OM NĀRA
PUPUH GINADA
1. Prasthãnika Wus Kawedar, Dê Wêsampayana
Reçi, Tuhu Dahat Mahottama, Sarasaning Aji Tutur, Naranatha Nuli Mojar, Sãjnyã
Mahãrçi, Swarga Rohananê Wedar.
2. Sanê Mawosang Pãndawa, Maring Swargan
Polih Linggih, Rêhning Wantah Sang Bhagawan, Kinon Olih Reçi Agung, Ida
Bhagawan Niyasa, Nyaritêki, Sang Hyang Astadasa Parwa.
3. Punika Sanê Ngawinan, Meled Titiangê Tan
Sipi, Miragiang Satwan Pandhawa, Maring Swargan Polih Lungguh, Ledang Ratu
Nyaritayang, Linging Aji, Mangka Ling Janamêjaya
PUPUH
SINOM
4. Sumahur Ida Bhagawan, Inggih Ratu Çri
Nrepati, Sampun Ratu Sumangsaya, Caritannya Kadi Iki, Daweg Yudhistira Prapti,
Maring Lungguh Satekretu, Kapanggih Sang Duryodhana, Maring Singasana Manik,
Tegep Ngrangsuk, Bhusananing Kadêwatan.
5. Kadi Têjaning Aditya, Watek Dêwanê
Mangiring, Bhusanannya Sarwa Endah, Gambelan Gumuruh Muni, Widyadhara
Widyadhari, Ngaturang Pangariwuwu, Majeng Ring Sang Kerta Artha, Swargalokanê
Kineni, Kadi Iku, Kawêntenan Duryadhana.
6. Kascaryan Sang Yudhistira, Ri Kêswaryan
Kurupati, Taler Katon Drona Bhisma, Bhagadatta Salya Malih, Dusasana Saha Ari,
Bhurisrawa Katon Ditu, Malinggih Asri Majajar, Ngiterin Sang Kurupati,
Satakretu, Iniring Dê Watek Dêwa.
7. Watek Ratu Sumahaya, Kurupati Sane Rihin,
Tan Kawruhan Harani, Wilangannya Tan Sinipi, Maka Sami Polih Linggih,
Ngiringang Sang Prabhu Kuru, Kapuhan Sang Yudhistira, Ngwaspada Mrika Mriki,
Rêh Tan Pangguh, Sang Pandhawa Salah Tunggal.
8. Katarka Dê Yudhistira, Sang Pandhawa
Yajnyasêni, Hana Maring Yamaloka, Awinan Mahatur Gelis, Maring Sang Hyang
Surapati, Sãjnya Ratu Satakretu, Cawis Ya Pitakên Titiang, Ndi Kahanan
Yajnyasêni, Miwah Iku, Aringku Catur Pandhawa.
9. Miwah Sakancaning Nãtha, Sumahayêng
Ingsun Nguni, Rêhning Nênten Eton Titiang, Wênten Driki Salah Tunggil, Dija
Minab Polih Linggih, Belin Tityang Surya Sunu, Sapasa Ring Duryodhana, Taler
Nênten Wênten Driki, Naweg Ratu, Arsa Lêdang Ngandikayang.
PUPUH
PANGKUR
10. Uduh Cening Yudhistira, Aywa Kita Rungu
Sameton Malih, Rêhning Cening Nênten Patut, Ngambekang Manusa Cittta, Geng
Prihatin Kadi Sanê Sampun-sampun, Mangkê Kita Hanêng Swarga, Tinggalang Punika
Sami.
11. Punika Durus Pirengang, Linging Aji Sakadi
Ring Sor Puniki, Hyang Wiçesa Tunggal Tuhu, Nê Sinengguh Eka Atma, Mahyun Sira
Jagat-Krana Manyrestiku, Minakadi Nyresti Jagat, Mahan Saking Mahan Mijil.
12. Ahamkara Taler Medal, Wantah Saking
Ahamkara Ika Mijil, Puruça Pradhana Iku, Masang Yoga Sira Karwa, Nuli Medal
Panca Mahabhuta Kasub, Sanê Pacang Ngwangun Jagat, Triloka Sinengguh Gumi.
13. Molah Reko Punang Jagat, Olih Maya Tatwa
Yukti, Iku Sanê Mangawinang, Sang Hyang Atma Akêh Langkung, Madudonan Manut
Karma, Wastu Raris, Nenten Wenang Katunggalang.
14. Yan Ahayu Punang Karma, Swargalokanê
Pinanggih, Yan Ahala Punang Lampah, Maring Kawahê Maclempung, Dharma Wasanannya
Wantah, Katinutin, Polih Swarga Tawi Kawah.
15. Awinan Cening Sampunang, Pikedeh Mahyun
Mapanggih, Maring Sanakta Samian, Iriki Dêwa Malungguh, Mamuponin Swargaloka,
Mangka Yukti, Bawos Ida Sang Hyang Indra.
PUPUH
DURMA
16. Yudhistira Nuli Gelis Ida Nabda, Inggih
Ratu Surapati, Patut Daging Sabda, Apan Ikang Swargloka, Manut Pangrengoning
Mami, Kapenganang, Ring Sang Sura Mahaçakti.
17. Napi Gunan Ratu Manganang Swargaloka,
Kabhukti Dê Kurupati, Rêh Kasmala Dahat, Solah Ipun Maring Jagat, Dussasana
Minakadi, Sahasika, Ngêrêd Dêwi Yajnyasêni.
18. Lumabuha Sang Bhima Ring Sarayu Lwah,
Nunjel Jatu Wêsma Malih, Mancanên Ring
Nita, Jagatê Kaparawasa, Sang Sadhu Ngemasin Pati, Bhisma Drona, Salya Kadang
Mitra Kalih.
PUPUH
SINOM
19. Sapunika Bawos Ida, Nyawis Sang Hyang
Surapati, Uduh Dêwa Yudhistira, Sampunang Cening Digelis, Manyêda Sang Kurupati,
Kadĩki Lantaran Ipun, Kurupati Mangguh Swarga, Bapa Nerangang Nê Mangkin, Daweg
Ngadu, Kasuran Ring Rananggana.
20. Sampun Tinas Kinawruhan, Pacang Mangemasin
Pati, Nênten Surud Kahyun Ida, Nagingin Dharmaning Jurit, Laghawa Ngemasin Pati,
Nanging Kita Dharmasunu, Sida Nangun Ranayajnya, Matiti Kasuran Aji, Maka
Rurung, Kita Polih Swargaloka.
21. Cendek Cening Yudhistira, Aywa Kita Ēling
Malih, Maring Indikê Ring Jagat, Kadi Dêwata Dê Aji, Tan Kahanan Wyadi Malih,
Pinih Becik Ratu Prabhu, Atut Sadulur Masanak, Ring Ida Sang Kurupati, Kadi
Iku, Bawos Ida Sang Hyang Indra.
22. Naweg Ratu Suranatha, Tan Angga Ranak Hyang
Mami, Mamuktyang Swargaloka, Yan Tan Jangkep Sanak Mami, Miwah Dêwi Yajnyasêni,
Rêh Wênten Samayan Ingsun, Swarga Tunggal Sami Swarga, Duhka Tunggal Duhka
Sami, Kadi Iku, Ratu Sang Hyang Suranatha.
23. Cendek Mangkin Ratu Tityang, Pacang Ngrereh
Sanak Mami, Miwah Sakancaning Natha,
Sanê Nampih Tityang Rihin, Uduh
Cening Dharmamurti, Iki Dêwa Sudutêku, Pacang Ngater Naranatha, Ngayubhagya
Dharmamurti, Tur Lumaku, Makêring Dêwa Suduta.
24. Adoh Reko Punang Lampah, Katah Kapanggih
Dimargi, Luwah Jurang Gunung Alas, Ayatana Sthana Panggih, Ikang Loka
Pantaraning, Swarga lawan Nirayêku, Kahanan Ikang Pitara, Manyantosang
Pamastiki, Swarga Pangguh Nawi Kalebok Ring Kawah.
PUPUH
SMARANDHANA
25. Iku Mangkin Kalintangin, Olih Natha
Dharmawangça, Angidul Lampahe Reko,
Katon Punang Yamaloka, Samar Saru ring Kadohan, Agya Lampah Dharmasunu, Ngungsi
Genah Catur Sanak.
26. Kêpwan Sira Dharmamurti, Antuk
Durgandhaning Awan, Ngawê Karesresan Reko, Jurang Dalem Tan Pahingan, Peteng
Dedet Tan Singkaban, Katah Pitaranê Pangguh, Nênten Nyidayang Manglintang.
27. Antuk Batunê Gumuling, Tan Winilang Ageng
Dahat, Ngrudug Ngaplug Rowang Mangko, Asing Lintang Pêdêl Benyah, Naranatha
Yudistira, Manglantur Sira Lumaku, Manggih Geni Ngabar-abar.
28. Megat Pamargin Nrepati, Tan Pêndah
Wadawanala, Angsengannya Kebus Reko,
Dharmawangça Kagerahan, Watek Prêta Kagesengan, Apek Angit Ambun Ipun,
Ngardi Ida Kapuyengan.
PUPUH
GINADA
29. Athaliwat Sangkê Rika, Lebu Melek Nuli
Panggih, Anampeki Punang Mata, Kadi Api Upas Ipun, Peteng Citta Naranatha, Glis
Mamargi, Praptêng Tegal Panangsaran.
30. Linggahnya Tan Kenêng Sukat, Padang
Ambengannya Taji, Pitranê Tan Sida Lintang, Kebus Suryanê Kalangkung, Lahru
Kangkang Sadakala, Sedih Kingking, Pitranê Kepanesan.
31. Ngrudug Ngrereh Paêmbonan, Maring Slagan
Batu Ngetis, Manahanga Ngardi Suka, Nuli Atep Punang Batu, Iga Mastakannya
Benyah, Rahnya Mili. Muwuh Uteknya Muletak.
32. Nuli Mlaib Pabelesat, Binuru Ya Dêning
Paksi, Rupa Krura Tan Pahingan, Cucuk Lanying Taji Heri, Kampidnya Kadga
Nisita, Ngetut Buri, Nyotot Mata Manyangsara.
33. Wênten Kayu Mawoh Kadga, Ingorag Kingkara
Bengis, Pacepol-pol Punang Kadga, Nepên Sang Pablesat Mlayu, Siyuh Rencem Sing
Katiban, Pacelengik, Atmanê Nandang Sangsara.
34. Agya Lampah Dharmawangça, Dêwa Suduta
Mangiring, Manggih Wêtarini Luwah, Linggah Dalem Yêhnye Kebus, Muwuh Malih
Letuh Pisan, Ēbek Misi, Bajul Matendas Raksasa.
35. Hibek
Wuduk Lan Wuk Nanah, Maka Hebuknya Ngecemin, Balung Kapala Paslêngkat,
Kerikil Usehan Ipun, Malumut Ya Antuk Roma, Dhurgandha Hangi, Buyung Ngriung
Masliweran.
36. Uledê Paklenyuk Katah, Miwah Sarwa
Mangecemin, Singgat Tetek lan Lelintah, Cacing Wedit Namu-namu, Iris – iris Poh
Langgala, Pakelejing, Wukah-wukah lan Kancannya.
PUPUH
GINANTI
37. Ngeres Kahyun Dharmasunu, Ngaksi Sarwa
Mangecemin, Runtuh Ida Manyelêmpoh, Rêh Marginê Lintang Belig, Nuli Ida
Mararian, Tumuli Ngandika raris.
38. Om Dêwa Suduta Sadhu, Genah Napi Aran Iki,
Siapa Ngaran Sang Dêwata, Sanê Ngwasa-ngawi Driki, Warahanta Duga-duga, Maring
Tityang Sanê Mangkin.
39. Dêwa Suduta Umatur, Naweg Ratu Çri Nrepati,
Ikang Awan Madurgama, Awananing Atma Sami, Jumujug Ring Nrakaloka, Sing Gumawê
Hala Nguni.
40. Napi Luwir Driki Pangguh, Sami Sarwa
Mangreresin, Yamaniloka Arannya, Linggah ipun Tan Sinipi, Wantah Ida Sang Hyang
Yama, Sanê Ngwasa-ngwasi Driki.
PUPUH
DANGDANG GULA
41. Durus Ratu Nglanturang Pamargi, Prih Awak
Mamargi Ngelodang, Janten Panggih Sametonê, Miwah Ida Nrepa Wadhu, Natha
Sahayanta Malih, Rawuh Driki Wates Tityang, Ngater Ratu Nara Prabhu, Mangka
Ling Dêwa Suduta, Nuli Lunga Dharmawangça Lantur Mangkin, Pamarginê
Nunggal-nunggal.
42. Nênten Lami Sabda Matra Piarsi, Ngasih Arsa
Aminta Tulungan, Yudhistira Kamê-amê, Nênten Tinas Ya Kadulu, Antuk Andusê
Nyaputin, Uduh Kita Maharaja, Ling Karna Umuwus, Beli Agung Yudhistira, Ling
Sang Bhima, Sang Arjuna Manyambungin, Uduh Kaka Dharmawangça.
43. Inggih Ratu Prabhu Dharmamurti, Ling Nakula
Sahadêwa Nimbal, Punia Raja Kita Tan Lên, Rahadiyan Sanghulun, Pandhawadikara
Lewih, Bawos Ida Dêwi Kresna, Durus Cingak
Tityang Ratu, Anubhawanta Kalintang, Bilih Kangkat Waramretanê Linewih,
Tibakang Maring Sanakta.
PUPUH
SINOM
44. Sapangrawuh Naranatha, Rawuh Anginê
Ngasisir, Ngampehang Gandhaning Sekar,Ngardi Manah Suka Trepti, Sadurunge Ratu
Prapti, Manah Tityang Peteng libut, Nênten Weruh Lor Daksina, Sangsara Kêwuh
Nibênin, Wantah Ratu, Sida Ngruwat Dêwêk Tityang.
45. Sapunika Punang Sabda, Kapireng Dê
Dharmamurti, Suwê Ida Ngawaspada, Taler Nênten Tinas Kaksi, Linggih Sang
Manandang Sedih, Kapetek Irikang Endut, Dharmawangça Nabda Nimbal, Duh Dêwa
Sang Nandang Sedih, Sampun Sungsut, Ingsun Sareng Mangrasayang.
46. Warah Aranta Sinowang, Mangda Ingsun Tatas
Uning, Kadi Ketisin Amreta, Kahyun Sang Manandang Sedih, Manguningang Aran
Sami, Meneng Ida Dharmasunu, Sinambi Narka Ring Citta, Tan Paguna Subha Karmi,
Nê Kawangun, Olih Ida Sang Pandhawa.
47. Miwah Patibratan Ida, Kinardi Dê
Yajnyasêni, Rêhning Sami Manggih Nraka, raris Nabda Jroning Ati, Aparan Asubha
Karmi, Ginawê Sang Pandawêku, Nê Ngawinang Manggih Nraka, Sainget Tityang
Yukti, Suddhêng Laku, Kreta Yasa Satya Wakya.
48. Mangkana Locittanira, Raris Ida Tedun
Mangkin, Maring Waluka Arnawa, Sang Dêwa Suduta Prapti, Naweg Ratu Çri Nrepati,
Catur Pandhawa Kapangguh, Maka Miwah Dêwi Kresna, Ngiring Mawali Nê Mangkin,
Ring Swargêku, Linggih Ratu Wawu Prapta.
49. Uduh Dêwa Sang Suduta, Durusng Mawali Niri,
Aturang Ring Sang Hyang Indra, Tityang Sampun Sida Manggih, Sanak Ingsun Maka
Sami, Tanaya Sahayan Ingsun, Sun Jenek Ring Yamaloka, sareng Nandang Sangsarêki,
Kadi Iku, Bawosê Sang Dharmawangça.
50. Dêwa Suduta Matulak, Prapteng Swargaloka
Gelis, Umatur Ring Suranatha, Kapuhan Hyun Surapati, Ring Kadhêryan
Dharmamurti, Tumuli Sighra Lumaku, Ring Kahanan Yudhistira, Watek Dêwatanê
Ngiring, Gandharwêku, Widyadhara Mahoraga.
51. Maka Hulu Sang Hyang Dharma, Manunggang
Mahisa Çakti, Drasaksat Giri Sikara, Kasenwan Dêning Rawi, Sang Hyang Indra
Wedar Mangkin, Nunggang Ērawana Agung, Laraping Ratna Kancana, Tan Pendah
Kedaping Tatit, Humung Ngrudug, Padahi Bhêri Murawa.
PUPUH
GINADA
52. Hyang Baruna Mangkin Wedar, Manglinggihin
Angsa Putih, Sinaiban Pajeng Petak, Saksat Mêgha Putih Ngliput, Hyang Kuwêra
Mahabhawa, Abhra Ngendih, Manunggang Wimana Ratna.
53. Akêh Yaksanê Ngiringang, Sampun Reko Prapta
Mangkin, Drika Ring Yamaniloka, Watek Dêwa Sapta Empu, Ngastuti Sang
Dharmawangça, Mênggung Ksiti, Kawah Ical Tan Parawat.
54. Gawok Kahyun Sang Kalaran, Napi Malih
Dharmamurti, Nabak Belabarin Suka, Swarga Parimita Pangguh, Nikel Ring Swarganê
Pecak, Duk Nrepati, Wawu Praptêng Swargaloka.
55. Sang Hyang Dharma Mangandika, Uduh Cening
Tanayan Mami, Maharaja Yudhistira, Tan Pahingan Sukan Ingsun, Kasujjanan Sang
Pandhawa, Becik Mangkin, Kita Madyusa ring Gangga.
56. Rupa Manusanta Ical, Yudhistira Namia
Ngiring, Neher Madyusa Ring Gangga, Watek Dêwatanê Nutug, Sampun Puput
Masucian, Mangastuti, Muja Ida Hyang Sawita.
57. Masrana Udaka Stawa, Mayoga Cittanê Hening,
Masalin ta Sira Rupa, Sidha Dêwata Rupêku, Katekaning Catur Pandhawa, Ratu
Sami, Pada Mukti Swargaloka.
PUPUH
PANGKUR
58. Naweg Ratu Naranatha, Kadi Iku Hinganing
Carita Iki, Swargarohana Parwêku, Panlas Asta Dasa Parwa, Mahabhara Upakyanan
Ipun Ratu, Yogya Wacanên Dê Natha, Utsahayang Sari-sari.
59. Ikang Parwa Ngarania, Sadhananing Ngeniyang
Keswaryan Lewih, Pangruwatan Papa Letuh, Marep ring Oneng Mirengang, Malantaran
Kapawitran Punang Tutur, Ngwacên Asta Dasa Parwa, Pikolihnya Ya Setanding.
60. Maswadhyaya Catur Wêda, Papa Klêsa Kasidan Winasa Bhasmi, Manggih Swarga
Moksa Muwuh, Maring Patinta Wekasan, Ring Huripta Tan Kirang Ring Pangan Kinum,
Salamin Kantun Ring Jagat, Sadakala Suka Trepti.
61. Pikenohnya Tuhagana, Nyaritayang Sadaging
Parwanê Sami, Sang Oneng Mirengang Muwuh, Gawê Hala Sida Ruwat, Tan Sangsaya
Ring Kottaman Punang Tutur, Pakardin Bhagawan Byasa, Bharata Katha Katawis.
PUPUH
SINOM
62. Tigang Tahun Suwên Ida, Gumawayang Punang
Aji, Mabrata lan Mapowasa, Dharma Kamoksan Patitis, Ngardi Prakasa Katawis,
Rawuh Maring Swarga Kasub, Papa Klêsa Sida Ruwat, Marep Ring Oneng Miragi,
Daging Tutur, Jroning Asta Dasa Parwa.
63. Kottaman Hyang Itihasa, Purana Brahmanda
Malih, Kapatut Wistarakena, Ring Sanmukan Çri Nrepati,, Nuju Purnama Makadi,
Ngawê Papa Klêsa Gempung, Sang Hyang Çastra Katiga Ya, Karyan Ida Mahareçi,
Warga Catur, Ya Kawedar Jroning Çastra.
64. Brahmana Ksatriya Wêsya, Sudra Warnanê
Caturthi, Ya Sinangguh Catur Janma, Catur Asramanê Malih, Brahmana Sêwa Lan
Reçi, Miwah Sogata Puniku, Catur Janma Caturãsrama, Janman Sang Hyang Çastra
Trini, Sane Kasub, Pakardin Bhagawãn Byasa.
65. Sarin-sarin Bharatakatha, Pinupul Dê
Wararuci, Tumuli raris Katurang, Ring Ida Sang Mahareçi, Maka Cihna Dredha
Bhakti, Ring Ida Sang Reçi Agung, Sarascamuscaya Ngaran, Patut Pisan Katelebin,
Lih Puniku, Catur Janma Catur Asrama.
66. Itihasa Lan Purana, kapatut Sering Piarsi,
Olih ratu Naranatha, Miwah Tanda Mantri Malih, Miwah Sapa Sira Ugi, Ngapti
Dharmanê Kaduluh, Tanda Mantri Makabêhan, Wus Mangrengo Punang Aji, Yan Masunu,
Purusa Maha Wiçesa.
67. Itihasa Lan Purana, Pateh Pawitrannya
Yukti, Maring Sang Hyang Catur Wêda, Pawitrannya Taler Patis, Ring Oneng Muja
Tirthêki, Lan Mapunia Lembu Satus, Maring Ida Sang Brahmana, Weda Paraga
Makadi, Phalan Ipun, Manggih Suka Driki-drika.
PUPUH
DURMA
68. Sapunika Wacanan Wêsampayana, Narapati
Nabda Malih, Inggih Pangempuwan, Atyanta Pawitrannya, Sang Wus Mireng Sang
Hyang Aji, Bharatakatha, Itihasa Purana Malih.
69. Phalan Ipun Kabawosang Nênten Kirang, Ring
Sang Oneng Mangwacênin, Awinan Patut Limbakang, Maring Wewengkoning Jagat,
Kardin Ida Maha Reçi, Sida Ngruwat, Bacakaning Papa Wêci.
70. Salanturnya
Durus Malih Ya Wedarang, Indik Pandhawanê Sami, Wus Molih Swargaloka,
Parwaning Swarga Rohana, Punika Wedarang Mangkin, Meled Pisan, Manah Titiangê
Miragi.
71. Inggih Ratu Maharaja Janamêjaya, Sapuput
Ida Mabresih, Maring Luwah Gangga, Ngastawa Bhatara Surya, Tarpana Udakanjali,
Manguncarang, Weda Mantra Puja-Stuti.
72. Nuli Ical Sariranira Manusa, Lir Wulan
Anglimungsi, Marupa Dêwata, Patis Rupan Sang
Hyang Dharma, Pawitran Gangga Ngawinin, Pinujanan, Olih Dêwatanê Sami.
PUPUH
SINOM
73. Byatitan Sang Pandhawa, Miwah Dêwi
Yajnyasêni, Mamuponin Swargaloka, Miwah Para ratu Sami, Kantisraya Ngadu Jurit,
Sami Polih Genah Luhung, Cinarita Duryaodhana, Sareng Sametonê Sami, Polih
Lungguh, Drika ring Yamaniloka.
74. Naweg Ratu Naranatha, Kadiku Caritan Iki,
Tang Swargarohana Parwa, Naranatha Malih Nyawis, Sajnya Ratu Mahamuni. Sang
Pandwa Wus Mapupul, Sareng Ida Dêwi Kresna, Napikê Mapasah Malih, Durus Ratu,
Lantur Malih Caritayang.
75. Sajnya Ratu Maharaja, Sasampun Sang
Dharmamurti, Wus Pinujan Watek Dêwa, Raris
Lunga Mrika-mriki, Sang Hyang
Dharma Manyarengin, Praptêng Swargan Sang Hyang Wiçnu, Panggih Maharaja
Kresna, Rupa Halep Tan Patanding, Nangkil Ditu, Watek Wadwa Makabêhan.
76. Cakranira Sudarsana, Gadanira Kamodiki,
Sangkanira Pancajania, Tewek Si Nandaka Malih, Manangkil Masila Tiding, Maring
Ajeng Sang Hyang Wiçnu, Malinggih Nyanding Arjuna, Kadi Polahê Duk Nguni, Daweg
Kantun Malinggih Ring Madhyapada.
77. Manglantur Pamargin Ida, Maring Swargan
Bayu Prapti, Kapanggih Ida Sang Bhima, Sapta Marutanê Nangkil, Kadi Rupanira
Nguni, Duking Madhyapada Kantun, Mangen-angen Yudhistira, Ngamel Tangan
Yajnyasêni, Satakretu, Nuli Ida Mawacana.
78. Cening Agung Yudhistira, Punika Bhatari
Çeri, Maka Rupa Dêwi Kresna, Kinalima Dênta Nguni, Manut Titah Içwarêki, Satwan
Dêwi Dropadiku, Tan Sangkan Sukla Swanita, Standila Yajnya Umijil, Maka Wastu,
Dêwi Yajnyasêni Ngaran.
79. Dêwi Kresna taler Ida, Dêwi Dropadi Ya
Malih, Iku Sang Lima Majajar, Prabhawanê Lewih Sami, Panca Kumara Puniki, Putran
Sang Pandhawa Kasub, Mawali Ring Widyadhara, Maka Sami Polih Linggih, Kadi Iku,
Cening Agung Yudhistira.
80. Iku Sang Katon Matêja, Dumilah Lir Têjan
Geni, Iku Sanakta Sang Karna, Sampun Seken Polih Linggih, Maring Swargan
Adityêki, Nyanding Haji Mlinggih Ditu, Punika Swarga Bhaswara, Antuk Têjan
Sarwa Manik, Punang Lungguh, Wresni Andaka Bhoja.
81. Pahulunan Naranatha, Abhimanyu Waged Çakti,
Sakadi Haleping Wulan, Somawangça Sira Yukti, Maharaja Pandhu Kunti, Miwah Dêwi
Madri Iku, Pada Mapupul Ring Swargan, Wira Ghatotkaca Malih, Wus Mawantun,
Matemahan Widyadhara.
82. Mangkana Ling Satayajnya, Maharaja
Dharmamurti, Meneng Kablabaran Suka, Rêhning Sami Polih Linggih, Catur Pandhawa
Makadi, Kantisraya Para ratu, Mangka Ling Wêsampayana, Narapati Nabda Malih,
Sajnya Empu, Wênten Nê Takênang Tityang.
83. Putran Sang Prabhu Drupada, Jayatsêna Lan
Satyajit, Duryodhana Sakuni Salya, Jayadratha Minakadi, Wus Winedar Dê Sang
Muni, Amunapi Suwên Ipun, Mupu Swarga Lan Niraya, Manut Subhãsubha Karmi, Iku
Tuhu, Caritayang Ring Ranakta.
84. Sajnya Ratu Naranatha, Tuhu Dahat Sengka
Yukti, Nyawis Patakên Sang Natha, Iku
Hana Brahma Reçi, Sisian Ida Byasa Muni, Nê Yogya Takênin Ratu, Becik Ida Wawu
Prapta, Sungsungana Andap Sorin, Mangka Kahyun, Nyawis Patakên Sang Natha.
PUPUH
PUCUNG
85. Kadi Iku Wacanan Sang Maha Empu, Sang
Janamêjaya, Tan Tulak Ring Mahamuni, Raris Nungsung, Sang Bhagawan Wawu Prapta.
86. TegepIku Upakaraning Manungsung, Punang
Padyarga, Camaniya Muwuh Malih, Raris Nglungsur, Lêdang Ida Manyarita.
87. Reçi Suka Tumuli Raris Umatur, Sajnya
Naranatha, Nyarita Bhujangga Haji, Durus Rungu, Ratu Sang Janamêjaya.
88. Manut Sulur Kanista Madyama Iku, Miwah
Mahottama, Panrestiannya Sowang Nguni, Kawit Ipun, Hana Dêwata Raksasa.
89. Yaksa Detya Raksasa Danawa Muwuh, Gandharwa
Uraga, Widyadhara Minakadi, Sami Iku, Kawedar Dê Reçi Byasa.
90. Punang Tutur Katiba Ring Sapta Empu, Lan
Watek Dêwata, Punika Kawedar Mangkin, Pingit Tuhu, Kayatna Dê Naranatha.
PUPUH
GINADA
91. Reçi Bhisma Mangkin Wedar, Sapuputê
Mamuponin, Punang Subhãsubha Karma, Miwah Pawretinnya Dumun, Raris Mawali Ring
Sangkan, Tan Len Iki, Sang Hyang Asta Basu Sira.
92. Danghyang Drona Kabawosang, Mawali Ring
Wrehaspati, Dhretarastra Kêsawarna, Mapupul Ring Ghandariku, Maharaja Pandhu Wedar, Wus Mawali, dados Sang
Hyang Nanindra.
93. Mapupul Ring Garwan Ida, Dêwi Kunti Dêwi
Madri, Prabhu Drupada Wirata, Maka Miwah Drestakêtu, Mawali Ring Hyang Baruna,
Iku Malih Nisita, Wabru Lan Sambha.
94. Satmaka Ring Hyang Kêsawa, Salya Bhurisrawa
Malih, Satmaka Ring Sang Hyang Yama, Ugrasêna Dêwa Basu, Miwah Kadi Naranatha,
Satmaka Ring, Ida Bhagawan Kasyapa.
95. Wira Sangka Sang Uttara, Miwah Sang Sweta
Ya Malih, Satmakêng Bhagawan Druwa, Ratu Samantanê Pupul, Satmakêng Sang Hyang
Içwara, Putran Kiriti, Satmakêng Ring Sang Hyang Wulan.
96. Karna Satmakêng Aditya, Duryodhana Lan Sang
Ari, Detya Danawa Raksasa, Iku Temahannya Mantun, Yudhistira Sang Hyang Dharma,
Wiçnumurti, Satmakêng Sang Hyang Kêsawa.
97. Sang Bhima Bayu Satmaka, Naradêwa Sang
Kiriti, Baladêwa Wus Satmaka, Ring Anantabhoga Wibuh, Dharanang Pretiwi
Mandala, Ngamarginin, Panguduh Bhatara Brahma.
98. Rabin Ida Prabhu Kresna, Sodasa Sahasra
Diri, Wus Madiyus Maring Luwah, Saraswati Suci Tuhu, Widyadhari Temahannya,
Pupul Malih, Ring Ida Sang Hyang Kêsawa.
99. Naweg Ratu Naranatha, Kadika Lelangit Haji,
Maka Miwah Sang Korawa, Manggih Swarga Reko Sampun Iniket Dê Muniwara, Medar
Indik, Yudhan Pãndhawa Korawa.
100. Mahabaratha Carita, Wastan Sang Hyang Aji
Lewih, Wenang Kaangên Sadhana, Ngruwat Papa Klêsa Letuh, Titi Mangguhang
Kêswaryan, Sari-sari, Wacanan Dê Naranatha.
PUPUH
GINANTI
101. Sang Hyang Ithiasa Iku, Miwah Purananê Malih,
Nawi Ya Sahasra Warsa-warsa, Tityang Nyarita Ring Aji, Tityang Nyadia
Mangiringang, Medar Sloka Padartheki.
102. Daweg Dêwa Suduktêku, Umatur Ring Surapati,
Dharmasunu Nênten Angga, Maninggal Lokayamani, Kapuhan Hyun Suranatha, Ring
Kadhêryan Dharmamurti.
103. Lumampah Hyang Satakretu, Marêng Linggih
Dharmamurti, Watek Dêwta Ngiringang, ang Hyang Dharma Barunêki, Gandharwa lan
Widyadhara, Sang Hyang Kwêra Sapta Reçi.
104. Makadi Hyang Rudra Iku, Maka Miwah Sang Hyang
Agni, Sang Hyang Dwadasa Aditya, Sadateng Lokayamani, Abhra Sinang Yamaloka,
Antuk Têjan Sarwa Manik.
105. Bhêri Murawa Gumuruh, Masanggha Ring Ghanta
Ganti, Miwah Pangastawan Dêwa, Muwuh Wêdan Sapta Reçi, Muja Prabhu
Dharmawangça, Maduluran Sekar Riris.
PUPUH
KUMAMBANG
106. Nadak Sara Sarwa Letuh Ical Sami, Sakancan
Nyangsara, Minakadi Kawah Wesi, Lan Kayu Mawoh Curiga.
107. Maka Miwah Sarwa Mangecemin Ati, Tang
Gumulung Sêla, Sêla Matakep Makadi, Miwah Satwa Rodra Rupa.
108. Sami Muksa Kija Iku Tan Kuningin, Rawuhing
Durghandha, Matemahan Ambu Minging, Yamaloka Dados Swarga.
109. Sabda Sinang Kahyun Sang Manandang Sedih,
Kablabaran Suka, Mojar Sang Hyang Surapati, Uduh Dêwa Yudhistira.
110. Nê Ngawinang Watek Dêwa Pupul Sami, Ring
Ajeng Sang Natha, Kakarsana Dê Nrepati, Ngamong Dharma Nênten Ginggang.
111. Catur Sanak Miwah Dêwi Yajnyasêni, Tan Suwê
Naraka, Kedik Ngawê Papa Nguni, Haywa Kita Salit Arsa.
PUPUH
SMARANDHANA
112. Mangdoh Nênten Swarga Jagi, Rêhning Yukti Tan
Pahingan, Punang Dharma Kang Ginawê Olih Sang Catur Pandhawa, Lan Watek Ratu
Sahaya, Maring Rana Karya Dumun, Janten Manggih Swargaloka.
113. Yamaloka Linggih Haji, Sampun Ya Makisid
Genah, Dados Genahnyanê Mangkê, Duryodhana Saha Sanak, Tekêng Ratu Sahanannya,
Kapetek Kalebu Ditu, Ring Tengah Walukarnawa.
114. Sang Hyang Jagatkarana Nguni, Nitah
Subhãsubha Karma, Maring Sarwa Bhawa Reko, Kedik Dênia Gawê Papa, Ageng Tang
Dharma Sadhana, Papa Pinanggih Rumuhun, Swarganê Keni Pungkuran.
115. Yan Kedik Dharma Kinardhi, Ageng Dênia Gawê
Hala, Swarga Dumun Panggih Mangko, Papanê Keni Pungkuran, Punang Subhãsubha
Karma, Pastika Wênten Who Ipun, Pinupu Dê Sang Makarya.
116. Cening Agung Dharmamurti, Nê Ngawinang Kita
Nraka, Nguni Daweg Drona Mangko, Kamanggehang Sênadhipa, Olih Agunging Korawa,
Kangêlan Sang Prithasunu, Magutin Sang Wipra Drona.
117. Kresna Nguduh Sang Kiriti, Mating Gajah Aswatthama, Gajah Mlawapati Mangko,
Sampun Mati Punang Gajah, Ngardi Alok
Sang Arjuna, Aswatthama Sampun Lampus, Kpireng Sang Wipra Drona.
PUPUH
SINOM
118. Tan Gegison Danghyang Drona, Ngega Pangalok
Kiriti, Rêhning Kita Meneng Juga, Nuli Kinon Wiçnumurti, Mangda Sareng
Manglinyokin, Wastu Wisesannya Luntur, Kita Nuli Tinakwanan, Olih Ida Drona
Reçi, Nyawis Patut, Gajah Hanêng Suwacitta.
119. Munggwing Ida Danghyang Drona, Ngugu
Daginging Panyawis, Rêh Kita Satya Wacana, Nuli Murca Pramangkin, Lir Kicalan
Jiwa Tuwi, Ring Udaning Ratha Runtuh, Nepên Muncuk Panah Mangan, Nyanggahin
Wehang Sang Reçi, Punang Heru, Kantun Maring Pamentêlan.
120. Nuli Ida Sang Kêsawa, Malih Manguduh Kiriti,
Mangda Manibakang Panah, Ring Talin Langkap Sang Reçi, Kapanah Olih Kiriti,
Nuli Mental Punang Heru, Nebek Wihangnya Sang Wipra, Bêtêl Ring Wunwunan Reçi,
Gelis Rawuh, Drestadyumna Nunggal Ida.
121. Indik Sêdan Reçi Bhisma, Kapanah Olih
Çrikandi, Bongkol Hêru Gumalunggang,
Pinalu Olih Kariti, Wijang Ida Bêtêl Nuli, Iku Dosan Kita Dumun, Awinan Kita
Naraka, Durus Aksi Sanê Mangkin, Swargan Lungguh, Ida Sang Catur Pandhawa.
122. Napi Malih Maharaja, Pikolih Tapanta Lewih,
Kreta Yajnya Aswemêdha, Budhi Sudha Tan Patanding, Punika Ya Maka Sami, Phalan
Ipun Pangguh Ratu, Irika Ring
Swargaloka, Watek Ratu Srayakanti, Sami Iku, Amangguhang Swargaloka.
123. Kancaning Kingkarabhala, Nyangsarên Sanakta
Nguni, Matemahan Widyadhara, Miwah Gandharwa Ya Malih, Bhusanannya Emas Manik,
Ngawê Sopacara Iku, Ngaturang Panglila Citta, Ring Ajengta Kadi Mangkin, Miwah
Unduk, Kita Madyus Ring Lwah Gangga.
124. Angga Manusanta Ical, Manados Dêwata Lewih,
Wusan Nandang Lara Duhka, Sedih Angêl Lapa Anglih, Puput Nabda Surapati, Sang
Hyang Dharma Malih Nyambung, Uduh Cening Yudhistira, Tan Pahingan Sukan Mami,
Cening Tuhu, Bhakting Mami Lan Dêwata.
125. Asihta Ring Sarwabhawa, Kamahãrdhikanta Malih,
Pageh Ta Ring Purwa Rêna, Pikukuhta Tan Patanding, Panurêksanku Ping Kalih,
Cening Pageh Ngamong Patut, Nênten Keni Binancana, Panurêksanku Ping Siki, Sanê
Dumun, Daweg Maring Dwêtawana.
126. Panurêksanta Ping Ruwa, Cening Tan Kahyun
Ngalahin, Asunê Manutug Kita, Dyastu Cening Urung Ugi, Maring Swarga Polih
Linggih, Cening Taler Nênten Kahyun, Muponin Swarga Ngaraga, Catur Pandhawa
Dropadi, Watek Ratu, Nênten Sareng Pilih Swarga.
127. Bapa Purun Mastikayang, Yan Kita Nirmala
Budhi, Muwuh Yan Dharma Paraga, Kottamanta Tan Patanding, Miwah Wang Sanakta
Sami, Karna Bhima Arjunêku, Nakula Lan Sahadêwa, Sura Maharatha Sami, Gilik
Guluk, Satya Wacana Pratijnya.
128. Tan Kapatut Suwê Ida, Lumebok Lokayamani,
Rêhning Sami Tos Dêwata, Taler Dêwi Yajnyasêni, Tan Pêndah Ring Uma Sruti,
Ngamong Patibratha Kukuh, Kadika Bawos Hyang Dharma, Sang Dharmamurti Mamargi,
Nuli Madyus, Irika Ring Luwah Gangga.
129. Iniring Catur Pandhawa, Miwah Dêwi
Yajnyasêni, Lan Ratu Pratisamanta, Sang Hyang Dharma Manyarengin, Miwah Watek
Dêwa Sami, Mangiringang Dharmasunu, Sajnya Ratu Naranatha, Puput Ratu Rawuh
Driki, Satwan Ipun, Swargarohana Parwa.
PUPUH
PANGKUR
130. Reçi Suka Puput Nabda, Nuli Nyawis Janamêjaya
Nrepati, Sajnya Ratu Maha Empu, Cawis Pitakên Ranakta, Pira Katah Sang
Sinengguh Sura Iku, Minakadi Maharatha, Adiratha Tiyos Malih.
131. Inggih Ratu
Naranatha, Pireng Mangkin Aturê Bhujangga Haji, Sang Arjuna Abhimanyu,
Karna Miwah Danghyang Drona, Aswatthama Bhurisrawa Nem Puniku, Sura Adi
Maharatha, Kabawos Dê Wruhing Jurit.
132. Yudhistira Bhimasêna, Drestadyumna Matsyapati
Muwuh Malih, Çikandi Satyaki Muwuh, Maka Nenemê Punika, Kabawosang Sura,
Mahartha Iku, Murud Satengahing Mangswa, Rikalaning Ngadu Jurit.
133. Kretawarna Krepa Salya, Jayadratha Duryodhana
Lan Sakuni, Adiratha Kanem Iku, Angswa Pateh Ring Murudnya, Rikalning Ngadu
Kasingan Ring Ayun, Sapunika Bawos Ida, Nê Maparab Suka Reçi.
134. Mahataja Malih Nabda, Duh Mahampu Pira Katah
Wadwa Hasti, maka Miwag Kretan Ipun, Ikang Saksohini Ngaran, Ya Pajaren Maring
Ranak Maha Empu, Sajnya Ratu Naranatha, Udyogaparwa Wilangin.
135. Kuda Rwa Padati Tiga, Gajah Tunggal Napak
Lemah Petang Diri, Sapati Ya Nraran Iku, Ikang Tikang Pati Wedar, Senamuka Mapinda Ya Tigang Puluh, Tekeng Gajah
Turanggannya, Sapunika Çri Nrepati.
136. Raris Tigang Sênamuka, Kawastanin Sagulma
Punika Aji, Tigang Gulma Saganêku, Ruwang Atus Tigang Dasa, Gebogannya Inaran,
Sagana Iku, Sawahini Tigang Ghana, Walung Atus Sapuluh Sami.
137. Wênten Malih Sapratana, Tlung Wahini Ruwang
Ēwu Nanggu Malih, Samas Nanggu Tigang Puluh, Tekêng Gajah Turanggannya, Tlung
Pratana Kabawos Dados Sacamuh, Pitung Iwu Nanggu Domas, Sangang Puluh Muwuh
Malih.
138. Tigang Camuh Yan Gebogang, Saksohini Kabawos
Jeroning Jurit, Aksohini Yêning Itung, Ruwang Yuta Lan Salaksa, Walung Iwu
Nanggu Malih Pitung Atus, Tekêng Gajah Rtha Turangga, Gebogannya Maka Sami.
139. Wadwan Ida Sang Korawa, Maka Sami Wênten
Solas Aksohini, Kinawruhan Dê Sang Prabhu, Çakti Wani Maharatha, Duryodhana
Matakên Ring Bhisma Empu, Sajnya Ratu Sang Bhagawan, Kadīki Piragin Mami.
PUPUH
GINADA
140. Rikalan Tityang Mayudha, Ndikapan Ngasorang
Jagi, Sang Pandhawa Gangsal Sanak, Kabawosang Tityang Ratu, Nirdon Ngadu
Kapurusan, Manandingin, Kaçaktên Bhima Arjuna.
141. Rêh Sampun Kretenugrahan, Gatin Pwangkulun
Kalih, Rikala Magutin Bhima, Singha Rupa Galak Ngamuk, Awinannya Kadi Tityang,
Ngrereh Kanti, Ratu Çakti Tan Tandingan.
142. Sanê Sida Lumawana, Kasaktên Bhima Kiriti,
Wewengkon Bharatawarsa, Kinawasa Dên Inghulun, Rihananing Sang Bhagawan, Kasarengin,
Olih Ida Danghyang Drona.
143. Aswatthama Miwah Karna, Salya Jayadratha
Malih, Bhurisrawa Kretawarma, Bhagadatta Sakuniku, Bala Saksohini Sowang, Maka
Sami, Solas Aksohini Ika.
144. Durus Aksi Sang Bhagawan, Tingkah Gelar
Nghulun Iki, Muwuh Ratu Çakti Sura, Sowang Kasidan Mamagut, Kesaktên Bhima
Arjuna, Nê Tan Pahi, Pakukuh Watek Pandhawa.
145. Yukti Drika Wênten Kresna, Saksat Nênten
Wênten Patis, Rêh Nênten Ngagem Sanjata, Awinan Swatah Raputu, Sang Pandhawa
Lebur Bhrasta, Olih Mami, Sang Korawa Ya Pastika.
146. Muwuh Katah Sang Purusa, Çakti Wani Tan
Patanding, Para Natha Sumahaya, Prama Bêla
Ring Raputu, Durus Wedarang Bhagawan, Wênten Indik, Punang Ripu Pacang Jaya.
147. Saksohini Minab Pejah, Sisan Ipun Katah Kari,
Sura Çakti Tan Pahingan, Mangdoh Pisan Punang Ripu, Pacang Ngasorang Korawa,
Sampun Pasti, Punang Ripu Bhasmi Bhuta.
148. Mangkana Ling Duryodhana, Umeneng Ida Sang
Reçi, Malocitta Jroning Arsa, Duga-duga Yan Sumahur, Kurunatha Lan Sahaya,
Nandang Sedih, Salah Asa Makabêhan.
149. Nawi Wênten Duga-duga, Mitya Wakya Nghulun
Iki, Kabawosang Mapacara, Tan Manut Solahing Wiku, Tan Kapatut Mojar Adwa, Yan
Lakonin Bhyaktan Pamanggihang Papa.
150. Dyastu Prabhu Duryodhana, Sareng Ratunê
Ngantinin, Dukhebara Tan Pahingan, Malantaran Ujar Ingsun, Sumahur Duga-duga,
Kal Lampahin, Timbang Manggih Papa Nraka.
151. Puput Reko Manglacitta, Raris Nyawis Bhisma
Reçi, Uduh Prabhu Duryodhana, Ledangang Kahyun Iratu, Kakyang Yawis Duga-duga,
Ratu Sami, Miwah Sanakta Samian.
152. Maha Çakti Kapwa Sura, Catur Angga Durgha
Rusit, Pakekesnya Ya Subaddha, Akêhnya Tan Keni Itung, Sanjatannya Mategepan,
Nanging Sami, Punah Bhrasta Dê Arjuna.
153. Kakyang Taler Kekasorang, Danghyang Drona
Sênapati, Wantah Jroning Tigang Dina, Kasor Olih Prithasunu, Yan Sang Karna
Sênadhipa, Twah Aselid, Pinrajaya Sang Arjuna.
154. Yan Sang Salya Sênodhipa, Tengah Nalika
Pituwi, Kinasoran Sang Arjuna, Aswatthama Purun Magut, Ksana Ilang Dê Arjuna,
Bawos Mami, Duga-duga Satya Wakya.
155. Mangka Bawos Reçi Bhisma, Kêrang-Irang Kurupati, Tan Purun Matanya Muwah, Sapunika
Nara Prabhu, Slokaning Udyoga Parwa, Rawuh Driki, Caritanê Sineb Tityang.
156. Mangka Bawos Reçi Suka, Sumahur Sang
Narepati, Sajnya Ratu Mahadwija, Mahabhara Dahat Iku, Punang Bharata Sangkatha,
Pawitrêki, Sida Ngruwat Punggung Tityang.
157. Mangka Ling Janemêjaya, Manglawo-lawo Sang
Reçi, Suka Lan Wêsampayana, Lami Ida Nyaritêku, Wus Katon Sira Kangêlan, Rawuh
Driki, Carita puputang Tityang.
OM ÇANTIH,
ÇANTIH, ÇANTIH, OM
ITI
PEPARIKAN SWARGAROHANA SAMÂPTA
Puput
Sinurat Ring Rahina Saniscara, Umanis, Pujut,
Pinanggal
31 Maret 2001.
Tidak ada komentar:
Posting Komentar