GAGURITAN Segara Rupek

SINOM

1.    Om Awignamastu Namo Sidham, Atur Pengaksama Riyin, Majeng Ring Hyang Suksma, Miwah Ring Bethara- Bethari,Lan Leluhur Tityang Sami, Sane Mor Acintya Sampun, Mangda Tityang Luput Ring Tulah, Ring Mala Pataka Sami, Tulus Lunas, Kula Gotra Sinamiya.

2.    Tityang Nunas Gung Ampura, Dening Purun Tityang Ngurit, Daging Pustaka Uttama, Dane Dahating Kapuji, Sidhi Mantra Tattwa Makadi, Madak Ida Sweca Asung, Ngicenin Tityang Nugraha, Sida Antuk Tityang Ngurit, Unjuk Lungsur, Tan Kacakra Bawan Ida.

3.    Ngawit Tityang Nyaritayang, Ambek Ida Mahamuni, Ida Dang Hyang Sidhi Mantra, Maduwe Putra Adiri, Bang Manik Angkeran Nami, Luwih Uttama Ida Tuhu,  Warni Pekik Paripurna, Krana Ida Dang Hyang Asih, Ida Bingung, Pradene Tan Kapanggiha.

GINADA

4.    Tan Kocapan Lulut Ida, Kala Dang Hyang Wenten Ring Jawi, Putrane Nenten ring Griya, Suwe Sampun Nora Rawuh, Rika Ida Empu Dang Hyang, Dahat Sedih, Bingung Kahyune Tan Sipya.

5.       Karuruh Ida I Putra, Kadesa Desa Kaslisik, Nenten Taler Kapangguha, Raris Ngregep Ida Empu, Ngelarang Pangranatika, Nunggal Budhi, Miwah Mantra Kecaksusan.

6.    Sakeng Adnyana Uttama, Putran Ida Sida Panggih, Keni Baya Ring Pulina, Turan Sampun Dados Awu, Sayan Kosek Kahyun Ida, Nangis Sedih, Krana Asihe Maputra.

DURMA

7.    Puput Ida, Empu Dang Hyang Mikahyunang, Jagat Baline Kaungsi, Panyujur Pura Basukya, Ngetut Margin Putra Ida, Tan Carita Ring Pemargi, Sampun Prapta, Awu Madugdugan Panggih.

8.    Miwah Ganta, Ring Sisin Awu Punika, Ida Empu Tatas Uning, Gentene Kaelingan, Nika Wantah Druwen Ida, Ki Bramara Kapesengin,Kapastika, Putran Ida Sampun Newati.

SMARANDHANA

9.    Kosek Ida Mikahyunin, Ring Indik Lina I Putra, Salah Janten Pemargine, Mawinang Cening Kadilah, Olih Sang Hyang Naga Raja, Gentane Kaambil Sampun, Sane Dahat Sidhi Uttama.

10.   Ida Empu Ngelanturin, Pamargine Gagisonang, Pedek Tangkil Pengacepe, Rawuh Ring Ajeng Ningguha, Inggih Raris Kadabdabang, Kadi Sane Sampun Sampun, Nguncarang Mantra Uttama.

GINADA  BASUR

11.   Daging Mantra Kauncarang, Nuhur Ida Hyang Basuki, Samput  Puput Pula Palya, Suwe Ida Nenten Metu, Antuk Bendun Ida Lintang, Dening Eling, Swaran Genta Ngapus Ida.

12.   Empu Dang Hyang Sampun Wikan, Raris Malih Mangastuti, Koduluran Asta Puja, Basukih Astawa Runtut, Miwah Utpti Stiti Mantra, Kadulurin, Swaran Gentene Uttama.

DURMA

13.   Raris Medal, Sang Hyang Basukih Kabangan, Ida Hyang Empu Keaksinin, Ida Empu Ngemaranang, Mamekul Dahat Pranamya, Mengampura Ngatur Bhakti, Mangda Bethara, Asung Kreta Wara Nugraha.

GINADA

14.   Daging Atur Singgih Bathara, Kirang Silan Tityang Yukti, Rehning Tityang Sampun Tatas, Mawit Sakeng Putran Ingsun, Hyang Bhatara Menggah Duka, Ledang Ugi, Bhatara Mengampurayang.

15.   Ratu Paragayan Maha, Ngaksi Solah Kawon Becik, Miwah Meraga Penyayang, Nista Madyatama Tuhu, Tanpa Ceda Luhur Dahat, Asih-asih, Ida Empu Mangandika.

16.   Mangkin Sane Lungsur Tityang, Ledang Ratu Manguripin, Panjak Ratu Putran Tityang, Tuntas Dosan Ipun Sampun, Pramana Kanggen Manawur, Ledang Ugi, Atur Tityange Linggihang.

17.   Wantah Putran Tityang Nunggal, Sane Pacang Manglanturin, Ri Sampun Murip Katurang, Mangda Manjak Ring Iratu, Tan Malih Laksana Corah, Anut Bhakti, Daging Tuduh Hyang Bhatara.

PANGKUR

18.   Lami Bathara Mameneng, Tan Ngemedalang, Pangndika Yukti, Prabhawane Remrem Ngun-ngun, Antuk Banget Kasungkawa, Puput Ngyunang, Sinampura Sampun Katur, Raris Bhatara Ngandika, Nyarca Momo Ida Bang Manik.

19.   Uduh Empu Bekung Nanak, Krana Nira, Nyedang Putran Cening, Langkung Pisan Dosan Iku, Purun Langgana Ring Nira, Corah Pisan, Ugat Nirane Kaputus, Ento Krana Mangemasang, Ojo Cening Walanghati.

SINOM

20.   Yan Inanak Saja Sarat, Putran Nnak Sida Murip, Yaning Sida Nnak Ngwalyang, Jati Mula Ugat Mami, Misi Lamun Acep Cening, Panikan Bhatara Asru, Ida Empu Manyawisang, Pranamya Ngaturang Bhakti, Inggih Ratu, Manut Bawos Tityang Syaga.

21.   Yaning Kangkat Atur Tityang, Genah Mula Mangda Gingsir, Patut Ring Murda Kahyunang, Mangda Tan Mangundang Wisti, Makadi Pidabdab Mangkin, Bagus Manik Seda Ipun, Melede Ring Arta Brana, Wiweka Corah Mamurti, Yan Ring Prabhu, Genah Ratna Sira Wania.

KUMAMBANG

22.   Turan Sida, Makeber I Ratu Pasti, Tan Manut Ledangan, Ampurayang Tityang Ugi, Bhakti Manah Larapannya.

23.   Puput Ida, Matur Mangabhakti Aris, Bhatara Mirengan, Atur Empu Dahat Yukti, Naneng Bos-bos Mangandika.

DURMA LAWE

24.   Uduh Nanak, Yan Mangkana Kaaptinta, Ingong Suka Mamiarsi, Panikan Bhatara, Puput Babawosan Ida, Raris Empu Ngedabdabin, Ngelar Puja, Miwah Mantran Sane Sidhi.

25.   Manunggalang, Adnyanan Ida Uttama, Wiswakarma Ke Astuti, Ida Kanggeh Unagya, Irika Ring Swarga Loka, Sampun Tegep Pujastuti, Pangastungkara, Ida Empu Gelung Kardi.

26.   Magaruda Mungkur Macandi Kurungan, Makundala Manting Manik, Sekar Taji Dulurnya, Langkung Luwih Kekantenang, Gelung Agung Puput Yukti, Karangsuk Ida, Bhatara Sang Hyang Basukih.

27.   Kabinawa, Muncrat Prabawan Ida, Turan Sida Miber Mangkin, Ledang Kahyun Bhatara, Sapuput Asapunika, Layon Ida Bang Kahurip, Tan Kacrita, Sampun Nyeneng Ida Bang Manik.

28.   Sesampunya, Nyeneng Ida Bang Angkeran, Eling Ida Tur Melaib, Ajine Mangetutang, Sampun Sida Kekeniyang, Kagambel Ida Bang Manik, Sinarengan, Ring Bhatara Pacang Tangkil.

GINADA

29.   Manut Maring  Pasubaya, Kahaturang Ida Bang Manik, Nyraka Ring Ida Bhatara, Ngayah Ring Basukyan Lantur, Rawuhing Kapungkur Wekas, Langkung Mangkin,Ledang Kahyun Sareng Rora.

30.   Wireh Sampun Sida Karya, Sakeng Sidyan Sowang Kalih, Ida Bang Prasida Waras, Ugat Bhatara Purna Sampun, Wit Sangkaning Empu Sidya, Puput Mangkin, Suksma Katur Ring Bhatara.

DURMA

31.   Ida Sang Hyang, Naga Raja Manywecayang, Mangastungkara Mamuji, Ngandika Uduh Nanak, Yukti Sidhi Adnyananta, Wenang Kita Salin Nami, Mawiwitan, Japa Mantran Nanak Sidhi.

SINOM

32.   Ngawit Sakeng Mangke Nanak, Sidhi Mantra Bhisekan Cening, Uwus Empu Bekung Nanak, Pomo Mantuk Kita Mangkin, Moga Dirgha  Hayu Cening, Panikan Bhatara Asru, Rarais Miber Nuju Swarga, Ida Dang Hyang Mangubhakti, Ngawit Puniku, Mabhiseka Sidhi Mantra.

33.   Sadurunge Ida Dang Hyang, Budale Ka Grya Jawi, Ida Ngicen Piteket Putra, Uduh Cening Jwitan Aji, Aji Pacang Mawali Cening, Idewa Iriki Kantun, Ngiringang Ida Bhatara, Manut Pasubayan Aji, Cening Tan Rungu, Indik Ragan Cening Pecak.

34.   Kadilah Antuk Bhatara, Kantos Geseng Awu Dadi, Cening Langgah Nigas Ugat, Kerana Bhatara Sengit, Aji Kedahating Sedih, Mangda Cening Sida Hidup, Ledang Bhatara Nugraha, Mangkin Sida Cening Murip, Puput Lantur Aturang Aji I Dewa.

35.   Ngayah Ring Ida Bhatara, Puput Driki Ring Basukih, Daging Bawos Aji Nanak, Yan Cening Pacang Mawali, Mantuke Kajagat Jawi, Solah Sinah Wali Dangu, Jani Dini Jenek Nanak, Bapa Dawak Pacang Mwali, Ne Pamuput, Oja Dewa Salit Arsa.

GINADA

36.   Warah Aji Pikahyunang, Rehning Bobot Sayang Aji, Lanturang Subhaktin Dewa, Ngayah Ring Toh Langkir Gunung, Yan I Dewa Pacang Rered, Linyok Aji, Tan Manut Ring Pasubaya.

37.   Malih Aji Mapawarah, Dewa  Polih Ninggal Urip, Rarais Cening Kaprayascita, Sida Hurip Kaping Roro, Madwijati Kaharanang, Wenang Cening, Ngemargyang Ke Panditan.

38.   Miwah Patut Kutamayang, Midabdabin Jagat Bali, Ngwehin Warah Agama, Mangda Sida Manggih Hayu, Saking Mangkin Kayang Wekas, Anut Bhakti, Nyuwun Paswecan Bhatara.

DURMA

39.   Mangda Dewa, Tan Marenang Midabdabang, Saupakarane Dini, Ring Pura Basuki Ya, Miwah Linggih Hyang Bhatara, Bawos Ida Dahat Aswi, Ring I Putra, Ida Bang Manik Sairing

40.   Ne Siwosan, Malih Wenten Kawisikan, Ring Daging Gagelar Suci, Panguncaran Weda Mantra, Bang Manik Puput Ke Warah, Ajin Ida Maninggalin, Praya Mewalya, Gunung Teluk Biyu Ka Margin.

GINADA

41.   Serawuh Ring Gading Wanya, Wengkon Bali Miwah Jawi, Maring Ida Sira Gang Hyng, Eling Ring Putrane Tuhu, Ngun-ngun Kahyun Ida Dang Hyng, Janggel Margi, Arsan Ida Ngelar Yoga.

42.   Sida Manggih Keraarjan, Jadma Miwah Jagat Sami, Miwah Putrane Katinggal, Wenten Genah Kapikahyun, Katah Genahe Tatiga, Tirta Suci, Sami Pada Mahuttama.

43.   Tan Carita Margin Ida, Ida Dang Hyang Rawuh Mangkin, Ring Pegatep Bali Jawa, Sane Pinih Ceking Iku, Ida Dang Hyang Mikahyunan, Ida Bang Manik, Ring Kamomwan Sane Lintag.

44.   Metu Kahyune Sumandya, Pardene Ida Bang Manik, Makahyun Wali ke Jawa, Nika Banget Kapikahyun, Olih Ida Sira Dang Hyang, Dening Eling, Sumaya Ring Ida Bhatara.

45.   Rika Dang Hyang Sidhi Mantra, Ngelarang Yoga Maganti, Salek Nyantos Kaping Tiga, Magingsir Ngastawa Hyang Çiwa, Baruna Geni, Mangda Ida Manywecanang.

GINADA BASUR

46.   Sampun Kicen Panugrahan, Cekinge Kagores Raris, Antuk Těkěn Ida Dang Hyang, Magejeran Toya Ngrudug, Turan Menados Segara, Kantor Mangkin, Kabawos Segara Rupek.

47.   Sida Sami Keraharjan, Jagat Bali Miwah Jawi, Katurunan Sang Hyang Dharma, Manggih Rahayu Kapungkur, Wenten Bisaman Bhatara, Durus Mangkin, Dareng Sami Mangelingang.

48.   Pamekas Warih Bhatara, Ngetahun Ngaturang Hutti, Nista Madya Mahuttama, Ring Baruna Gni Katur, Pulina Mwang Bali Banten, Mangda Suci, Linggih Ida Para Dewa.

PUCUNG

49.   Singgih Ratu, Rawuh Riki Puput Katur, Dagingnya Pustaka, Sane Dahat Pingit Suci, Margin Laluhur, Ida Dang Hyang Sidhi Mantra.

50.   Tityang Nglungsur, Gung Ampura Ring I Ratu, Ring Pamiarsa, Mnawi Tan Manut Ring Daging, Puput Atur,     Om Çantih, Çantih, Çantih, Om

Olih :

Man P’Goegs, Peguyangan

Warsa : 2004