Gaguritan "Sasuluh"

Siki

Sasuluh Kahuripan

PUPUH  DURMA

1.    YAN  TWAH SAJA, CENING MISARATANG PESAN ,

Nah Cening, Cening Bagus, Mustikan Bapane anake kadi Idewa, Yan kudu ada buka sarat pakenyetan Cening ane jani,

MAYASIN  RAGA SUJATI ,

Pamekas ane twara len nguperengga  Padewekan, twah ya nto mula ane kinucap utama,    

KAPUCUK SUDHAYANG ,

Ane twara ja ya len, patut Tincapang Idewa pamekas,

JENYANAN CENINGE WANTAH ,

Kapertama inggian pengawit, ane sandang jugjugang Cening, nto ya Pakenehane/pakenyetane twara len,

ENTO MELAHANG MERTENIN ,

Apanga kudu sida baan Cening tureksa, Ncen nto anggon Nyutetin, mitetin tur ane antes sulurang Cening malu,

BAN KECAP ÇASTRA ,

SUSILA PUCUKANG SAI .

Ane patut anggon Cening sarana, piranti, napkalaning nyuluhang maka untengnyane, twah Kecap Çastra, Len buin maka Darsana, apanga stata nganutin Kasusilan . 

2.    YĒNING TĒMPANG, SOLAHĒ MAYASIN RAGA ,

Nah Cening, Ane Tuturang Bapa Jani, Pet Prade Nungkalik lantas Paridabdabe rikalaning nguperengga utawi mayasin Padewekan,

ANGGA WADAGA ULURIN ,

Puarannyane lantas, stata ngulurin Indria, ngodagang Kamomoan,  

PERTĒNIN PUCUKANG ,

Nto lantas ane pucukang sesai, gumanti sida mapikolih,

ALEM AJI UPERENGGA ,

Apa buin lantas Sungkemin payasin baan tutur-Aji agama ,

MWANG SANDANG PANGAN BEKBEKIN ,

Pengaptine kadi puguh apanga kaliayahin baan sarwa ane bungah, keto masih apanga sida  ngodagang  sakeluir ngamertanin ,

TAN NYULUR DHARMA ,

NYET  BEGUGĒ METU HURIP .

       Nyak lantas tusing Lingu Kading  Dharma utawi Kepatutan, Jeg puguh ngulurin Kamomoan se Kama-kama.

3.    DENING MRASA, TANPA TANGLUK NGLUMBAR MANAH ,

Apa ane mekada twara len, Rehning Cening Nu madan kewawa baan Pakenyetan ane Tanpa  Wates,

PAKENYET DEWĒKĒ NIRI ,

       Keto suba, Yan nu madan nyudukang beneh pedidi ,

NGILIS ANGGON SEPAT ,

       Mawesana Puguh stata nto anggon Sulur, Sepat siku panglimbak pengrasena ,

PETENG TEKĒN KECAP ÇASTRA ,

       Tusing lantas taen nyikutang, nyuluhang baan kecap daging Çastra Gamene ,

SOK POLIH KALEGAN NIRI ,

       Rehning Tegep Pengacepe, Apanga sida  nyepukang kalegan Newek ,

TWARA JA NGĒTANG ,

PAKENYET ANAK DISAMPING .

       Lantas Sing Lingu teken Pakenyet anak lenan, ada ne buka ya madan kadang warga, nyama braya, swagotrane disamping .

 

4.    GUMI LINGGAH, AJAK LIU MANRUWĒYANG ,

       Ne Te Cening, Cening Suba Nawang, Gumi Linggah Ajak Liu, liu ajak ane patut ngrajegang, ngukuhin,

PAKARDIN IDA HYANG WIDHI ,

       Nah, Indarang Ja Cening Minehin, Kadi ane suba tami uli ilu, Ngenenin Paswecan Ida Hyang Pramakawi, Ngardi sakeluir Aptyan Manah sane utama ,

ENTO APANG MELAH ,

       Disubane  ada tami maka Upakardin Ida, Apang bisa te jani nginkinin  ane patut ,

DABDABANG AJAK MAKEJANG ,

       Nanging mangdoh saja baan ngundukang padidi, Sidaning sida apang sida sumuyug ajak makejang,

MASRANA LAN LINGING AJI ,

       Nyikiang Unteng Manah, Sukat Sikut ane pastika, tuah medarsana baan Kecapang Çastra, mwang Agama ,

DA NGULAH ĒLAH,LEGAN DĒWĒKĒ TUWUKIN .

Yan dadi idig Bapa , Apan ajak liu pada tureksa, da ngulah laku, pati kaplug, sulurang malu, mapuara sida mabesikan paitungane, da kadropon ngulah ngalih kalegan padidi.

 

Bhakti ring Ajah Guru

PUPUH GINADA

5.        UDUH CENING PYANAK BAPA ,

Nah Cening, Cening Sat Pengantungan Keneh Bapa, Mustikan Bapane anake buka Idewa,

TUHU SAJA BAPA MELID ,

       Anak ya tuah saja buka sinahang Cening, kudu melid Bapa ane jani ,

MITUTURIN RAGAN NANAK ,

       Yan kopa nirgamayang buka bedak suginin keneh Bapane apang sida Bapa miteketin anake buka Cening,

MANGDA SELEG CENING MURUK ,

       Rehning dot keneh Bapa ane tan sipi, mapuara Cening lantas ada madan tongos nglanturang sehanan kaweruhane, yadin muruk adane,

MASEKOLAH JA SELEGANG ,

       Ngincepang sakeluwir peplajahane apang seleg lan nepek teken pengaptine ajak makejang ,

MLAJAH NULIS, NGULIK SARWA DAGING ÇASTRA  .

       Selegang mapauruk sehanan ane patut, tur sandang plajahin, rehning sakalwir peplajahan nto mewit saking Çastra.

6.    BAWOS GURUNE RESEPANG ,

Buka Tuturang Bapa Ibusan, Yan Cening Mapauruk disekolah adane, apanga Cening bisa ngresepang daging tutur I Guru,           ( Sangkaning nto ada lantas kinucap “ GURU PATUT GUGU LAN TINUTIN “ ),

DA JA CENING MAMOYANIN ,

Yan dadi idih Bapa da pesan Cening mamoyanin, apa buin nganti bani tempal  asing-asing wejangan dane I Guru,

BERGAH PANGPANG MARING IDA ,

Buina paridabdab ceninge bani lantas cening tungkas ring uger-uger kadi sang nunas peplajahan,

SINAH KAWON PACANG PANGGUH ,

Rehning parilaksana, paridabdab aketo suba sinah bakal nepukin ane tan rahayu,

DENING SAMPUN LANGGANA ,

Apa mawinan, rehning  Cening suba madan bani langgah langgana, presangga teken sesana,

TULAH JATI, KADI PETENG NYEDA DAMAR .

Maduluran lantas baan Paridabdab lan parilaksanane Nungkalik,

Yan ada ane maparidabdab aketo, kapa Nirgamayang Bapa, buka anak kapetengan nyen nto cening, suba sinah peteng buin misi ngampehin damar utawi lampu, tong sing peteng dedet jagate keto masih paidepanne.

7.    YEN PET PENGKUNG SOLAH NANAK  ,

Nah ne buin abesik cening, Yen ada buka bengkung solah Idewane,

I GURU BAKAT AMBULIN ,

Apa buin ngambres parilaksanan ceninge majeng Dane I Guru,

KUKUH TILAS RING AKSARA ,

Madulur lantas mula ada males cening mlajah mapauruk çastra ,

BEDUK KAWU WASTAN IPUN ,

Nah ne ada pratiwimban Bapa “ buka bedug kawu adane ,

LENGKONG TAN SIDA NGLESERANG ,

Kenken nto Beduk Kawune kaucap, Nah mirib cening suba nawang, buka kawune lantas suba pastika adane, bedug sing suba nyidayangngamenengin lantas, jeg ya tetep bedug,

YAN LESERIN, METU EMPEG DURUS RUSAK .

Yan kadi memaksa ngleserin lantas, Kenken dadine ? Suba lakar Benyah ajur nto cening .

8.    RIRIHE DASARNYA ÇASTRA ,

Nak Tuwah saja nto cening, ririh lan kepradnyanan nto mula çastrane maka dasar ,

NGINCEPANG NEKĒNG RING HATI ,

Rehning bisa madan ningkesang utawi nyulurang ngantos ke Adnyanane,

SALWIRING DAGING PANGAJAH ,

Ane kasulurang sebatek ane madan daging tuturkepatutane, ane mawit uli mapauruk nunas peplajahan ,

BEBAWOS  PAKELING GURU ,

Mawesana baan sehanan daging tutur saking I Guru ,

DĒNING IDA NYANDANG TULAD ,

Pamekas nto ane mahawinan  Guru  nyandang Gugon lan tulad Cening,

DA NUNGKASIN ,  TUWUH NGUDA APA TAWANG .

Apa buin Idewa jani nu Madan cerik yan alihang di yusa lan tuna ane madan kaweruhan .

9.    I GURU RIHINAN NGENTAP ,

Beneh pesan anake kading Idewa ngugonin apa saluwir pituduh  I Guru ane mawinan keto, Rehning Dane I Guru suba Tatas tur maluan madan suba ngentap Indik lan ngrasayang sakeluwirnyane ,

PAKEH LALAH MANIS PAHIT ,

Buka ane madan Rasa, Ncen ane madan : Pakeh, Lalah, Manis, Pahit, Neked ane madan Sad Rasa ( Anake ngorahang ane me Sada-sada rasa ) ,

EDA CENING PARIBOYA ,

Mawinan nto da pesan Cening Pariboya, langgah langgana apa buin pariceda ,

SISYA SESANANĒ TINUT ,

Ane tuwah patut agem cening, tuwah Sesanan sisiane ane stata Nunas kaweruhan lan satinut teken kapitiduhang,

I GURU MAHBAH PEMARGA ,

Buina tuah dane I Guru ane sida Ngicenin Piteket, lan pejalan ane patut,

SULUR URIP,NE TINUT CENING KAWEKAS .

Ane sida lantas tuut cening, nyuluhang Kahuripane selamin cening nu madan katunggun Sang Urip kapungkur wekas .

10.   SEKENANG CENING MELAJAH ,

To keto Cening, Sangkaning Bapa Nuturang apanga Idewa Seleg Malajah,

EDA IMA EDA LEKIG ,

Yan suba ada ane sandang tincapang, da buin ngelen angkuh, apa buin males,

YENING RIRIH NYĒN NGELAHANG,

Nang kenehang malu, disubane ada buka cening kaucap bisa nyen masih ane muponin,

MULA KEWEH NGALIH SULUR ,

Nah mewit sangkaning nto maka jatine, mula sengka, sengka saja baan nyulurang,

PRADĒ PELIH BAAN NYULURANG ,

Nyak lantas pelih baan nyudukang, ningkahang, nyulurang,

NGAMONG URIP, PĒT RUSAK KĒWEH NABDABANG .

Sa enun Iraga madan katunggun urip, nganggon lantas Sasuduk ane tan patut, suba sinah kewehe, Sengsarane kerasayang, tur sing nyidayang buin malikin ke jati mula utawi maka sujatinyane.

 

PARISELSEL MAPUARA BECIK

PUPUH SMARANDHANA

11.   BANGKAH BINGKIH NGUPĒNIN URIP ,

Nah Cening, yan suba lantas ane Madan Kewehe temokang Cening, yadyastun nganti Bangkah matemu Bingkih nyen anake cara ngupapira kahuripane,

NYAWUP GAWE TWARA NGĒTANG ,

Buina tusing kitungan, Tan ngitung sedekan nyemak sarwa gaginane,

HUJAN LAN KEBUS BAENGĒ ,

Adake kadi Ujan lan kebuse tan Gigisan masih Mapuara Reredan, Ngitungan ane ada sandang Utsahayang,

SOK NGRURUH PANGUPA JIWA ,

To, to buka aketo nyen baan ngalih Pangupa jiwa, ngupapira kahuripane,

TONG SIDA BAN MANGENEPANG ,

Tusing masih madan sida baan ngenepang, Nu ya madan kejokan buka sarin pegawene,

PYANAK SOMAHĒ PASLEGUK ,

Ada lantas I Pianak keto masih Somahe  milu ngrasayang Paindikan buke kene, rehning sing sida baan Nanggenin, mawastu ngeling pagerong,

KAWAWA BAAN I BASANG .

Apa ya mapuara keto ? tusing ada lenan, kadi naanang seduk Basangnyane sawireh ada maka sarin gaginane twara sida ngenepang.

12.   PETENG LEMAH SEDIH KINGKING ,

Disubane amonto unduke tepuk, tan jangkayan  lantas buka stata nrasayang engsek, sedih tan gigisan,

MAGALENG-GALENG YĒH MATA ,

Kopa andeang laut, buka larane ane netehin sayan-sayan ngedenan, parisolah, paridabdabe kadi stata matungtung yeh mata,

RASA TONG JADMA NUMADE ,

 Yan kene nyen kerasayang, mrasa nirdon Panumadyane dadi manusa, tan pikenoh,

IDUPĒ KALIPUT LARA ,

Kengin nandang lara, duhkitane kerasayang netehin,

BĒKSANĒ KALINTANG-LINTANG ,

Buina yan keneh-kenehang te ane suba-suba jag rasayang kaliwat-liwat nto paridabdabe lan Pongahe,

BENGANG BENGONG PATI LAMUT ,

Tur sinah suba Bengang-bengong lan pati jlamut, yan ngenehang buka unduke tepuk lamunan jani,

NGASTAWA IDA HYANG WENANG .

Nuukin ane tusing patut, sinah kene penadine, disubane sing buungan laut ngame-ngame, ngobat abit kadi Linggih Ida Hyang Widhi, wesananya eling ring sangkan paraning dumadi, Ngastiti ring Ida Hyang Pramakawi .

13.   RASA TONG SIDA BAN URIP ,

Baan nu Nanggenin sedihe, Rasa-rasayang kadi sing sida nutugang kahuripane ene,

SEDUKĒ TAN KODAG – KODAG ,

Rehning nu madan kagulgul, len buin nanggenin rasa seduk ane setata ngliput,

METU IBUK PAKENYETĒ ,

Tanpa tanggenan saja penadine, metu ibuk, inguh, bingung pakenyetane, ngamong kahuripane dini,

KĒNĒ PELIH KĒTO BOYA ,

Sat asing-asing pidabdabe kasengguh  pelih, kene boya keto tidong,

SEMUNĒ ANGGON NYARUANG ,

Mapan sakit kenehe tur merasa lek teken nyama brayane, ditu laut semitane lantas anggon nyaruang,

KEBKEBIN  YA AJI KENYUNG ,

Pariselsel teken padewekan, apang tan ketangehang baan pisagane, kopa saruang lantas baan kenyung,

JENGAH TANGEHANG PISAGA .

Nto ya mapuara lek, jengah yan kanti yama brayane tahu teken paundukane buka kene .

14.   KIMUD NGAGENDONG PANG SAI ,

Yan rawosang saja, buka paundukane ya madan lek yadin kimud baan sesai ngandelang ngidih-idih,

MANGUMPREG UMAH PISAGA ,

Laut mangencolang kepisaga  apanga maan buina misi  buka pakenyetane,

NYAMA BRAYA PADA BĒRĒ ,

Apa lantas tusing taen ngitungan ada pangwales teken nyama braya, nto makada lantas buka nyama brayane dadi tamped ngitungin I Raga,

PAKEDESIT TWARA NYAKAN ,

Suba kasinahang baan nyama brayane, twara nyakan, rehning pesemengan suba mekebek ngelen angkuh,

SAI NYILIH NGADU BOBAB ,

Disubane lantas, sing buungan ngadokang pongah, maimbuh bogbog, ngalih dedalihan apang maan aji nyilih,

TWARA SIDA BAN MANEBUS ,

Stata nganggo sulur ulian amonto mapikolih, mula lantas saja lengit  buina twara ada magelar, apa dadine ?, len buin apa anggon nebusin ?,

MACĒLĒNGAN BAAN UTANG .

Twara ada ane madan Utsaha, Beg-beg bog-bog  suba nganggo bikas memirat, rumasatnyane idupe nambunang utang .

15.   KUDYANG JANI BAN NGITUNGIN ,

Yan suba lantas kerasayang unduke ane tepuk, kenken jani baan nakehang ,

KADLONGSOK SUBA MACLUBAN ,

Kadi sasonggakane, Buka Benange, kadung suba maceluban, kenkenang buin malikin,

MAMUWUK DAGING TUTURĒ ,

Maimbuh lantas tusing ngugu, tusing lingu, tur stata mamurug  Jeg Joh para sida ngincepang, nyukatang baan tutur Agama,

TAN NUTUGANG MASEKOLAH ,

Kamulan tusing ngugu teken tutur, Mapuara ngambul lantas tusing katutugin masekolah,

SUBA KASĒP MARA NGRASA ,     

Dimara jani laut, nyelsel tur ngrasayang teken dewek kasep, 

RING DAGING AJAH I GURU ,

Maselselan, rehning tan sida nginutin daging  wejangan dane          I Guru ane suba-suba,

LAN RERAMA ANĒ SUBA .

Keto masih sehanan pitutur, piceket ane mabuat mawit saking Guru Rupaka .

16.   PELIHĒ BAKAT TINDIHIN ,

Nah Cening, rehning suba madan inget ane jani, kading parilaksana, paridabdabe ceninge ane suba-suba,

NGULURIN NYETĒ NĒ SUBA ,

Japituwi ada buka kadlongsok ane malu, napkalaning ngulurin Indria, ngukuhin baan ane tan patut,

DUKĒ KANTUN DADOS RARĒ ,

Sada lebian nyemak gegaman, ane twara antes kukuhin, Lenan rawos “ Gaginane anggon plalian, plaliane anggon gaginan “ Tong sing mebalik rare adane,

NUWUKIN NYET MAPLALIAN ,

Mebantang Puguh ngulurin Indria, Seleg baan nyemak gaginan Maplalian ,

ENGSAP TEKĒN GEGELARAN ,

Buka ane odarang Bapa, ulian mebantang baan meplalian, Cening nawang ?! lali nto suba madan engsap, engsap teken gaginan anake dadi sisya,

SOLAHĒ ANGGON MANGRURUH ,

Kengin nto lantas Jugjugang, kukuhang tur kaparidabdabng apanga sida kaisinin,

PANGUPA JIWA KAWEKAS .

Len buin, nto lantas Anggon ngulati sarana pangupapira, nglanturang kahuripane dini di Jagate

17.   UDUH RATU SANG HYANG WIDHI,

Inggih Ratu, Ratu Sasuhunan, Tosning Iratu ngeragaang Sehananin Sarwa Bawa, Meraga Sarin Tatwane sane Uttama wyakti wantah I Ratu ,

GUNG AKSAMA IWANG TITYANG ,

Ledang Suryanin ugi puniki damuh paduka Bhatara,  Nunas Gung Pengampura kengin tityang kadi damuh cokoriratu, sane kalintang tambet

ASUNG PADUKA NĒ MANGKĒ ,

Dumadak asung ledang Ratu Paduka ring Damuh sane lintang kawimudan puniki,

SAKING SUNYATA MASURYSA ,

Mapeweweh sunar, suwar sane sida ngawinang galang Paripurna, twasning nghulun ,

MANGDA ENTEG MANAH TITYANG ,

Gumanti prasida Dedeg, galang apadang, paripurnaning twas tur sida mapikenoh ane patut,

SAHITYA ĒLING RING PATUT,

Semaliha Prasida tatas tur stata eling ring sangkan Paraning Dumadi taler ring KehananDharma / Kepatutan,

DUGI TAN NIKELIN IWANG .

DumadakRatu Prama ledang micayang lantang tuwuh ring dewek tityang, pemekasnyane sida antuk tityang Nampa nyuwun Pican Ratu, nyulurin antuk Paridabdab Dharma Agamane.

 

PANGUNADIKAN URIP

PUPUH  SINOM

18.   YAN  CENING SAYANG RING  RAGA ,

Nah Cening, ada ane jani baan Bapa Nutugang satwan Bapane teken Idewa, sing len  unduk Pangunadikan kahuripane, sat anggon nyugjugang, apa  saja buka idewa sayang kading padewekan,

ANAKĒ MALU TRESNAIN ,

Pamekasnya  ada kaucap, Setonden madan  sida ngagem tresna asih ring anak lenan, konden nyen ya madan nyidayang buka idewa nyulurang kapitresnan,

WANTAH KETO SASULURNYA ,

Nto suba, apanga anake kadi Idewa nawang maka sasikep, sulur ane beneh ngamong Padewekan,

DA CENING IWANG MINEHIN ,

Dimara aketo nyen Bapa nartayang, ane idih Bapa da nyen anake buka cening salah nyalanang papineh ,

ANAKĒ TAN BINA YUKTI ,

Buka pretiwimba ane ada nto Cening, yan cening bisa ngalap tresnan anak, nto patuh  madan idewa sayang  teken padewekan, nah unduke ane aketo sing len ada kasengguh “Tatwam Asi “,

SAYANGĒ RING RAGA PATUH ,

Nah yen pedasang laut Ncen ya madan keto ?, sing ja joh nto teken paukudan ceninge, rehning sasulur ane nyihnayang, baan patuh sayang ceninge  kading padewekan,

SAMI MENGANTEBANG RAGA ,

Mapuara sida paak tur ngantebang, nyihnayang  raga, lan tresna teken cening,

MASUWUH NGUPENIN HURIP ,

Yan suba keto tusing buin ada wicara maendig-endigan, masuwuh-suwuhan ngalih pangupajiwa, ngulati mertanin jagat,

SIDA DURUS, LANTUR MANGGUH KARAHARJAN .

Jeg ja antar, tusing buin ada ane nyantulin, tur sida nemu ane ya madan paras-paros salunglung sarpanaya.

19.   DA DAMANG NGANDAPANG ANAK ,

Nah Cening, pratingkah ane twara pantes gelarang cening, Panglimbak pangunadikane, da pesan cening iju-iju tur kadropon cening  nyengguhang anak lenan ada kadi andapan teken Idewa,

DĒWĒKĒ APANG KAPUJI ,

Gumanti tingkah ceninge lantas nyugjugang Raga, buina apanga stata kapuji, kasumbung adane,

ANAKĒ APANGA NYERAH ,

Pamekas ada Ida dane, nyama braya utawi anak tiosan, apanga kalilih, nyerah, ngandap kasor,

MUCUKANG BENEH PADIDI ,

Keto masih yan ngelah papineh, apanga paling kanggo adane, tusing taen ngitungan  pakenyetan anak disamping,

PATUTĒ MATIMPI-TIMPI ,

Kadi rasa tusing ada lenan buin dini, sida nyihnayang pematut, mapuara  benehe utawi patute ulian padidi,

MAKEJANG YA MAKTA PATUT ,

Yan kakeneh baan Bapa Cening mirib suba nawang, Rehning asing-asing mahurip ada dini dijagate suba ya pada ngaba pematut,

NTO MALU PEDASANG PESAN ,

Indarang pedasang, tatasang, Nah contohin Bapa, apanga sumeken, Ada ya madan sampi, petan ya patut tuwah bisa         “ Ngembek “ yan Jadma cara cening, cara Bapa,  ngrawos pelajahin ane beneh,  da mlajah mapeta,

NYĒN ANAKĒ NYAK ENDIGIN ,

Aab Jagate cara jani lantas, nyen anake bakal edengin, buka angkabang barong somi,

APANG TINUT, SAKITA KAREP IRAGA .

Apang nyak satinut, adung teken keneh iraga ane mapuara masih konden ya saja madan beneh .

  

20.   SEPAT GUMINĒ AREPANG ,

Nah Cening, apanga sing kajorog adane cening maparidabdab, dija-dija nyen cening ada, kudu stata inget teken Sepat siku Pejagatan ane kasengguh Desa Kala Patra,

ENTO MAKA TUNGGUL JATI ,

Dwaning nto  Pamekasnya maka  sujati pangiketan  lan maka sasulur jadmane, 

SEPAT SIKUTĒ PESAJA ,

Masih nto ya maka Sasuluh ane patut, uger-uger panegulan jadmane ane stata kasungkemin dini dijagate,

DA NGĒDĒNGAN SEMU ÇAKTI ,

Nyen tuah cening ngugu buka rawos Bapane, da pati nginggilang dewek, ngedengan kadigjayan, apa buin masemu  cara anak suba andel teken dewek,

BALUNGĒ ANGGĒN NINDIHIN ,

Nyak buin ada mula awak gede ganggas, nanging konden antes tur karwan nto anggon nyulurang pratingkahe ane beneh,

MRASA RIRIH BALUNG BAKUH ,

Tusing ja pelihe dadi  beneh ulian Mrasa teken dewek gde ganggas, pradnyan  kaodarang ulian Balung bakuh, joh para unduke aketo,

ENTO SOLAH  KERAKSASAN ,

Yan keto baan ngundukang asing-asing wicarane, twara len ya madan mucukang tingkah lan parilaksana medasar baan keangkaran utawi tingkah keraksasan,

MWANG SOLAH SATO SUJATI ,

Yan sing pelih saja baan nibakang penarkane, wiwekane, mirib ene ya madan  parisolah buron,

MRASA WERUH, MINAB TONG ADA NGASORANG .

Tusing dadi paungkulin, stata ngaku nawang, ngangken ririh, twara dadi alahang .

21    DABDABANG CENING DABDABANG ,

       Sangkan nto nyen jani cening apanga bisa  maparidabdab, makinkin, metaki-taki  adane,

SEMU SOLAHĒ YATNAIN ,

Abesik ane ya merupa pengawit apang bisa Plapan cening nyulurang pangunadika, smitane kading parilaksanane,

EDA JA NYUMBUNGAN  RAGA ,

Nomor duwane lantas, kudu bisa matilesang awak,  da bes bonggan, banggi teken ane suba-suba,

DENING MĒWEH MANYELEHIN ,

Nah nto mara ya marupa dadwa cening, Nanging yan selehang makejangnyane mirib sada sukil baan ngenehang yan sing mula larapan ada utsaha,

ENCĒN KĒ ANĒ SUJATI ,

Bingung, linglung lantas ngenehang, ane mekrana ? sing len, rehning twah abesik ada madan bongkol patute maka sujati,

NĒ PRADNYAN MIWAH NĒ JUGUL ,

Yan alihang buka melajahe ditu disekolah, mirib elah aluh sida baan nyulurang ane duweg/pradnyan tur ane belog, nanging ring limbak pangunadika dijagate doh para sida narka,

EDA AMPAH CENING MARNA ,

Ditu lantas cening cara mauji, apa mekrana ? sing len anake buka cening, apanga tusing caluh, sing sepanan apa buin ampah nibakang penarka,

LAGUT KATON SAJA DEKIL ,

Pesu ampah lantas, Buina pelih baan cening  marna  ulian kuangan  pangunadika, jeg sada kajorog cening nyacad lagut ya ngenah menyi,

MAPI NGUYUK, PARNAYANG CENING METALANG .

Nyak maimbuh buin buka pengenahnya  ya ne  ngrempuyukang, laut nto lantas tarka cening belog, nang kenehang buka rawos Bapa ituni, nu masih idewa madan kuangan sikut.

22.   ANAKĒ MASEMU BINGAR ,