GAGURITAN "Bhujangga Waisnawa,Artos"

PUPUH SINOM

1.      -    Om Swasti Astu, Inggih, Maka Pamurwaning atur tityang, ngiring Ratu Ida Danè sami, Kaping riyin Gung rena Pengampura tunas tityang, dwaning kadi presangga  purun tityang, mawosang indik sanè kasurat puniki melarapan antuk  Gagitan,  pacang unggahang tityang,

-          Semaliha  kadi  wilangan Pupuh lan lagunyanè napkalaning ngodarang utawi pacang ngènter dagingnyanè pamekas,  wyakti katunan,  tios ring Basa Basitan ipun dèrèng  anut,

-          Rèhning banget kawawa antuk kawimudan tityang, nanging tè meled manahè sanè tan sipi, mawastu metu langgana, presangga  purun sareng mawosang indik,

-          Bilih-bilih pacang ngodarang sanè sampun kasurat jroning Babad,

-          Maka pangawit raris, ngenenin sepemargin Ida Hyang Maha Yati,

-          Tan sah Ida Hyang Maha Yati  lewih, Inggih punika Ida Maparab Rçi Markandèya,

-          Sanè Pecak mawit saking Ida, Maka Lelangitan Pretisentana utawi  Warih Bhujangga Waiçnawa sida tami kapungkur wekas,

-          Inggih Walinin Ngodarang raris, Ring Pengawit sepengrawuhan Ida, tur Kabyaktayang riin ring jagatè, wantah Ida mawit saking Jagat Jawi,

-          Gelisin kata punang  Carita, sida Rawuh ring Jagat Bali,.

2.    -    Inggih, Risampunè Ida wènten Maring Bali Pulina, kairing antuk Panjak-panjak Idanè    

3.    -    Ainggih, Sanè kaceritayang ring Pengawit Pidartanè puniki, tan tios  Kawèntenan duk Sanè riin,

-          Sedaweg durung sida kabawos wènten Jagat utawi pejagatan,

-          Asapunika taler nènten wènten Surya, Bulan miwah Bintang,

-          Kantun suwung, inggian asapunika wantah,

-          Rèhning suwung, Nènten raris sida panggih ciri – ciri antuk tetenger napi malih bisa ngadanin,

-          Maka jejeleg tios paos cenik kalawan anè gede , kopa ya capuh,

-          Pamekas durung  sida kasengguh wènten Manusa,

-          Mawastu raris nènten wènten kajejehin,

-          Selawasè punika Wantah wènten Ida Hyang Meleng.

4.    -    Antuk Kawisèsan Ida sane tan pa wates, tan pa tepi,

-          Mahawinan, sat tan wènten genah sane tan wènten Ida,

-          Tan malih sane sandang kasengsayain,

-          Kadi kaodar iwawu Agung Ngèbekin Jagat, Alit pinih alit saking anè alit,

-          Paragayan Sunya, nanging kabawos wènten,

-          Wènten Sunyanè ring Jagat, Niskalanè gegenin,

-          Kapikantenang nènten panggih, kawyaktianè Ida Wènten,

-          Ring Jagatè sida ngebek yan ring cupekè ida Coloh,

-          Wiwèka tios limbakang   Pangunadika puguh stata ngega, sanè kabawos Sunya wantah mewit saking Sekala utawi Jagatè.

5.    -    Ida Nir Rupam Nir Wikara,

-          Teos Ida Maka Dèwaning Tatwa,

-          Pangejewantahan Sajroning Çastra Windunè lewih,

-          Windu, Ida Hyang Suksma sida ngadakang raris,

-          Antuk Kawisesan sane kalintang Nirmala, Suci tan pa teleteh,

-          Ida Ngawi wenang, sida ngadakang tur manut mawit pangendan Ida Lian kabawos Ida Sang Hyang Widhi Wasa,

-          Kariyinan masedana antuk Nangun Semadi,

-          Kateleban gegelaran Semadin Ida, Raris Embas Jarak lan Kaliki, Jarak Mateges Purusa, Kaliki pinaka Predana,

-          Turmaning pateh kadi Hyang Pretiwi kalawan Hyang Akasa, Wantah asapunika.

6.    -    Manut kojaring Çastra  Utama punika sanè kasengguh Rwa Bhinèda,

-          Kojarnya maring Castra wantah ANG, AH maka Dwi Aksara Suci,

-          Aksara ANG Purusa lan  aksara AH Predana,

-          Petemuan ring Pacepukan Dwi Aksara awor nyihnayang Yasa Kèrthi,

-          Embas Tri Puruça Uttama, Inggih punika,

-          Kapertama Ida Kawistara Hyang Çiwa,

-          Kaping Kalih Sada Çiwa, Kaping Tri Ida Hyang Parama Çiwa,

-          Karuntutin antuk Aksara Suci soang – soang,

-          Inggih punika Aksara ANG, UNG, MANG maka Aksara uttama.

7.    -    Pamurtyan Tri Aksara  Suci, ANG, UNG, MANG, ANG Pamurtyan Meraga Hyang Brahma,

-          UNG Pamurtyan Ida Megara Hyang Wiçnu,

-          Pinguntat Aksara MANG Pamurtyan Ida meraga Hyang Içwara,

-          Tur Punika sampun Kauningin mawasta Hyang Tri Murti, ring Pamurtyan Ida,

-          Teos ring Patunggilan Ida Maka Tri  “ Tri Purusa Jati “,

-          Kèngin Asapunika sanè manut tur munggah, mungguh sajroning, Tatwa Agama,  Wèdha, lan  Çastra Aji sèwosan,,

-          Lantur Nguningayang raris, ri sapanunggalan Unteng kahyun sida ngelarang yoga,

-          Antuk gegelaran Semadinè punika, taler dwaning sampun  saking pangendan Ida  parasida embas Catur Windhu,

-          Maka Pengawit. Sanè embas saking semadin Ida mawasta :

Hyang Murwa Aksara.

2.       Hyang Çakti Sapta Kadwa,

3.       Hyang Rçi Wusurya,

4.        Sang Hyang Guru Paçupati.

D U R M A

8.    -    Gelisin Kata punang Carita, Ring sami sanè embas raris sida ngelarang yoga kadi ketah ngambil pemargi sekadi sane sampun-sampun, maka puaranya asing – asing pateh sida ngawèntenan pretisentana,       inggih punika : Ida Hyang Murwa Aksara sanè ngawèntenan Warmadèwa,

-          Hyang Çakti Sapta Kadwa ngadakang Para Arya,

-          Hyang Rçi  Wusurya sane ngamijilang Tos Rçi Markandèya,

-          Raris Kaping Untat Ida Sang Guru Paçupati, Antuk ketelebang ring sesana taler puguh ngearang  Semadi,

-          Mawastu Sida Ngawèntenang Panca Pandita Nènten wènten tèos.

9.    -    Nglantur ring asapunika, malih raris Ida Hyang Murwa Aksara Nangun Semadhi,

-          Mawesana embas Ida Hyang Semèru  saking keteleban yogan Ida,

-          Tan kacritanan Indik sapemijil Ida Hyang Semèru, Kamulan Ida Kaputra antuk Sang Widagda Pradnyan, Kasuwèn-suwèn Ida Hyang Semèru maduwè putra utawi pretisentana    ,

-          Putran Ida Kekalih bagus-bagus,  apekik tur Wicaksana Pradnyan,

-          Sanè kaping sulung putran Ida Maparab Sang Niata lan kaping kalih kapesèngin Sang Ayati,

-          Kawentenan Ida Sang Niata ngamijilang Ida Sang Mrakandha

10.   -    Taler asapunika Indikè Ring  Ida Sang Ayati Maduwè Putra maparab Sang Prana,

-          Kawèntenan Ida Sang Mrakanda sida manggihin pejatu karma,

-          Sanè dados pejatu karman ida Sang Mrakandha mewasta  Sang Manaswini,

-          Mawit ring punika embas Ida Sang Meparab Rçi Markandèya,

-          Punggelang kata carita, Kasuwèn suwèn kawèntenan Ida  Rçi Markandèya mapekahyunan pacing ngambil anak istri,

-          Sepakon sepekahyunan utawi manggihin jatu karma sane maparab Dèwi Dumara,

-          Pecak Ida Dèwi Dumara sanè tan lian mawit saking jagat  India.

11.   -    Inggih Mangkin Caritayang, Risampunè Ida Rçi Markandèya Jenek Alungguha maring Jagat Jawi,

-          Antuk kasidan Yasa Kerthin Ida, tur lantur presida ngawèntenan Pretisentana utawi Putra kalih diri,

-          Turmaning Putran Ida Makekalih lanang-lanang, Wicaksana, Widagda, Pradnyan, Wibuhing kaweruhan,

-          Tan malih wènten Kasengsayaian   ring Kahyun, kadurus raris, Maka kalih putranè, Kekaryanin Sailèn upakara upacara Madwijati,

-          Inggian punika Putran Ida Kapertama, Maparab Rçi Dèwa Sirah,

-          Lan Ida Bhujangga Waiçnawa, Putran Ida sane Alitan utawi Kaping Kalih.

G I N A D A

12.   -    Inggih lanturang kata punang Carita, ngenènin bantang Carita tan lian kadi Linggih Ida Rçi Markandèya,

-          Risampun Kejanawya jenek ring Jagat Jawi,

-          Risadakala Ida Rçi Markandèya pacang nincapang kawiadnyanan, kawiryan lan kaweruhan malarapan antuk nangun Yoga,

-          Genah Ida Nangun Semadi ring Puncak Gunung Demalung,

-          Rehning Semadin Ida ring Gunung Demalung, nènten puguh, dwaning akèh wènten gagodan, raris magingsir ring Gunung Hyang,

-          Tur ring Genahè punika, utawi ring Gunung Hyang, Malih Ida Rçi Markandèya raris nincapang ngelarang Yoga,

13.       -           Munggwing Kawèntenan Gunung Hyang sane pinaka genah Ida Rçi Markandèya ngelarang semadi,

-          Tan tios Genahè punika katun ring wawengkon Diyèng Wawidangan Jawa Purwa,

-          Rèhning sekantun Ida Ngelarang Yoga ring Gunung Hyang Kahuningin raris,

-          Wyakti Tan sida antuk Ida nyikiang pekahyunan dwaning akèh pisan parupayan gagodanè rawuh,

-          Punika pamekas ngawinang Ida kesah tur magingsir malih ngerereh genah siosan,

-          Tan samandana, Ngundag Pemargi, Pemraginè sane beneng kangin marginin Ida,  Nènten asuwè, jumujug  rawuh ring Gunung Raung.

14.       -           Tan Kawarnan maring Pemargi, Sapenyenengan Ida Ring Gunung Raung  Sisi Kangin saking Jagat Jawi,

-          Drika Malih Raris Ida ngelanturang Nangun Yoga Semadhi,

-          Antuk Pangendan Ida Hyang Pramakawi, mawesana ring genahè punika  prasida pageh, teleb Ida Masemadi,

-          Tur polih waranugraha, malarapan wènten sabda saking byomantaranè,

-          Sanè tan kasengsayain malih munggwing daging Sabda sunyanè, mawit ring Ida Hyang Jagat Natha,

-          Pangejewantahan Daging Sabda Sunya punika, tan tios,  ”Dèwa-dèwa Sang Rçi Idèwa, kapa anè jani Pireng ugi Rawos Manira.

15.       -           Abesik, apang kudu anè jani Dewa luas kema ngerebek Alas,

-          Dadwa, Nto ada wadwa, petak jana,  anak dadi idèwa ngajak nto makejang,

-          Disubanè lantas kedas, galang baan nto alasè olih panjak I dèwanè,

-          No. telu, Nah ditu  manut wiwèkan I dèwa, bisan idèwa ngedum, nanging apanga patuh, paras – paros sarpanaya

-          Saka kitan Idèwa nitahang  panjak, jawat anggon Carik utawi Tegalan, pamekas apanga mapikenoh nto tur sida ngupapira kahuripanè kawekas,

-          Inggian Asapunika renteh daging sabda sunyanè katiba ring Ida Rçi Markandèya sane mawit saking Ida Hyang Purwaka.

S I N O M

16.       -           Ri wawu kadi asapunika kapiragi antuk Ida Rçi Markandèya Pawisik Sunyanè sanè katiba ring Ida,

-          Kadulurin manggihin suar galang sanè nyunarin,

-          Dèrèng Ical  kadi rasa kapingon Pekahyunan Ida  Nyingak Pracihna Teja punika, malih kawuwuhin  antuk ngaksi keasrian Gunungè sanè kapikanten  mabarisan,

-          Nimbang – nimbang sajroning Pangunadika, tan mari mamuji ke Agungan Hyang Kuasa ngardi pakedèp Jagatè, tios  sane ngawè angob sang mengantenan,

-          Kamulan Ida Pascat, Wikan ring Indik, Ciri, lan pracihna,

-          Tur tan Kawasa Ida munggelang kahyun, Sawirèh kadi memaksa cokor Idanè sumangdanè sida Rawuh ring Genah katiba Sunar Punika, 

-          Tan sah Raris premangkin Ida Ngelesuang Yoga Semadi Ida,

-          Ngundag Pemargi ngrereh para sisya sami,

-          Nglintang ring Selag gunung pemargin Ida, jantos Raris kacingak wènten Dèsa.

17.       -           Risampunè rawuh ring genahè punika, manut kadi kepiran orti kapiragi  Dèsa Aga wastanyanè,

-          Dèsa Aga kawastanin rèhning Dèsa punika magenah ring selagan Gunung, pamekas Gunung Raungè punika,   

-          Turmaning Ida Rçi Markandèya  nglanturang memargi  ngenampekang mangda Majanten utawi Tatas,

-          Risampun majanten Rawuh Ida Ring Dèsa utawi genah punika,

-          Taler kadi Para Petak Jana sami uning ri Sang Sanè rawuh, Tandumadè Nyembrama makasami,

-          Kadulurin antuk nyawisang genah malinggih, Majeng Sang Wawu Rawuh,

-          Dèning kawawa antuk Manah Bhakti, tan pariwangdè nyihnayang antuk serdaning kahyun ngelarang Sembah Pangubhakti,

-          Riwus Matur Sembah Pangubhakti, mawesana purun nakènang munggwing sepengrawuhan Ida,

-          Dwaning Nembè, kadi lèdang arsa Singgih Rçi ngrawuhin genah tityang, menawita wènten Iwang antuk tityang maparidabdab ?, Inggih kelèdangan pekahyunan singgih Rçi tunas tityang mangda tityang sauninga.

18.       -           Inggih Riwawu asapunika wènten pitakèn silih sinunggil Sisyan Ida, tan asuwè kacawis raris antuk Ida Sang Rçi,

-          Daging Pangandikan Ida, Uduh Cening Sisyan Bapa Ajak Makejang, anè jani ada baan Bapa nyulurang, kèto masih buat ada petakon ceningè, Nah dong melahang madingehang, bakal kawitang Bapa,

-          Ane Malu sedekan Bapa Nangun Semadhi ditu di Gunung Raung  ada nè tongosè ento,

-          Yan sing Pelih Baan Narka, Mirib kasidan baan Bapa ngelarang Semadhi,tur teleb, puguh, mewastu kabawos molih, larapanè, kadi Sih Ida Hyang Jagat Natha, Melajeng rawuh diadepan Bapanè,

-          Raris Ida Ngrentehang pawuwus Sada Halus Banban nyunyur Manis, anè katiba ring Bapa,

-          Maka Daging nyanè Pamekas Nibakang Pamutus, buina apang kudu pesan Bapa Ngelaksanayang,

-          Tusing  lèn Cara Orahang Bapa Anè jani, Apanga Bapa Ngerebek alas utawi ngabas alas,

-          Pisaratè apanga sida ada Tegal muwah Carik, anggon ngupapira kahuripanè dini dijagatè,

-          Nah Kèto pesan nto Cening, Mahawinantè Bapa Teka-ada dini jani, ngorahin anakè cara cening, Apanga nulungin Bapa Ngabas alas.kadi Pamuwus anè terima Bapa.

19.       -           Tatuwian pesan wyakti, munggwing wacanan Ida Sang Rçi, Kalaning Ngicèn Pawarah-warah teos nyobhahang Daging Pawisik sane katiba ring ida, munggwing patut pisan kasengguh antuk para Sisyan Ida, raris ngaturang Sembah Pangubhakti,

-          Ngenènion ring  daging wecanan Ida,  sami Sisyan Ida satinut jaga ngiringang,

-          Ngiring kadi Pikamkam Ida tur mataki-taki kadi daging wecanan Ida,  

-     Yan Kopa wilangan para Sisyan Ida sane sareng duk punika kirang langkung wènten Domas diri,

-          Kacingak Indikè asapunika, dwaning sami sumuyug jaga ngiring, mawesana lèdang pekahyunan Ida Sang Rçi,

-          Kadulurin wènten sabuh wecanan Ida asapuniki ; Nah Cening, Yan  Suba manut, tur sumuyug ajak Cening makejang, apa buin,

-          Da suba buin ngantosang galah  buin mani, lautang anè jani mejalan,

-          Ring Pemargi Ida Sang Rçi pinih riyin, dados Pamucuk ring Margi,

-          Pemarginè ngatuju Gunung raung sisi kangin,

-          Utawi ngungsi sisi kangin jagat Jawi punika.

D U R M A

20.       -           Inggih Tan kacaritanan Sepememargin Ida Rci kairing antuk para Sisyanè sami,

-          Kacarita mangkin Ida sareng Sisyan Ida sampun rawuh ring genah sane katuju,

-          Sarauh Ida ring genahè raris mesandegan abosbos sinambi Ida ngrentehang Wacana,

-          Daging Wecanan Ida, Nah Cening – Cening Sisyan Bapa Ajak makejang,

-          Jani suba madan neked Pejalanè buka rawos Bapanè Imalu , Cening Bakal ajak Bapa Ngabas Alas, anè twara lèn Alasè enè suba jani Bresihin Abas,

-          Nanging anè Idih Bapa sumangdanè apang Cening stata prayatna, napkalaning magarapan.

21.       -           Inggih Punggelang Carita, Kasuwèn-suwèn, Sesampunè akèh Kayu lan sehanan Entik-entikanè kabas, Mawastu Banget duka tur nibakang Pamiduka Ida Hyang Prama Kawi, dwaning tan wènten  maduluran Upakara lan Upacara,

-          Penadosanya Sisyan Ida akeh keni duka,

-          Napi Mahawinan, Rèhning kadi kaodar iwawu Nènten wènten Wangsit, nènten wènten penyatsat, lan Penyapuh, jeg sampun ngabas alas,

-          Punika maka wiwit, Ida Hyang sane ngwasa-ngwasi alas niwakang Wara Bencana, Panyengkalèn,

-          Mawastu akèh Sisyan Ida Sang Rçi Mangemasin, tanpa larapan,

-          Tios malih, Wènten keni Bancana, lan Kasarap antuk buron sedekan ngabas alas.

22.       -           Uning ring Sisyan Ida Akèh keni Bencana lan Kageringan, Tandumadè Ida Sang Rçi ngrentehang wecana, turmaning nyandag Sisyan Ida sedekan ngabas,

-          Wecanan Ida, Uduh Cening-cening sisyan Bapa ajak makejang,

-          Pangedih Bapa, Da pesan Cening buin Nutugin, Suwud nyen malu Cening Ngabas,

-          Yen Kènè undukè mirib, Tan Gigisan  Bapa Keni Kadukain  antuk sang Ngwasa-ngwasi Genahè enè,

-          Mapuara buka lantas Nton Bapa,  Penyaman Ceningè Liu anè Ngemasin,

-          Nanging Da Cening Sumandangsaya, Nongos Cening Malu dini, Bapa lakar mewali ke Gunung Raung, Mapinunas, Nunas Pemayuh.

23.       -           Riwus Mawecana asapunika, Ngraris memargi pacang ke Gunung Raung, Mawali Nunasang Malarapan antuk Nangun Semadhi,

-          Sepemargin Ida Ninggal sisyanè sami, kasarengan antuk Pinandita sami,

-          Maka Tatuwek manah Ida, Nunas Ica Ring Ida Sasuhunan,

-          Rehning, Napkalaning Ida Ngrebek Alas, Akèh Sisyan Ida keni Kasengkalan  mangguh Baya pati, punika mahawinan Ida Malih Nunas Ring Ida Sang Hyang Embang,

-          Digelis Ida sida Nyikiang Kahyun tur Uleng ring Pengaptinè, Tan Jangkayan wènten Pamuwus Sabda mawit saking ambaranè,

-          Pamuwus Sabdanè katiba ring Ida Sang Rçi, Inggian asapuniki sabdanè “ Uduh Cening-cening  Rçi Markandèya, Patut pisan I Dèwa miragi bawos Maniranè.

G I N A D A

24.       -           Inggih Kapa lanturang tityang ngodarang, kadi daging Sabda Sunyanè, Nah Dèwa-dewa Rçi Markandèya I Dèwa, boya asapunika,

-          Kudu anè jani buin Manira  mapetinget teken Idèwa, sawirèh Swakaryan Idèwa pelih tusing ja gigisan,

-          Anè mapuara buka Parilaksanan Idèwa ngurugada, Ngawag-ngawag ngabas alas,

-          Cara Idèwa tusing nawang, kasengguhang asing-asing tongos, genah dini dijagatè, tuah ada anè ngwasa-ngwasi, buina tusing bedik parupanyanè,

-          Ditu Lantas Idèwa bani ngawag-ngawag maparilaksana ngusak-asik, Nto larapanè Sang dadi Panunggu, ngardi Mrana tur Nyengkalèn Sang kasengguh purun ngawag-ngawag Ngabas alas,

-          Dadi anè jani, suba lantas karasa ban singsal parilaksanan Idèwa disubanè liu para panjak ngemasin, Nto nyèn suba Ciri, Cihna Sang Nunggu Dangkanè ditu sanget nandang kamurkan.

25.       -           Nah Cening, Cutetang Manira amonto, Rèhning Cening Suba masih nawang unduk, tur Patutnè anè jani apang sida Cening ngaturang Pemayuh, Masarana baan Yadnya,

-          Apang beneh baan Cening ngadakang, ngaturang Yadnya, Kapertama Upakara Guru Bendu Piduka keastawang Malu,

-          Nomor dua lantas, Bhuta Yadnyanè, Inggian Caru Pangruwak, Penyapuh, Penyasab Mrana, Nah disubanè pragat maka duang palet Yadnyanè, Lantur ngelaksanayang Dèwa Yadnya Saka sidan Idèwa, Pamekas Marisudha, Mayuh Jagat.

-          Yan Suba  Akèto Sinah Mangguh Hayu Idèwa ajak makejang,

-          Nanging Apanga saja Yadnyanè kelaksanayang nekèng tuas, medasar  Kenirmalanan Kahyun,

-          Muponin Kerahayuan, Mangguh Hayu, Paras-paros Sarpanaya, Salunglung Subayantaka, Mara lantas buin lanturang ngabas alas.

-              

P’Goeg, Peguyangan Kangin