GAGURITAN SUDHAMALA II

I  PUPUH SINOM

1.            Om Swasti Astu Ya Nama,

Ainggih, Mlarapan antuk, Puja Pengastawan tityang majeng ring bukpadan Ida Hyang hyanging sinembah, dumogi sida raris  mangguh kasidan antuk pangendan Ida,

Om Swastiastu

Ratu Sang Hyang Saraswati,

Ping kalih Pangubhaktin Manah rauhang tityang majeng ring Ida Hyang hyanging Çastra, Ida Sang Hyang Aji Saraswati,

Mangkin Tityang Ngurit Gita,

Mawit saking pangendan Ida, parasida raris tityang nglukun tur kasinurat munggwing daging gagitane puniki,

Sudamala Murdan Gending,

Boya wenten sios maka murdha wakya sajroning gagitane, inggih punika   Sudamala,

Anggen Suluh Krama Sami,

Ping kalih maka tetuwek manah, mangda wenten anggen piranti, sasuluh, antuk para jana,  risajroning kantun nuluh rurung mahuripe,

Ledang Ratu Mangkin Tedun,

Taler nenten lali tunas tityang, hyun ledang cokorIratu mangda nyuryanin sedaging jagate sami,

Nuntun Tityang Megegitan,

Mawesana antuk maiceyang panuntun ring damuh kalintang tambet, jugul, tur kedeh pisan murnayang manah kawesanang antuk gegitan,

Mogi Sida Paripurna,

Sadaging pengaptyan manah, mangda sida sidaning don,

Kirang Langkung,

Ledang Ugi ngampurayang.

Antuk punika nenten  lali  taler lungsur tityang sapekirange, mnawita tuna  basa, basa basita, anggah ungguh basa, sane mawit kawimudan tityang, ingih malih pisan lungsurang tityang  Gung Rna Amppura,

2.            Ida Hyang Bhatara Çiwa,

Inggih Ratu Ida Dane Pamiarsa sinareng sami, maka Purwaning Gagitane puniki, bilih-bilih sane maka pakebat nguningayang  Ida Bhatara Çiwa,

Mapi Sungkan Rahat Gati,

Cinarita   Sada kala Ida Katiben pinungkan sane abot pisan,

Uduh Adi Dewi Uma,

Semalihe Ida gumana pacang ngrentehang pawecana sane katiba ring Pramiswarin Ida, daging renteh bawos Ida, Uduh Adi, Adi Sang ajegeg tempekan beli anake buka Idewa,

Rerehang Ja Tamban Beli,

Beli ane jani kudu mabuwat kading kapiolasan Idewane, dening tan sida baan beli nanggenin  kerahatan sungkane nibenin beli,

Empehan Lembu ne Putih,

Mapuara te kadi kapiolasan Idewa?, ngisinin pangedih Beline, twara ja len buka basan tamban beline, twah nto Empehan Lembu Putih,

Dewi Uma Raris Matur,

Riwawu kapiragi tur Kapiarsa daging renteh wecanan Ida Bhatara Çiwa  asapunika, Raris Ida Dewi Uma matur saha  madulur sembah,

Titah Ratu Pundut Tityang,

Inggih, Munggwing asapunika Ratu, Sedaging tel wecana, pituduh sane katiba ring Tityang maka tempekan Iratu pacang marginin tityang, atepung miber tyang tan purun tempal,

Hyang Uma Raris Memargi,

Kawawa Antuk parikedeh Hyun Ida Hyang Uma, mangda sida digelis nagingin Papekon Ida Hyang Çiwa, ngeriyinin antuk nunas mapamit, raris ngentap pemargi,

Tur Kacunduk,

I Pengangon ring Tegalan.

Tan Kaceritanen ring pemargi, satsat mapelinggihan Kahyun Ida, jumujug tur parasida raris mapanggih I juru pengangon  ring tegalan sane jimbar, semaliha tunggil lembune mewarna Petak.

II PUH PANGKUR

1,            Hyang Uma Gelis Mapajar,

Risampune tampek ring genah I Juru Pengangon, ngawitin Ida Hyang Uma ngaturang maka pabuwat manah, dening purun ngrauhin mriki ring genah  Jro Pengangon,

Icen tityang Numbas Empehane Kedik,

Parikedeh Hyun Ida Kahuningin, larapane sida polih empehan Lembu, yadyastun  antuk numbas,

I Pengangon Nimbal Wuwus 

Wawu asapunika, turmaning dening sampun kepikahyun antuk I Pengangon tetuwek sang rawuh, irika raris I Pengangon ngwentenang atur,

Tityang Ten Ngadol Empehan,

Daging Atur I Pengangon, Inggih Jro, Jro Anak Istri luwih, kadi pengaptin manah Jrone pacang numbas empehan Lembun tityang, ampura! boya ja driki genah numbas, tur tityang tan ngadol empehan lembun  tiyange,

Durus Ambil Nanging Picayang Panyilur,

Nanging yan Jrone parikedeh pisan mangda polih, pacang dagingin tityang, Sakewala, tityang nunas mangda wenten taler sane kedehang tityang,

Ngiring Matemu Semara,

Jro sampun Ngwikanin indiknyane, wenten mekalihan driki ring tegalan sane suwung sepi, yan kangkat, tan panjang atur tityang, jrone iring  tityang Matemu Semara,

Diastu Pisan Ten Punapi.

Yan Prasida jrone, jaga lascaryang tityang jrone muat empehan lembun tityang, Inggih tan punapi yadyastu apisan.

2.            Dewi Uma Duka Pisan,

Riwawu asapunika pajar I Pengangon, tan gigisan menggah  Bendu pekahyunan Ida Hyang Uma,

Caai Pengangon Eda Ngawag Mamunyi,

Madulur matbat, nuding kiwa tengen, saha bawos, “Ih Cai Pengangon, Nista kaliwat letuh budi, pamunyin Ibane”,

Apang Iba Nawang Unduk,

Buina kai jani natasang tken Iba, apanga saja Iba nawang sulur, unduk, nyen maka sujatine kai,

Kai Ene Hyang Bhatara,

Apang Iba sengeh tken pedewekan nah, buina kai tuara len Pragayan Hyang ane patut Singgihang Iba,

I Pengangon Nyawis,Dyapi Dewa Agung,

Dyapin Sira ke ragane, tyang Sing taen Pamrih teken ragane, to mara mraga Hyang Akuin Ragane, tyang dini disekala yadyapi Dewa Agung, tyang ing jejeh, kaden ragane ane pamrih tken tyang,

Yen Jro Ten Kahyun Ring Tityang,

To ngudyang tyang dadi repot, bantas mapengedih amonto, buina ada penukarne,

Empehane Ten Katurin.

Bawak tyang nyatwa, nyen sampun ten nagingin Pinunas tyange, tyang tan mabudi ane lenan, keto masih empehan tyange wangde katur. ( to Kto gen, Sing perlu panjang lebar ngrawos )

III  PUPUH SINOM

1.            Hyang Uma Nimbang Ring Angen,

Sada lami wyakti Hyang Uma ngayun-ngayunin indik punika, tur sane banget ngewawa pekahyunan Ida, wantah pepekon Ida Hyang  Çiwa, muatang pisan empehan lembu, ngantos linglung Ida,

Arsan Pengangon Kedagingin

Dening rumasa Kaselek manah Hyang Uma tur kawawa antuk daging papekon Ida Hyang Çiwa, mawastu kedagingin raris pekarsan I Pengangon,

Raris Katuran Empehan,

Taler I Pengangon sampun presida molihang kadi unteng babuate, presida muponin keliayangan, mawasana empehan lembune katur ring Ida Hyang Uma,

Pengangon Matilar Gelis,

                     Tur sada magebras gegisonan memargi I Pengangon matinggal saking genahe punika,

Dados Hyang Çiwa mawali,

                     Tan doh petilar I Pengangon saking genahe iwawu, antuk Pangregep Ida wastu premangkin mewali Prebawan Ida dados Hyang Çiwa,

Hyang Uma Ring Swarga Rawuh,

Mangkin Caritayang Ida Hyang Uma sampun rawuh ring Swarga, jumujug ring Linggih  Ida HYang Çiwa,

Gelis Ngaturang Empehan,

                     Gumana pacang ngaturang tamba utawi empehan sane buatang Ida,

Sang Hyang Çiwa manakenin,

                     Kaaturang Basan Tamba, utawi empehan punika  antuk Hyang Uma, lantur  renteh pengandikan Ida Hyang  Çiwa, tetuwek wecanane natasang pariindik,

Adi Ayu,

Dija ke Maan Empehan.

                     Daging bawos Ida Nah Adi, Adi Sang Jegeg Idewa, yaning kopa dados Beli uning, ring dija keniang adi basa tamban beline.

IV  PUPUH GINADA

1.            Dewi Uma  Ngeka Naya,

                     Antuk Paritetes mewit ring Ida Hyang Çiwa, rumasa blegbegan Ida Hyang Uma, lantur ngrincikang winaya, kadi mawesana  Linyok ature,

Tityang Polih Tamban Beli,

                     Sapuniki atur Ida HYang Uma, Inggih Beli, wenten tel pengandikan beli  nakenang indik kamolihan tityang boya teos asapuniki bli,

Ring Pengangon Tityang Numbas,

                     Sakawentene tamban Beli polihang tityang wantah masedana antuk tityang numbas ring I Pengangon, sane cundukang tityang ring genahe ngangon,

Hyang Çiwa raris mawuwus,

                     Malih renteh wecanan Ida Hyang Çiwa, Duh adi, adi Hyang Uma, Yan Sing Pelih mirib Penarkan beli ada mimpas sengguhang beli atur Idewane, Nah pang Sing beli nyatwa tuara ada bukti, nyantos malu Idewa,

Uduh Cening Sang HYang Gana,

                     Ne ada Pabuktyan Beline, I Cening HYang Gana Bakal tanginin beli, Mirib twara ja mimpas baana I Cening Narka buat paridabdab Idewane ngulati Tamban Beline,

Dong Tenungin,

Kenken Unduk Ne Seken.

Nah Ne te Idewa Cening Hyang Gana, Bapa jani maprih pitulung arepe teken I Dewa,  mapan Idewa sane ngawi wenangan Catur Wariga Tenunge, gumanti seken baana natasang buka paridabdab byang Idewane disekala.

2.            Sang HYang Gana Ngambil Lontar,

Sada Gagisonan Sang Hyang Gana ngiringin pituduh Ajin Idane, saha ngambil cakepan Lontar,

Solah Biange Kaaksi,

                     Tur pastika asing-asing paridabdab Hyang Uma  ring jagat Sekala tinglas antuk ngemidartayang,

Raris Matur Ring Hyang Çiwa,

                     Nglantur ngawentenang atur HYang Gana majeng ring Ajin Idane,

Ring Lontar Titiang Mungguh,

                     Inggih Aji, Manut Ling ning Lontar puniki, ngenenin ring paridabdab Ibiyang duk di Mercapada, boya soes sane kawistara,

Ibu Molihang Empehan,

                     Pamekas risadakala Ibiyang  nyundukang empehan lembu sane pinaka tamban ajine,

Lulut Asih,

Sareng Pengangon ring Tegal.

                     Kadi sane sinahang tityang mewit ring Cakepane puniki, pecak  Ibiyang sida molih, mapikolihe antuk ngelarang pasanggaman, ngadokang smara dudu sareng I Pengangon.

 V  PUPUH DURMA

1.         Wawu punika Hyang Gana Manartayang,

Riwawu asapunika kapiragi Hyang Gana nguningayang daging Tenung ngenenin paridabdab Biyang Ida ring Mayapada,

Dewi Uma Duka Brangti,

                        Mawesana Tan gigisan menggah brangti pekahyunan Ida Hyang Uma,

Praraine Bang,

                        Turmaning Macihna tan kadi-kadi Murkan Idane, majanten  ngantos Baag biying Praraine,

Metu Geni Sakeng Netra ,

                        Dening kawawa antuk bendu Pekahyunanne, tan samandana medal geni ring Peyingakan,

Lontar HYang Gana Kabasmi,

                        Sane tan lian maka wiwit manggih indik puniki, Lontar Hyang Gana mawinan sehanan sane tampek ring linggih Ida, Geseng sami sinarengan ring Geseng nya Lontar Tenung Wariga,

Ngawit Punika

Tenunge Tan Ajeg Yukti.

                        Mapuara ngantos mangkin,  Kawentenan Tenung Wariga gemet tan sida malih parasida kacundukang tur kapucukang  munggwing dagingnyane.

2.         Ida Hyang Bethara Çiwa Duka Pisan,

Ngaksi Indike  asapunika, Ida Hyang Çiwa tan sida antuk nawengin bendu Kahyun Idane, raris mecingak Ida ring Hyang Uma,

Mastu Ida Uma Dewi,

                        Tan Samandana Jah Ta Smat, pemastu katiwakang antuk Ida Hyang Çiwa

Solah Adi Nista,

                        Madulur pangandikan Ida sada sarat pisan, Iih Hyang Uma Nista dama Durbudhi kita,

Buka Solah I Raksasa,

                        ndatan Anuti pratingkah Dewa,  tan sep  kadya Danawa swa laksananta, asapunika bawos Hyang Çiwa,

Wastu Rangda Jani,

                        Mangke tan wurungan kita  anadi Raksasa dening Agung Dosanta,

Bethari Uma,

Manados Rangda Pramangkin.

                        Tan Jangkayan penadosan nya, metu premangkin matiyosan wibawan Ida Hyang Uma, dados Rangda.

  

VI  PUPUH SMARANDHANA

1.         Eling Manados Raksasi,  

Mangkin metu eling Ida Hyang Uma dening Singsal parilaksanan Idane riyin, risampune kerasa anggan Idane  dados Raksasa,

Dewi Uma Nunas Ica,

                        Matungtung antuk Sedih Pekahyune, ngame-ame pacang Nunas keledangan ring Anggan Ida Hyang  Çiwa,

Inggih Beli Dewa Kaot,

                        Daging Pinunas Ida, Inggih Ratu, Ratu Paragayan Hyang hyanging  Sinembah sane Lewih, Utama Iratu,

Ampura Tityang Dursila,

                        Kadi  Tinglas sampun antuk tityang, sajroning parilaksanan tityang wyakti tan patut,

Tuhu Linyok ring Sesana,

                        Smaliha kudu patut sapari bawos Ratu,  tityang tan anut ring Sasanan Para Dewata,

Tityang Nglungsur Swecan Ratu,

                        Yaning kopa dados tityang  nglungsur ledang hyun cokoriratu mapasweca ring dewek ttityang,

Ledang Lukat Malan Tityang,

                        Durus micayang Wara Nugraha, Pangruwatang Leteh Mala Sariran tityang

2.         Hyang Çiwa Masabdha Aris,

Miragyang pinunas Ida Hyang Uma, durus renteh wacanan Ida Hyang Çiwa sada Ban-ban, alon pisan,

Ento Mula Pala Karma,

                        Pitwas pisan wacanan Ida, Nah Adi, Adi Bhtari Uma, Beli tan sidha murungan Sapa, dening nto mula mawit saking  Karman Idewane,

Durga Adan Adi Reko,

                        Buina ngawit jani, Idewa tan patut  mapesengan Dewi Uma, sandang  melah  nganutin  wibawan Idewane, Idewa Mapepasih Dewi Durga,

Ring Setra Gandamayu meneng,

                        Lantur Idewa ngawiwenangan wawengkone Setra Gandamayune,

Makelone Roras Tiban,

                        Pawilangan munggwing Sengker galahe, tur ane patut puponin I Dewa masengker Roras Tiban,

Malan Adi Punah Pupug,

                        Yan sampun  nepek kadi sengkere inucap, kadi mewali bhawan Idewane ke jati mula, nanging patut ada panebasne,

Kalukat Sang Sahadewa,

                        Ane sandang Kahyunin I Dewa, Sang sane pinaka Pangruwat Mala Petakan Idewa, twara len  silih tunggil tosning Panca Pandewa, bunina  sane  pinih alit  Sang kawastanin Sahadewa.

VII  PUPUH DURMA

 

1.         Hyang Bhtari Durga Raris ngungsi Setra,

Dening asapunika puguh wecanan Ida Hyang Çiwa, Rumasa lesu ngentap pemargi Ida Hyang Durga mangda parasida rawuh ring genah sane kasudi, inggih punika Telengin Setra Pebajangan,

Abih Buta Buti Sami,

                        Sane kairing antuk para Buta buti ne sami

Sampun Roras Warsa,

                        Gelising Carita, mangkin sampun reke nepek ring sengker utawi panumaya Galahe sane Roras tiban,

Raris Ngutus Kalanjaya,

                        Tandumade nibakang wacana durus nitahang duta Ida Bhatri Durga, sane kangkat dados utusan Kalane sane mawasta Kalanjaya,

Kalantaka Malih Siki,

                        Kasarengin baan I Kala, Kalantaka,

Ka Indraprasta,

Ngurugada SiangWengi.

                        Unteng daging Titah Ida katiba ring Sang Kautus, Mangda  ngungsi Jagat Indraprasta,  Ngurugada, Ngusak asik  jagat Indraprastane tan rerenan, mawastu lemah peteng mangda katiba aro ara.

2.         Dewi Kunti Karangsuk Olih Kalika,

                        Kopa Nepek Risadakala punika,  Ida Dewi Kunti, sampun Karangsukin olih  Babutane sane  tan tyos buta  kalika,

Duka Ring Oka Premangkin,

                        Ngantos tan eling ring Raga, premangkin tanpa sedana Menggah tan gigisan Dukan Ida sane kapetitisang  ring Okan Idane pinih Alit,

Iba Sahadewa,

                        Semaliha Ida Tanpa sangkan tur ngobat abit oka ne saha madulur bawos, Iih  Cai Sahadewa,

Cai Mula Jleme Leteh,

Sing ada dadwa tatelu jleme ane mula stata ngae leteh, tuah Cai ane mekada,

Ngeranayang Uug Gumi,

                        Mapuara Leteh Pejagatane,  byopara tanpa sangkan netehin, nganti genjong jagate,           

Jani Taanang

Sing Buungan Iba Mati.

                        Gde dosa kurang pati saja Iba, Sing buungan Iba Jani Brasta ban Kai.

3.         Sahedewa Raris Kaoros Ka Setra,

                        Nanggenin Indike asapunika, Tan pari wangde Sang Sahadewa kapaid ring pemargi nuju kasetrane,

Tan Wentan Sida Ngalangin,  

Yadyastun uning ring Pariindikane asapunika nanging tan wenten sane purun pacang mialangin,

Ring Kepuh Kabanda,

                        Ngantos rawuh ring Setrane, Ida Sang Sahadewa Kabanda, kategul tekek pisan, ring wit Kepuhe ageng,

Dewi Kunti Mawecana,

                        Drika raris Ida Dewi Kunti sane kerangsukin antuk Babhutane, matur ring sang sane kapisuguhang,

Inggih Ratu Durga Dewi,

                        Daging Atur Ida ne, Ainggih Ratu, ratu Hyang Durga, aksi sembah pangubhaktin tityang,

Durus Medal

Tityang Mengaturang Saji

                        Durus Ratu Medal,  tityang  mekahyunan pedek tangkil ring palungguh Iratu, semaliha pacang wenten sane jagi katur ring Cokor Iratu.

VIII  PUPUH GINADA

1.         Raris Bhuta Bhuti Prapta,

                        Kapiragi atur Ida Dewi Kunti asapunika, kariyinan antuk para Bregala-bregaline sami medal, dwaning punika maka ancang Ida Bhatari

Sahadewa Tan Ajerih,

                        Nangingke Ngaksi Indike asapunika, Ida sang Sahadewa tan obah pekahyunane, napi malih kebawos jejeh, atepung miber tan wenten kerasayang,

Sampun Nyaluk Sandi Kala,

                        Nguningayang raris sane mangkin, galahe sampun nyaluk Sandi Kala, Sandi Kaon kabawos, utawi Nyrepetang,

Sang Hyang Durga Raris Rawuh,

                        Dening Punika pinaka Galah Ida HYang Durga ayata pacang medal, Nureksain pejagatane,

Para Sisyane Katitah,

                        Risampune ke aksi turmaning sampun nampyak para Bhuta bhuti pengabihe sami, irika raris nibakang tuduh

Ngelus Tali,

Panegulan Sahadewa.

                        Daging Titah Ida Hyang Durga, sane katiba ring Sisyan Idane, mangda ngelus tali panegul Sang Sahadewa.

2.         Dewi Durga Mawecana,

                        Mangkin Raris Ngrentehang Pangandika Ida kadi wenten  pebuat Ida HYang Durga, sane katiba  ring Sang Sahadewa,        

Apang Cening Tatas Uning,

                        Daging Wecanan Ida, Uduh Cening, Cening  Sahadewa anake buka cening, apang Idewa seken nawang, kene nyen Undukne?

Manira Ngeka Upaya,

                        Nak Mula Manira ane ngrincikang winaya,wiweke ne ene, gumanti ada ane sandang prihang manira kading Idewa,

Apang Cening Enggal Rawuh,

Ane buka pabuwat Manirane, apang kudu Idewa enggal sida Rawuh,

Manira Makelo Kalaran,

                        Dening Suba Telah rasa, Sengker Galahe ane Roras Tiban jalanang Manira, Tur stata  merasa kajengah-jengah, Buina ada Pamuwus Ida Hyang Çiwa, wantah Idewa parasida Ngruwatang,

Enggal Jani,

Lukat Mala Papan Nira,

                        Mawit Ento Cening! Dadi pengedih Manira, Enggal Lukat Mala Petaka ane mewit Daging Pastu Ida Bhatara  Çiwa, Apang Sadya Sida Manira Kejati mula.

3.         Raris Matur Sahadewa,

                        Kadi sampun sami kapiragi dagingnyane  iwawu, mawinan ngawentenang atur Sang Sahadewa majeng ring Anggan Ida Bhatari,

Ampura Tityang Bhatari,

                        Ngeriyinin antuk Nunas Gung Ampura, Atur Ida Sang Sahadewa majeng Linggih Ida Hyang,

Tityang Jadma Lintang Tambet,

                        Antuk Parikedeh pisan Pekahyunan  Singgih Bhatari, Napi ke sane prasida aturang tityang?, Kamulan Tityang Jatma Tambet,

Puja Mantra Nenten Weruh,

                        Sampunang bawosanga pacang ngemargiang Panglukatan kadi daging titah Cokoriratu, Puja lan Paos Mantra tityang nenten uning,

Napi Malih Panglukatan,

                        Napi Malih  Nagingin kadi pengapti Hyun Cokoriratu  ngemargiang Panyudamalan, Panglukatan,

Sinampuri,

Tityang Tan Sida Ngiringang.

                        Dening kawawa antuk kawimudan tityang, mnawi tan sida pacang ngiringang kadi pengacep Hyun Cokoriratu, gung ampura lungsur tityang.Ratu, Ratu Hyang Bhatari.

IX  PUPUH DURMA

 1.        Tan Sipi Dukan Ida Bhatari Durga

Kapiarsa asapunika daging atur Sang Sahadewa, mawesana tan gigisan menggah dukan Ida Hyang Bhatari,

Iba Sing Nyak Nglukat Kai,

                        Saha madulur pamuwus, Ih Kenken!, kenken nto Sahadewa, Iba twara nyak   ngisining  buka  pengedih Kaine,

Sandang Dosan Iba,

                        Nah lamun Keto! Sandang Melah ne jani Tandang tandang Dosan Ibane,

Sang Sahadewa Kapapak,

                        Satsat dereng polih pacang nglanturang atur Sang Sahadewa, jeg saget sampun wenten ring arep Ida, Hyang Bhatari ayata nadah, kapungsang pangsing  Sang sahadewa,

Nanging Tan Gored Nyang Kedik,

                        Yadyastun ka ered, ka jekjek, ka pakpak, ka pungsang-pangsing, nanging nenten wenten Ceda, nenten wenten cacad Sang sahadewa,

Reh Hyang Çiwa,

Ngicen Mantra Saking Singid.

                        Mahawinan prasida asapunika sang Sahadewa, dwaning sadurunge  pecak polih panugrahan Mantra Rahasya mawit Ida Hyang Çiwa.

2.         Sahadewa Raris Nguncarang Japa Mantra,

                        Mawesana Eling raris Sang Sahadewa, dening sane riin polih Panugrahan Japa Mantra, tur Makesedana punika premangkin Sang Sahadewa Ngregepang Japa Mantra,

Pamarisudha Linuih,

                        Sajroning Mantra sane kauncarang, Paos lan saka palet mantrane kaciriang antuk Pabersihan, utawai puniki sane kawastanin Pemarisudha,

Dewi Durga Lemet,

                        Miragiang Sang Sahadewa Ngregepang Mantra inucap, tur sampun nyusup ring Anggan Ida Hyang Bhatari, ngantos premangkin lemet anggan Ida ne,

Jeg Pramangkin Tanpa Jiwa,

                        Lemet anggan Ida tan presida nanggenin, mewastu  Lina, Hyang Bhatari,

Layone Nylempang Ring Siti,

                        Kengin Layone kantun nylempang ring tanahe,

Menadak Ical,

Manados Entikan Gumi.

                        Tan asuwe layon Idane wenten irika, jeg premangkin sirna, tur tan kahuningan Icale punika, mewastu wenten Wit sane mentik ring genah layone iwawu.

X  PUPUH GINANTI

1.         Rah Ida Dados Tulud Nyuh,

                        Sahanan entik entikan sane wenetn ring genahe punika, pecak sane mewit saking layon Ida Hyang Bhatari, lwire Tulud Nyuh, penadosane saking Rah Idane,

Miwah Dados Sekar Mitir,

                        Tiyos wenten dados sekar, sane ketah sampun kahuningin, inggih punika sekar gemitir,

Susu Dados Pisang Saba,

                        Malih sarwa buah, utawi pisang saba ne, penadosane saking Susun Ida Hyang Bhatari,

Galih Dados Tebu Salit,

                        Sane mewit saking kehanan Galih, utawi tulang Idane dados wit tebu sala,

Nika Srana Pitra Yadnya,

                        Makasami  bacakan sane kahaturang iwawu, makawiwit Layon Ida Bhatari, sekar lan pala malih tebune, kacumawisang ring srana Upakara Pitra,

Manganutin Çastra Dresti.

                        Tur Paos ngenenin Srana nganutin   sane munggah ring cakepan utawi  Çastra Drestane.

2.         Hyang Uma Nylantara Pangguh,

                                    Punggelang kata punang carita, Sawetarayang ring kawentenane punika, Ida Hyang Dewi Uma rawuh jumeleg,

            Mawecana Halus Banban,

                                    Madulur renteh wecanan Ida Sane Nyunyur manis dabdab alon,

            Cening Nglukat Malan Nira,

                                    Tatuwian Bawos Ida sane katiba ring Sang Sahadewa, Uduh Cening, cening Sahadewa anake kading Idewa, mapuara te anake kadi cening  sida ngicalang mala petakan manirane,

            Nira Ngicen Adan Jani,

                                    Nah! Ngawit Jani, ada pican manirane ane sandang pundut Idewa kapungkur wekas, Idewa Suwud Madan Sahadewa,

            Cening Madan Sudhamala,

                                    Tuwah ane patut sengguhang manira, dening sida ngruwatang leteh mala petakan manirane, Idewa madan       I Sudhamala,

            Wenang Nglukat Mala Sami,

                                    Apa lantas mula Idewa sane sida ngemargiang sehanan Panglukatan leteh, mala petakane makejang.

XI  PUPUH PANGKUR

1.         Raris Rawuh Sang Kalika,

                                    Malih maka iringan Idane Sang Kalika ngenampekin genah I Sudhamala,

            Tityang Nunas Swecan Jerone lewih,

                                    Antuk tegep tur puguh kahyun dane pacang ngaptyang paswecan I Sudhamala,

            Durus Malan Tityang Bancut,

                                    Inggih punika daging pinunase mangda Lara roga, reged nyane kapucehang.

            Mangda Tityang Nirmala,

                                    Gumanti patuh kadi pengaptine, mangda sida nyepukan kenirmalan,

            Sang Sahadewa Manyawis dabdab Halus,

                                    Kengin  Penyawis  Sang Sahadewa, pituas tur banban nyunyur manis,

            Dosan Jero Lintang Ageng,

                                    Maka dagingnyane, duh Jro-jro, peragayan Danawa, yan kene mirib, tan sida baan tyang mapeweweh tulung, rehning kaliwat gde pesan dosan jrone,

            Tan Sida Kalukat Mangkin.

                                    Nanging ampura, Buina yan tan iwang penarkan tityang, meh-mehan tan sida antuk tityang ngruatang mala ptakan jrone.

2.         Sang Kalika Jengah Erang,

                                    Kadi tan sida antuk nanggenin jengah erangnyane Sang Kalika, dening tan purun Sang Sahadewa ngisinin buka pengaptine,

            Yen Cai Tusing Nyak Nglukat Malan Kai,

                                    Nganti ngelur tur nyajag, maimbuh sesuap nyane sada nantangin,

            Satuuh Kaine Hidup,

                                    Buina majarang ane dadi pesangkene, pasungketane ane jani bakat ingetang kai,

            Jeg Mamusuh Ngajak Iba,

                                    Satuuh Kaine mahurip nto anggon kai jalaran, apang stata matungkas,mamusuh ngajak Iba,

            Sahadewa, Nyawis Antuk Bawos Halus,

                                    Tanpa kirang penyawis Sang Sahadewa, tur sada Banban, Halus, nyawurin,

            Yen Keto Keneh I Dewa,

                                    Sahur Sang Sahadewa, Nah yan aketo saja budinmu,

            Tityang Yatna Menangkepin.

                                    Ye saja buka Maperih ane twara ja madan melah, Nah Yen mula kitan Ibane, kudu sayaga kai ngemit Kahuripan Kaine.

XII  PUPUH  SINOM

1.         Raris Sang Nakula Prapta,

                                    Gelisang kata punang carita, Ida Sang Sahadewa ayat pacang mewali, tur sampun reke Ida Rawuh ring kacumpuang,

          Uduh Sahadewa Adi,

                                    Mapanggih ring Rakane, Kasembrama antuk manah kaeman, Uduh Adi, Adi Sahadewa adi,

            Ngiring Mangkin Budal,

                                    Ada buka pabuat beline mendakin anake kadi Idewa, Boya len Adi, pacang nitenin tur ngajak Idewa budal,

            Ibu Kunti Sedih Kingking,

                                    Mapuara te ane jani pebuat beline kading Idewa, tuah  nekedang gatra, dening Byang Ibu suba nyantos, mapuara Sedih Bekut, kawawa baan melede mangda nyingak Idewa,

            Mangayunang Ragan Adi,

                                    Bilih-bilih nyen buka anak setata ngajap-ajap, apanga digelis sida mapanggih, kto rasayang bli adi,

            Sang Sahadewa Satinut,

                                    Ngayunin Indik asapunika, tan sida nyawurin Sang Sahadewa, tur satinut kadi daging renteh bawos I Raka,

            Gegeson Matulak Budal,

                                    Gati pisan pemargine pacang matulak, mewali budal, dening pekahyunane kakuasayang antuk eman ring  I byang,

            Maring Perang Alas Prapti,

                                    Gumanti ajebosan sampun reke rawuh ring wewidangan Parang alas,

            Drika Pangguh,

            MahaReçi Tamba Netra,

                                    Gumana ayat mesanekan Sang Kalih, nanging Madyaning margi mapanggih ring Ida anake Lingsir, Ida Hyang Maharçi.

2.         Maha Reçi Sungkan Wuta,

                                    Peragayan Maharçi Sane kapanggih, wyakti ngangenin twas, sang sane nyingakin, napi malih Ida Sedekan kni sungkan rahat, nenten Nyingakin,

            Sahadewa  Nguncarang Aji,

                                    Tan wenten titah, dwaning indike asapunika, raris Sang Sahadewa ngregepang Japa Mantra, maka tetuwek nambanin Ida Hyang Rçi,

            Pramangkin Ida Manyingak,

                                    Antuk Sih, Hyun mawor ledang Sweca Ida Hyang Kasuwun, mawesana sida sidaning don, tur parasida Ida Hyang Rçi nyingakin kadi jatimula,

            Ngaturang Suksmaning Hati,

                                    Eling ring Pragayan turmaning sida malih nyingak, tan kadi ledang Pekahyunan Ida Hyang Rçi, saha ngaturang Parama Suksma,

            Putrin Bapa Soka Dewi,

                                    Madulur renteh bawos Ida HYang Rçi, Nah Cening,Cening Sang Panggihin Bapa dini, Kopa ada ne jani ciri len pracihnan Bapa mapanggih ajak Idewa, mai simpang kepondok, Nto ada okan Bapa, Ni Dyah Soka Dewi,

            Ken Nakula jani katur,

                                    Nah apang seken pireng Cening Ni Dyah Soka Dewi, Kasukserah ring Idewa Sang Nakula,

            Dewi Padapa Cenikan,

                                    Ane Cerikan Okan Bapane,  Sang ajegeg nto ya madan          Ni Dyah Dewi Padapa,

            Sahadewa Nganggon Rabi,

                                    Apanga patuh baan Bapa Ni Dyah Dewi Padapa sukserahang Bapa teken Cening Sang Sahadewa,

            Tuhu Pangus,

            Cening Madan Sudhamala.

                                    Buina buka sing pelih penarka keto masih wiwekan Bapa, nyudukang I Dewa dini, saha saja pangus tur adung, yen wiwekan Bapa, Cening madan I Sudhamala,

3.         Sang Nakula Sahadewa,

                                    Inggih,  Sang Nakula, Sang Sahadewa, sinarengan matur, tatuwian ature, Matur Suksmaning Idep majeng ring linggih Ida Peragayan HYang Rçi,

            Nunas Pican Reçi Lingsir,

                                    Mapuara antuk ledang tur Sweca Hyun Hyang Rçi, sampun mapaica, lan kadurusang mapinunase jaga pamit ring jeng Ida,

            Raris Nglanturang Mamarga,

                                    Sesampune nunas pamit ring jeng Ida Hyang Rçi, ngundag lampah pemargine  ayat budal,

            Maring Indraprasta Prapti,

                                    Tan asuwe dening pemargini gegelisan, sampun Ida Rawuh ring wewidangan Indraprasta,

            Ibune Nyanggra digelis,

                                    Napi malih sampun kacingak I Byang Nyantosang, lan mendak sang sane rawuh,

            Ampurayang Iwang Ibu,

                                    Sang mendakin tan kuasa antuk nanggenin saying pekahyunane, nyantos mulisah, mengame-ame nunas iwang ring Okane,

            Sahadewa Nyawis Nimbal,

                                    Pateh indike sang Kapendak ring Sang Memendak pada kawawa antuk eman, sayange, mawinan kadi megat-megat atur Sang Sahadewa Nyawurin,

            Inggih Ibu Dewi Kunti,

                                    Inggih Byang, boya byang kemanten sane Iwang melaksana, yen buka sajane, sekantun iraga nuluh rurung mahuripe adane dini, pastika Iwang lan patute, pacang panggih, Kengin jagate taler kni aab Rwa Bhineda, Hujan Lahru, Peteng Lemah, sapunika byang,

            Indik Dumun,

            Sampunang Malih Bawosang,

                                    Yen buka dados pinunas tityang ring byang,  sampunang malih ne sampun – sampun  bawosanga, ( Buka nyatwang tuak Labuh ), ngiring mangkin tincapang nitenin, asapunapi antuk  mangda parasida ngrajegang, ngukuhin dharma agamane, rehning nto sandang gugu tur tinutin

XIII  PUPUH  PANGKUR

1.         Raris Detya Kalih Prapta,

                                    Durung telas karasayang pacepukan kangen hyun Sang Muponin  ulangun, tanpa sangkan sareng kalih peragayan Denawa nampekin,

            Ngurugada tan Wenten Sida Nangkepin,

                                    Tan wenten jalaran jeg ngusak asik, keangkaran,maliha tan parasida ketangkepin, dening wisesannyane,

            Sahadewa Nunggal kahyun,

                                    Antuk Purusa, widagda, lan Wisesannyane, mangda sida gagelisan nangkepin, tanumade raris Sang Nakula ngregepang kahyun,

            Nguncarang Penyuda Malan,

                                    Ngregepang japa Mantra Panyuda  Reged Mala Petaka, ring Sang Keangkaran,

            Detya Kalih Malaib Ajerih Tuhu,

                                    Uncarang japa Mantran Sang Sahadewa,  kerasayang antuk denawa kalih, tur kerasa keciwa dening Wisesan Mantrane, mawesana ajerih tur melayu,

            Nenten Pasangkan Malecat,

                                    Tanpa tawengin malecat mlaib sang Denawa kalih,

            Dados Surapsara Kalih,

                                    Munggwing tan doh sida antuka malaib, Smaliha sampun keni mantra Panyupatan, Premangkin Nyuti Rupa, masalih  Raga sang kalih dados Widyadara makekalih.

2.         Surapsara Maka Rua,

                                    Tangeh antuka mangkin sampun Sang kalih, tur sampun kadi riyin, mewali dados Widyadara,

            Citraganda lan Citrasena Linuih,

                                    Masalain Sarira, Sang Kalih tosning Widyadara sane maparab, Citragand lan Citrasena sane utama,

            Mawecana Dabdab Halus,

                                    Ngaturang pawungu Indik Kaiwangane sane riin, Nartayang Maka Sujatine, kawesanang antuk Dabdab Alon Nyunyur Manis,

            Caning Nglukat Malan Nira,

                                    Gantine pisan tityang parasida nyudukang anake kadi Idewa, lan durus Idewa kasidan Ngruwatang Mala Petakan Tityange,

            Cening Tuhu Satria Mapakerti Ayu,

                                    Tan Iwang saja  tyang  parikedeh apang sida nyundukang Idewa,  Tan sep buina, kadi Kepagehan Idewa ngamong Budi Satria, tur masedana stata antuk Ngupakardi Rahayu,

            Tuhu Madan Sudhamala,

                                    Tan ana Dharma Mangrwa, tan Mingkalihin saja tuwah Idewa ane patut kasengguh  Panyudamalan Jagat,

            Wenang Nglukat Mala Sami,

                                    Sane Patut Nibakang Pemarisudha, Panglukatan sarwa malane  sami.

XIV  PUPUH  DURMA

1.         Sang Sahadewa Gelis Ngaturang Sembah,

                                    Iwawu asapunika daging Bawos Peragayan  Widyadara, saha digelis Sang Sahadewa Ngaturang Sembah,

            Inggih Surapsara Luwih,

                                    Saha matutang asing-asing sane kawedar iwawu ring perahayan Surapsara,

            Tityang Taler Suksma,

                                    Dening patut pisan maka daging pidartane, tan purun tempal, tan paritungkas hyun Sang Sahadewa, nglantur ngaturang Suksaning Idep,

            Kicen Panugrahan Hyang,

                                    Taler rawuhang tityang maka Suksman manah tityang ri jeng Ida Sang Ngalugrahin Tityang,

            Sida Nglukat Mala Weci,

                                    Larapane Parasida tityang ngruwatang nglantur ngelarang Pamarisudha ring sehanan Mala Petaka, Aji Ugige sami

            Mogi Rahajeng,

            Jagate maka Sinami.

                                    Taler nenten surud-surud ngubhakti ring Jeng Ida, dumogi Rahayu Rahajeng Pejagate Sami.

2.         Sampunika Gaguritan Sudhamala,

                                    Inggih Ratu, Ida dane sami munggwing asapunika maka daging gaguritan Sudhamala sampun katur,

            Masedana Welas Asih,

                                    Kawesanang antuk serdhaning manah sane mawor ring lulut ulangun,

            Nglebur Mala Papa,

                                    Pingkalih mucehang sehanan papa klesa, Pangruwatan leteh mala Petakane,

            Ngerahayuang Buana,

                                    Teleb Panguninge, Pengeweruhe anggen Stiti Bhakti, ngupadi Kerahayuan Jagat,

            Puputang Jantos Iriki,

                                    Dening sampun Pastika, tur mwasta sampun puput daging pidartane

            Ngiring Sareng,

            Masedhana Prama Çantih,

                                    Inggih Punika, Tityang tan lali nunas Gung Ampura, antuk kawimudan tityang, lan anggah ungguh basa sane tan manut’ tyos malih munggwing tan presida ngledangin hyun Ida dane, Inggih Puput atur tityang antuk Parama Çantih. :

OM ÇANTIH, ÇANTIH, ÇANTIH,OM

(Punya Wiçesana,P’Goeg,Peguyangan)