

58.            Mwah Ada, Tutur Bapa Maring Nanak, Madan Gagelaran, Ane Patut Nanak Uning, Ento Panca Bayu Wantah.

59.            Kabawosang, Panca Bayu Kaping Singgih, Prana lan Apana, Samana Udana Malih, Kaping Untat Madan Bhyana.

60.            Bacakannya, Ento Sami sane Yukti, Munggwing Tegesannya, Jani Bapa Minterangin, Nging Tatasang Apang Tinglas.

61.            Yan Apana, Jambangan Waduknya Mijil, Prana Bayu Madan, Ring Peparu Tosning Mijil, Ento Maka Pangubaban.

62.            Yan Samana, Bayu Metu Saking Hati, Geni Maring Raga, Nunggun Langgeng Maka Hurip, Ngawe degdeg Jroning Manah.

63.            Ring Udhana, Saking Ciwadwara Mijil, Sat Pinaka Uyah, Sane Ngawe Becik, Munduhang Rasa Pengrasa.

64.            Kaping Untat, Maka Bhyana Kahuningin, Embas Maring Roma, Raris Jenek Maring Pupu, Ento Menadi Landesan.

65.            Sapunika, Daging Warah Anak Lingsir, Maring Putran Ida, Sane Pacang Nunas pamit, Ngaturang Pangastungkara.

66.            Nenten Warna, Munggwing Ida Ring Pemargi, Mangkin Caritayang, Sampung Napak Jagat Bali, Manut kadi Unteng Manah.

GINANTI

67.            Sampun Kadi Hyang Pituduh, Wenten Raris Nuntun Margi, Sat Pinaka Asih Ida, Idedalu Deleg Malih, Sane Stata manuduhang, Maka Margi Ne Keapti.

68.            Pemargin Ida Sang Wiku, Ngungsi Genah Ring Besakih, Nemonin Sasih Kartika, Rahinane Lintang Becik, Kliwon Dina Saniscara, Landep maka Wuku Yukti.

69.            Dina Becik ne Kawuwus, Ayat Nglarang Yoga Smadi, Kala Ida Mangastawa, Bhatara Ring Toh Langkir, Sang Hyang Catur Loka Phala, Lantur Ngewangun Pelinggih.

70.            Wantah rawuh driki dumun, Lanturnyane Benjang Malih, Dumugi Tan Kapiambeng, Ampurayang Ratu Sami, Kawimudane Kalintang, Kawawa ntuk Seneng Ngurit.