GAGURITAN KAPI PARWA

OM SWASTIASTU

PUPUH  SINOM

1.          Wenten Reçi Putusing Sastra,

Mapuspata Gotama Rçi,

Teleb Ngelarang Ajaran Brahma,

Mangkin Malih Nangun Semadi,

Ring Tukad Gangga Sane Suci,

Nuju Dina ne Ping Pitu,

Kancit Rawuh Sang Hyang Indra,

Nganugrahin Widyadari,

Dahat Ayu,

Dados Rabi Sang Gotama.

2.          Risampun Lebar Yogan Ida,

Dahat Ledang Kayun Sang Reçi,

Polih Pican Sang Hyang Indra,

Widyadari Sang Naraci,

Raris Sang Reçi Ngebakti,

Maduluran Kukus Harum,

Mwastu Musna Sang Hyang Indra,

Munggwing Ida Sareng Kalih,

Raris Mantuk,

Ngulati Pasraman Ida.

GINADA

3.          Pirang Warsa Sang Begawan,

Ring Pasraman Sareng Rabi,

Dahat Ledang Maka Ruwa,

Nanging Mangkin Sampun Dawuh,

Naraci Rabin Sang Begawan,

Pacang Mwali,

Ke Swargaloka Ajebos Pisan.

4.          Singgih Ratu Sang Begawan,

Tityang Nunas Pamit Mangkin,

Mogi Ratu Nywecayang,

Lintang Kangen Tityang Ratu,

Mangda Polih Budal Ke Swarga,

Dahat Asih,

Sang Begawan Ngalugrayang.

5.          Sang Naraci Raris Memarga,

Betara Surya Kapanggih,

Metu Kasmaran Betara,

Sareng Kalih Ledang Kayun,

Sang Naraci Mwali Budal,

Ndatan Lami,

Sang Bali Embasang Ida.

6.          Kaping Rwa Caritayang,

Sang Naraci Ke Swarga Malih,

Kacunduk Betara Indra,

Taler Kasmaran ring Sang Ayu,

Sang Naraci Raris Kajamah,

Mobot Raris,

Ngawentenang Sang Sugriwa.

SMARANDANA

7.          Okan Ida Sareng Sang Reçi,

Dewi Anjani Wastan Ida,

Maka Tiga Luwih Pisan,

Subakti ring Aji Biyang,

Mwastu Banget Kesayangan,

Risampune pada duhur,

Kaicen Mantra Mottama.

8.          Carita mangkin Dewi Anjani,

Kicen Manik Astagina,

Nanging Kasilibang Pisan,

Wit Pican Betara Surya,

Duk Matemu Ring Swarga,

Sekama kama Ring Kayun,

Dahat Luwih Kawigunan.

 

PANGKUR

9.          Wenten Dasih Sang Begawan,

Ne Mearan Sang Jambawan,

Lintang Weci,

Ipun Uning Manik Puniku,

Sang Anjani Mangkin Makta,

Dahat Utama,

Manah Ipun Pacang Matur,

Ring Sang Bali Lan Sugriwa,

Nuli Ipun Gelis Memargi.

10.      Cening Subali Sugriwa,

Wenten Pican Sang Begawan,

Ring Anjani,

Manik Astagina Iku,

Madurgama Luwih Pisan,

Ento Kerana,

Sang Anjani Dahat Wibuh,

Sane Mangkin Patut Idewa,

Menakenang Ring I Aji.

11.      Sang Subali Brangti Pisan,

Manyengguhang Sang Begawan,

Pilih Kasih,

Mapikayun Pacang Matur,

Majeng Ring Ajin Ida,

Kawentenan,

Manik Astagina Punika,

Nuli Gelis Ida Memarga,

Ngungsi Linggih Sang Reçi.

12.      Sampun Rawuh ring Pasraman,

Nuli Nyembah ring Bukpadan,

Ida Sang Aji,

Ngandika Raris Sang Wiku,

Uduh Cening Pyanak Bapa,

Bagia Pisan,

Apa Krana Cening Rawuh,

Nah Tuturang Maring Bapa,

Mangda Bapa Tatas Uning.

DURMA

13.      Sang Subali Raris Matur Ring Begawan,

Rawuh Tityang Kadi Mangkin,

Wenten Sane Takenang,

Indik Manik Astagina,

Nguda Kicen Ring Anjani,

Boyake Tityang,

Sane Patut Icen Aji.

14.      Gawok Saja Tityang Ring Kotamanya,

Nanging Aji Pilih Kasih,

Nenten Pateh Mapyanak,

Cutet Tityang Tan Nerima,

Sapunika Atur Sang Bali,

Teges Pisan,

Mewastu Kebukan Sang Reçi.

15.      Uduh Cening Sang Bali lan Sugriwa,

Eda Cening Kadropon Brangti,

Bapa Jati Tusing Nawang,

Indik Manik Astagina,

Nekapica Ring Anjani,

Dija Minab,

Kenianga ban Biyang Cening,

16.      Nah Cening Pyanak Bapa Makarwa,

Eda Dewa Salah Tampi,

Jani Ada Pican Bapa,

Mantra Danuwedastra,

Sekama – kama dahat Sakti,

Melahang Dewa,

Ngincepang Jroning Ati.

17.      Sakewala Sang Jambawan,

Kema Mejalan,

Sang Anjani Ajak Mai,

Makta Manik Astagina,

Pacang Tenungin Bapa,

Ban Kuku Pancaka ne Sidi,

Manik Astagina,

Anake saja Dahat Luwih.

 

SINOM

18.      Sang Anjani Sampun Prapti,

Nuli Gelis Mangubakti,

Ring Bukpadan Ajin Ida,

Sarwi Mengaturang Manik,

Risampune Ketenungin,

Mwastu Kroda Sang Wiku,

Sang Naraci Polih Pica,

Saking Hyang Baskaradipati,

Nuli Sang Wiku,

Manakenin Rabin Ida.

19.      Uduh Naraci Corah Nista

Lawutang Tuturang Jani,

Apa Krana Sang Hyang Surya,

Ngicen Astagina Manik,

Sane Dahating Utami,

Sang Naraci Ajerih Matur,

Merasa ring Dewek Iwang,

Sayan Kroda Sang Maharçi.

Raris Mastu,

Matmahan Batu Rabin Ida.

20.      Ritatkala  Asapunika,

Maka Tiga Okane Sedih,

Nuli Ngelut Cokor Begawan,

Nunas Ica Ngasih – Asih,

Mangda Wurung Pastun Aji,

Ngandika Raris Sang Wiku,

Uduh Cening Pyanak Bapa,

Tan Wenang Supat Malih,

Apan Letuh,

Parilaksanan Biyang Idewa.

21.      Yening Cening Bakti Ring Byang,

Madak Sida Buin Panggih,

Ri Elemning Sanjata,

Tan Sida Bapa Cening,

Mangadumang Dewek Cening,

Nah Jani Bapa Muncang Cupu,

Patut Idewa Ngetutang,

Dadi Druwen Sang Mikolih,

Kadi Puniku,

Pewarah Sang Begawan.

GINANTI

22.      Puput Wecanan Sang Wiku,

Okan Ida Sami Nyembah,

Nuli Ngadeg Sang Begawan,

Tur Ngentungang Cupu Manik,

Mesat Nglayang Ring Akasa,

Ndatan Bina Kadi Tatit.

23.      Putran Ida Maka Telu,

Ngetut Manik Astagina,

MemargiIda Nganginang,

Rawuh Ring Kiskinda Giri,

Manike Runtuh Ring Alas,

Matemahan Tlaga Hening.

24.      Tlagane Medaging Tunjung,

Sayan Bungah Asri Pisan,

Raris Rawuh Sang Sugriwa,

Ring Telaga Ngrereh Manik,

Kagiat Dane Dados Wenara,

Ikuhnyane Lantang Mentik.

PUH DANGDANG

25.      Teler Mangkin Rawuh Sang Subali,

Maring Alas, Nuli Nyingak Telaga,

Tengah Tlaga Bojog Ngajengit,

Sang Subali Raris Tedun,

Taler Matemahan Bojog Premangkin,

Malih Rawuh Sang Jambawan,

Maring Telaga Macebur,

Taler Matmahan Wenara, Sang Sugriwa,

Nyingak Sang Subali,

Kaenyek Reh Mrupa Wenara.

26.      Sang Subali ErangPisan Kakedekin,

Olih Sugriwa,

Nging Keparna Meguyuan,

Kagiat Taler Kala Nyingakin,

Sang Sugriwa Tubuh Bulu,

Sang Subali Ngwalek Mangkin,

Dugi Raris Saling Tampyal,

Ditlagane Saling Jagur,

Nanging Dane Sang Jambawan,

Kadi Kebukan,

Turin Sedih Jroning Ati,

Tan Uning Ring Paindikannya.

27.      Kalapunika Saget Rawuh Sang Anjani,

Kagiat Nyingak,

Belinnya Marupa Wenara,

Maka Rwa Keaturin,

Dados Wre Mentik Bulu,

Nanging Sang Sugriwa Lan Subali,

Ritatkala Masuluh Ring Toya,

Kagiat Sareng Kalih Sungsut,

Kaleson Negak Maka Rwa,

Reh Kwalekang,

Olih Arinnya Anjani,

Candala Mrupa Wenara.

 

GINADA

28.      Uduh Beli Sareng Rwa,

Sandang Laran Beli Mangkin,

Kasor Beli Maring Tityang,

Sirna Wisesan Beli ne Dumun,

Kedek Anjani Ngwalekang,

Sang Subali,

Lan Sugriwa Brangti Pisan.

29.      Sang Subali Nyawis Kroda,

Kenken Petanyi Anjani,

Bali Sugriwa Kasoran,

Bali tan Kasor Kasengguh,

Manjus Malu Lautang,

Pang Mabukti,

Nyai Ngelah Kawisesan.

30.      Sang Anjani Jengah Pisan,

Nuli Ngambil Toya Masugi,

Premangkin Dados Wenara,

Tan Kari Listu Ayu,

Egar Sang Bali Ngwalekang,

Maka Tri,

Kemad Mwali ke Pasraman.

MASKUMAMBANG

31.      Kocap Mangkin Malih Matur Sang Anjani,

Maring Rakan Ida,

Nyelsel Raga Turin Nangis,

Uduh Beli Lacur Pisan,

32.      Singgih Beli,  Sang Sugriwa Sang Subali,

Kenken Ban Medaya,

Jengah Pisan Titiang Beli,

Ulian Manik Nemu Lara.

33.      Sepalanang Tityang Mati Ane Jani,

Napi Puaran Tityang,

Nandang Sedih Buka Jani,

Sang Subali Menabdabang.

34.      Uduh Adi Mirib Suba Titah Widhi,

Kadi Sesenggakan,

Mrebut Tulang Tanpa Daging,

Ene Twah Karma Phala.

35.      Kocap Mangkin Sang Sugriwa lan Subali,

Maring Alas Metapa,

Nanging Arinnya Anjani,

Nangun Kerti Maring Tlaga.

GINADA

36.      Sapunika Kocapannya,

Tatwan Sugriwa Lan Subali,

Matemahan Wenara,

Rawuh Mangkin Lintang Kasub,

Saking Sloka Kapiparwa,

Nanging Mangkin,

Dadosang Tityang Gaguritan.

37.      Tityang Nunas Pengampura,

Ring Kakawian Tityang Niki,

Wyakti Durung Paripurna,

Mewastu tan Ngledangin Kayun,

Wireh Tityang Dahat Wimuda,

Nenten Lali,

Tityang Ngaturang Suksma.

OM SHANTI, SHANTI, SHANTI, OM

P’Goeg Peguyangan Kangin