GAGURITAN "Dewa Yadnya"

PUPUH JAYENDRA ( Salėndro )

     

     

1.    Swastiastu,

Pengaksamane

Gelarang Ring Çanti,

Ainggih maka Purwaning atur Tityang, malarapan antuk ngunggahang kara kalih, Ngastiti majeng Linggih Ida Sasuwunan, “Om Swastiastu”,

Pranamnya Ledang Asung ,

Dumogi Asung Kerta Wara Nugraha Ida, durus Micayang Kerahajengan,

Antuk Baktya Kabuatang .

Antuk Darsana mangda Stata kabuatang, pamekas nyinggihang Pangubaktine majeng Linggih Ida.

2.    Mangkin Lantur,

Gagelare,

Nyrita Tutur Wyakti ,

Inggih nglantur mangkin jaga kawitin tityang, nyritayang tutur  pakardin Ida Sang Kawi,                         

Ring Sang Oneng Kalulut ,

Ping ajeng Ring Ida Dane sane Oneng miarsayang  daging sane kapidarta puniki, dumugi sida raris muwuh ledang kadedegan kahyun,

Madasar Kahyun Nirmala .

Wantah samatra. Nanging kedeh pekahyunane mangda wenten anggen piranti sajroning kahuripane, asapunika taler majeng Ratu Ida Dane sang ngwikanin, wesananing atur  wantah    antuk  kahyun sane Nirmala tanpa teleteh.

P’Goeg.

” DEWA  YADNYA ”

Pupuh  Sinom

1.   Sane Mangkin Kahaturang ,             

Inggih sane mangkin Ungingayang tityang, maka daging sane kasurat tur  sampun ketah  Ratu Ida Dane uning, Indik napi punika ? durus,

Indik Panca Yadnya Yukti ,

Boya wenten seos maka pakebat kapidartayang, kawentenan Paos Panca Yadnyane sane luwih tur stata  Singgihang,

Panca Maarti Lelima ,

Saka  palet Panca Yadnya kaunggahang, Panca sane kapitegesin antuk lelima,

Yadnya Korban Sane Suci,

Lantur paos Yadnya, inggih punika, Sapailen Upakara, Upacara sane kalaksanayang madasar Kanirmalaning Pakahyunan,

Maring Dewa Pitra Reçi,

Manut Kadi Tetuwek Gagelare, Kaping singgih  kaastawa  majeng Ring Para Dewa, ring Para Pitara lan kaping Tiga Majeng ring para Reçi,

Manusa Lan Bhuta Mungguh ,

Kaping empat raris gagelaran Yadnyane, kalaksanayang wantah ngruwat leteh mala petakan I Manusa,  nglantur ring palet  ping untat  sajronig  Panca Yadnya, Yadnya sane  katur ring para Babhutane,

Ngiring Mangkin Laksanayang ,

Kudu asapunika maka kawyaktine, ngiring mangkin tincapang manut gagelare ngelaksanayang Yadnya,

Saking Manah Ne Sujati ,

Nyugjugang Gagelare, Ngelarang Yadnya, Pastikayang reke antuk Serdhaning Manah Ning Nirmala tan pateleteh,

Mangda Patut, Sane Mangkin Kapilahang .

Sumangdane tan lempas ring tatuweke, Sane mangkin jaga aturang tityang pariindiknyane saka Palet pacang Uningin Tityang.

2.   Kapertama Dewa Yadnya ,

Inggih ring Pah Palet Panca Yadnya, Kengin Palet Kaping Singgih Uningayang Tityang, wantah Paos Yadnya sane kaastawa majeng ring Para Dewata,

Korban Tulus Miwah Suci ,

Inggih punika maparidabdab sajroning Nglaksanayang Yadnya, Nekeng Twas tur Madasar antuk kahyun nulus,

Mantuk Maring Para Dewa ,

Antuk pengapti Sumangdane  tumus daging Pengastawane majeng ring para Dewa ,

Sinar Suci Sang Hyang Widhi ,

Mungwing Ratu Ida Dane sampun ngwikanin, Dewa wantah peragayan Sinar utawi Swar Suci,  sane mawit sangkaning  Ida Hyang Parama Kawi ,

Tri Sandhya Maka Ciri ,

Tios maka ciri  sane pastika sampun kacumponin sareng sami, sajroning Tri Sandhya   maka Cihna ,

Miwah Puja Wali Iku ,

Malih rikalaning Yadnya sida  karuntutin, kalanturang, turmaning  nincap Gagelare ring Puja Wali  ,

Makarya Pura Merajan ,

Lian malih sida antuk ngaryanang genah Pamujan, Pura, Merajan mangda sida uleng Pekahyunan Ngrastiti Ida,

Nika Sami Cihna Bhakti ,

Punika sami Daging Gagelare wantah nyugjugang rasa sajroning Idep taler Nyihnayang Pangubhakti majeng ring Linggih Ida ,

Umat Hidu, Sane Wenten Maring Jagat .

Pamekas Umat Hindhu Tirtane sane wenten ring Sajebag Jagate puniki .

3.   Ngawit Wenten Dewa Yadnya ,

Wesananing Wesana maka Wiwitnya sangkan Wenten Dewa Yadnya pacang Uningayang tityang ,

Sangkaning Tri Rna Puniki ,

Kadi sane mungguh sajroning Çastra Aji, wantah tatelu maka Wit Kapiutangan  Sang Manumadi Dados Jadma,

Dewa Rna Utang Ring Dewa ,

Kaping Siki  Palet Dewa Rna,  Kapiutangan Iraga majeng Ring Para Dewata ,

Lanang Istri Patut Bhakti ,

Raris Serdhaning Kahyun Subhakti, Lanang Istri Patut Nyinggihang Pangubhakti ring sekancan Pangendan Ida,

Krana Jagat Kardin Widhi ,

Napimalih  sekancan sane wenten puniki wantah Ida Hyang Parama Kawi sane Ngupakardi,

Walungan lan Sarwa Tumbuh ,

Ngantos Sarwa Buron, Wewalungan lan Sarwa Prani sane kabawos entik-entikan taler Kawiçesa antuk Ida,

Sane Madwe Tri Pramana ,

Nanging wantah sane maduwe Tri Pramana Patut Naur, antuk Bhakti lan Yadnya ,

Wantah Manusa Sujati ,

Pamekas sane kawawa antuk Tri Pramana, Kawentenan I Manusa wantah, munggwing I Buron  Dwi Pramana, Entik-entikane Eka Pramana,

Sane Patut, Nangun Yadnya ring Dewata .

Mahawinante I Raga sareng sami tosning  kawawa antuk Sabda, Bayu lan Idep, patut naur, nginkinin Nangun Yadnyamajeng ring Para Dewata .

 4.  Tatuweke Kahaturang ,

MunggwingTatujone utawi tatuweke  sajroning  ngelarang Yadnya, tan lian punika jaga pidartayang malih ,

Rasa Hormat Miwah Bhakti ,

Selamin Iraga kantun katunggun Sang Hyang Urip, Mangda stata eling sajroning Pangrasane Nyinggihang Kawentenan Ida, Nyudukang Pangubhaktine ,

Mantuk Ring Para Dewata ,

Semaliha Sulure mangda patut, kadasarin antuk Ning Nekeng Twas, asing-asing ring Pengaptine ,

Manusa Utama Jati ,

Kadi Kasengguh ring Jagate, Manut Taler sane mungguh ring Çastra Aji, wantah I Manusa pinih  utama maka Pakardin Ida ,

Kawentenan Maring Gumi ,

Tan lempas raris wantah Iraga patut Maridabdabang, majalaran nguparengga, Niyagayang  asing-asing Pakardin  Ida sane wenten driki ring Jagate ,

Jadma Sane Patut  Nahur ,

Rehning sekancan Pidabdabe, Napi malih kalaksanayang Nekeng hati, punika sat winaluyane maka penahurane ,

Antuk Bhakti Miwah Yadnya ,

Bilih – bilih raris sida ngelarang Silih tunggil Yadnyane, Utama kengin kinucap Bhaktine

Keajegang Tat Twam Asi ,

Masulur raris wenten  Pikamkam, kanjekan Ngremba pakaryane antuk Salulung Subaya Antaka, Sinah sampun tan lempas ring Dasar Among-amongane Ngindikang Kadi Tat Twam Asi ,

Sane Tuju, Masyarakat Jagadhita ,

Rehning sareng sami, Napi malih Sekantun Nuluh Rurung Mahuripe, Meled pacang ngemangguhin  Tata Titi Tentrem Raharja .

5.   Malih Tityang Ngelanturang ,

Inggih kadi Pengaptine, Dumadak tan wenten Piambeng, lanturang tityang malih nguningayang ,

Dina Sane Pinih Becik ,

Sulur Rahina Mangda Nepek ring tatuwek Gagelare, tur nganutin Bacakan Dawuh, Pingajeng Rahinane sane pinih Utama  Nincapang Yadnyane

Nglaksanayang Dewa Yadnya ,

Napi malih Gagelare pacang Ngelarang Dewa Yadnya, kudu nepek Ring Dauh, Dewasa sane  Pastika Becik , Mangda tan Nirdon  kadi Utsahane ,

Buda Cemeng Çiwa Ratri ,

Kaping Singgih  Galah Rahinane Ngelaksanayang Dewa Yadnya, Gumanti Sidaning Don tur nyujur Pengastawane ring Linggih Ida, Kangkat Rahina Buda Cemeng Çiwa Ratri .

Buda Kliwon Anggar Kasih ,

Manut ring Panguleng  sajroning punika kangkat taler ring Buda  Kliwon Anggara Kasih ,

Purnama Malih Kahatur,

Malih Sajroning Bantang Asasih Galahe Kinucap Becik, Wantah Nangken Purnama tan lian ,

Saraswati Tumpek Ika ,

Tios malih pinaka Galah ngemargiang Yadnya ring para Dewa taler kangkat nangken Saraswati, Nangken Tumpek malih kepatutang ,

Kasarengin Kahyun Ening ,

Sami punika mangda masedana Kenirmalan Pekahyunan sane tan mari ,

Sami Iku, Ayu Anggen Dewa Yadnya .

Sekadi sane sampun kaunggahang sami, ngenenin ring Galah, Wyakti Ayu Nulus Pacang kanggen ngelarang Dewa Yadnya

6.   Tata Cara Dewa Yadnya ,